02/07/2025
जिल्ला विपद व्यवस्थापन समिति, दैलेखको अनुरोध !
मनसुन सक्रिय भइसकेको छ। जल तथा मौसम विज्ञान विभागका अनुसार कर्णाली प्रदेशमा यस वर्ष सरदर भन्दा अधिक वर्षा हुने पूर्वानुमान छ । यसै सन्दर्भमा मनसुनजन्य विपदप्रति सचेत रहन, जोखिम न्यूनीकरण गर्न तथा विपद पीडितको उद्दार राहत लगायतका कार्यलाई व्यवस्थित वनाउन देहाय बमोजिम गर्नुगराउनुहुन जिल्ला विपद व्यवस्थापन समिति, दैलेख सम्बन्धित सबैमा अनुरोध गर्दछः
१. जल तथा मौसम विज्ञान विभाग, राष्ट्रिय आपतकालीन कार्य सञ्चालन केन्द्र (NEOC ) लगायतका निकायबाट सूचना प्राप्त गरी आवश्यक सतर्कता अपनाउने । खोला तथा नदीका किनार, पहिरो सम्भाव्य भीर पाखा तथा अन्य विपद जोखिमयुक्त स्थानमा बसोबास गर्ने व्यक्तिहरु थप सतर्क रही सम्बन्धित स्थानीय तहको समन्वयमा सुरक्षित आश्रयस्थल पहिचान गरी वस्ने ।
२. बाढी आएको समयमा नदी नालामा माछा मार्ने, पौडी खेल्ने, काठ दाउरा संकलन गर्ने जस्ता कार्य नगर्ने ।
३. भारी बर्षा भइरहेका समयमा बाढी पहिरोको उच्च जोखिम हुने हुँदा सवारी साधन सञ्चालन नगर्ने/नगराउने । सवारी साधन सञ्चालन सम्बन्धमा समय समयमा जारी हुने आदेशको पूर्ण पालना गर्ने / गराउने ।
४. मनसुनजन्य विपद पश्चात विभिन्न प्रकारका महामारी एवं रोगको संक्रमण फैलिन सक्ने हुँदा सोतर्फ समेत सचेत रहने।
५. अत्यावश्यक सामग्री (जस्तै खानेकुरा, कपडा, औषधी, पानी आदि ) हरु केही समयलाई पुग्ने गरी भण्डारण गर्ने ।
६. गर्भवती तथा सुत्केरी महिला, बालबालिका, जेष्ठ नागरिक, अपाङ्गता भएका व्यक्ति तथा अशक्त लगायत उच्च जोखिमयुक्त व्यक्तिहरुको विशेष संरक्षण गर्ने ।
७. विपद जोखिम न्यूनीकरण तथा व्यवस्थापनका लागि जिम्मेवार सबै निकाय/ संस्थाहरु आवश्यक जनशक्ति र स्रोत साधन सहित तयारी अवस्थामा रहने । स्थानीय समुदायले समेत आवश्यक सहयोग तथा सहजीकरण गर्ने ।
८. विपद पीडितको उद्दार, राहत, पुनःर्स्थापना, अत्यावश्यक वस्तु तथा सेवा प्रवाह लगायतका कार्यमा सवै क्षेत्र, निकायले आवश्यक सहयोग एवं सहजीकरण गर्ने ।
९. विपद पीडितका लागि तत्काल राहत लगायत अन्य सेवा सुविधा स्थानीय तहहरुवाट एकद्वार प्रणाली मार्फत व्यवस्थापन हुने हुँदा सोका लागि सम्बन्धित स्थानीय तहमा सम्पर्क गर्ने।
१०. विपद सम्बन्धी घटनाको भ्रम सिर्जना गर्ने, अफवाह फैलाउने, सामाजिक सद्भाव खलबल्याउने, कानून विपरितका गतिविधि गर्ने, उद्दार, राहत एवं अत्यावश्यक सेवा प्रवाहमा अवरोध सिर्जना गर्ने जस्ता कार्य नगर्ने/नगराउने ।
११. विपदको समयमा अत्यावश्यक वस्तुहरुको कृत्रिम अभाव सिर्जना गर्ने, महंगी तथा कालाबजारी गर्ने, अखाद्य वस्तुहरुको बिक्रिवितरण गर्ने जस्ता उपभोक्ता हीत विपरितका कार्य नगर्ने/नगर्ने ।
१२. विपदको उच्च जोखिम देखिएमा, विपदजन्य घटना घटेमा वा कानून विपरितका कुनै कार्य भएमा तत्काल नजिकको प्रहरी इकाई वा स्थानीय तह वा जिल्ला आपतकालीन कार्य सञ्चालन केन्द्र - DEOC(०८९-४१०२३३) वा जिल्ला प्रहरी कार्यालय कन्ट्रोल (१००) वा सशस्त्र प्रहरी बल आश्रित गुल्म कन्ट्रोल (९८५१२७११४१) वा जिल्ला विपद व्यवस्थापन समितिको विपद फोकल पर्सन ( ९८५८०४०१२६) मा सम्पर्क गर्ने ।
