12/06/2026
को हो असिम शाह ? सांसद अमरेश सिंह।
टंकप्रसाद आचार्य स्मृति प्रतिष्ठानले बिहीबार ललितपुरमा आयोजना गरेको ‘संविधान संशोधन, नागरिकका अपेक्षा’ विषयक कार्यक्रममा बोल्दै राष्ट्रिय स्वतन्त्र पार्टीका सांसद अमरेश सिंहले संविधान संशोधन बहसपत्र तयारी कार्यदलका संयोजक असिम शाहको भूमिकामाथि प्रश्न उठाएका छन।
को हो असिम शाह ? सबैजना असिम शाहको पछाडि किन दौडिरहेका छन् ? संविधान संशोधन गर्ने अधिकार कसलाई छ,प्रक्रिया के हो ? भन्दै उनले बहसको औचित्यमाथि नै प्रश्न खडा गरे।
सिंहले संविधान संशोधनको विषयलाई ‘बुद्धिविलास’को संज्ञा दिँदै वर्तमान संसद्को संरचनामा यस्तो संशोधन सम्भव नरहेको जिकिर गरे। उनका अनुसार संविधान संशोधनका लागि संघीय संसदका दुवै सदनसँगै प्रदेशहरूको समेत सहमति आवश्यक पर्ने भएकाले अहिलेको अवस्थामा त्यसको सम्भावना न्यून छ।
कार्यक्रममा बोल्दै सिंहले गृहमन्त्री सुदन गुरुङले राजदरबार हत्याकाण्डको छानबिन गर्ने भनाइप्रति समेत व्यंग्य गर्दै भने। कुन दिन कोतपर्व र भण्डारखाल पर्वको पनि छानबिन गर्छु भन्नुहोला भन्दै उनले सरकारका प्राथमिकतामाथि समेत कटाक्ष गरे।
