27/03/2026
भगवान, भक्त र 'भाग्य'को खेल: बालेनको सपथ र मेरा तीन साथी! 🕉️📜
मेरा तीन जना अत्तिनै मिल्ने साथीहरू छन्, तर स्वभाव भने 'उत्तर-दक्षिण' छ। उनीहरूको ताल देख्दा लाग्छ— संसार कर्म र कुराको अनौठो सङ्गम हो:
१) पहिलो 'भजन शिरोमणि': बिहानैदेखि भगवानलाई यति पुकार्छ कि मन्दिरको घण्ट पनि थाकिसक्यो। पूजामा बस्छ, "प्रभु! परीक्षा पास गराइदिनु" भन्दै बिन्ती गर्छ। तर विडम्वना! उसले भगवानलाई त पुकार्छ, तर किताब कहिल्यै खोल्दैन। नतिजा? सधैँ 'फेल'! आखिर भगवानले पनि "आउट अफ सिलेबस" को उत्तर त लेखिदिँदैनन् नि! 🤷♂️
२) दोस्रो 'नास्तिक विद्वान': उसलाई न मन्दिर जानु छ, न त प्रार्थनामा विश्वास। तर घरमा बसेर यति मिहिनेत गर्छ कि किताबका पाना-पाना कण्ठ हुन्छन्। प्रतिफल? ऊ सधैँ पास हुन्छ। उसको लागि 'कर्म' नै भगवान हो। ✍️
३) तेस्रो 'सिटामोल' भक्त: ऊ अलि 'डिजाइनर' खालको छ। सरस्वती पूजा र परीक्षाको बेला मात्र उसलाई भगवानको याद आउँछ। स्कुलमा सरले पढाएको भरमा परीक्षा दिन्छ। कहिले पास हुन्छ त कहिले एक-दुई विषय 'लाग्छ'। उसको भक्ति र पढाइ दुवै 'पार्ट-टाइम' छ। 😅
अब कुरा गरौँ अहिलेको तात्तातो प्रसङ्गको—
आउँदो चैत्र १३ गते, ठिक दिउँसो १२:३४ बजेको 'साइत'। ७ जना ब्राह्मणले शङ्ख फुक्ने, १०८ बटुकले स्वस्ती वाचन गर्ने र १०७ जना बौद्ध लामाहरूको उपस्थितिमा बालेन शाहले प्रधानमन्त्रीको पदभार ग्रहण गर्ने अरे!
यो तामझाम देख्दा मलाई आफ्नै साथीहरूको याद आयो। यदि ७ जना ब्राह्मणको शङ्ख र १०७ जना लामाको प्रार्थनाले मात्र देश चल्ने भए त मेरो त्यो 'पहिलो साथी' अहिलेसम्म देशकै ठुलो विद्वान भइसक्थ्यो!
तर, मेरो अर्को एक जना यस्तो साथी पनि छ, जो भगवानप्रति अगाध श्रद्धा पनि राख्छ र पढाइमा पनि 'दिन-रात' एक गरेर खटिन्छ। फलस्वरूप, ऊ सधैँ सर्वोत्कृष्ट हुन्छ।
हो, बालेनजी बाट पनि देशले यही अपेक्षा गरेको छ— जसमा संस्कारको सम्मान पनि होस् र कर्मको कठोर साधना पनि। केवल अनुष्ठानले मात्र होइन, अहोरात्रको खटाइले मात्र यो देश बदलिनेछ।
नेपालको प्रधानमन्त्रीमा नियुक्त हुनुभएकोमा बालेन शाहज्यू, तपाईंलाई हार्दिक बधाई तथा सफल कार्यकालको शुभकामना! 🇳🇵✨💐
