30/07/2025
६० वटा गोलभेडादेखि ३० रोपनी सम्मको यात्रा; धादिङका भीमसेन श्रेष्ठको सफलताको यात्रा:
धादिङ जिल्लाको ज्वालामुखी गाउँपालिका-४ निवासी ४१ वर्षिय भीमसेन कुमार श्रेष्ठ आज धादिङ जिल्लामा एक सफल कृषक बन्नु भएको छ । उहाँको जीवन यात्रा संघर्ष परिश्रम र दृढ संकल्पले भरिएको छ ।बि.स. २०६१ देखी २०६५ सम्म मलेसियामा रोजगारको शिलशिलामा काम गरेर फर्किएपछि उहाँले होटल, कपडा पसल, क्रसर उद्योगमा समेत काम गरे तर कतैबाट पनि लाभ र सन्तुष्ट हुन सकेन्न अन्ततः आफ्नो माटो र कृषि प्रतिको मोहले उहाँलाई गाउँतिर आकर्षित गर्यो र वि.स. २०६८ देखी तरकारी खेति सुरु गर्नु भयो र बि.स. २०७५ सालमा एस.जि. एग्रिकल्चर फर्म दर्ता गरि व्यवसायिक रुपमा कृषि पेशा अबलम्वन गर्नु भयो ।
सुरुमा जम्मा ६० वटा गोलभेडाको बोटबाट खेती सुरु गर्नु भएका श्रेष्ठले आज ३० रोपनीमा तरकारी बिस्तार गर्नुभएको छ । आधुनिक कृषि प्रविधिहरु जस्तै थोपा सिचाई, फर्टिगेसन, मल्चिङको प्रयोग, गोलभेडामा ग्राफ्टिङ गरेको बिरुवा खरिद गरि खेति गर्दै आएका श्रेष्ठले परियोजनाबाट संचालन गरिएको गोलभेडामा ग्राफ्टिङ सम्बन्धि तालिममा सिकेर आएर हाल आफै ग्राफ्टिङ बिरुवा उत्पादन गर्दै छन् । अहिले उहाँको २५ रोपनी जम्मा जग्गा मध्ये १८ रोपनीमा थोपा सिचाई जडान गरिएको छ । उहाँको फर्ममा २ जना नियमित र १६/१७ जना आंशिक श्रमिकहरुलाई रोजगारी दिइएको छ । प्रधानमन्त्री कृषि आधुनिकिकरण परियोजना, परियोजना कार्यान्वयन एकाई धादिङबाट २०७८/७९ मा चक्लाबन्दी कार्यक्रम मार्फत टनेल निर्माण, २०८०/८१ सालमा फर्टिगेसन जडान तथा बिभिन्न साना मेशिनरीहरु प्राप्त गर्नु भएको छ । साथै उहाँले २ वटा गाई, २८ वटा बाख्रा र १३० वटा लोकल कुखुरा पनि पालन गरेर बहुआयामिक कृषि फार्म स्थापना गर्नु भएको छ ।
