29/01/2026
धादिङ । धादिङ जिल्लाको दिगो विकास र स्थानीय अर्थतन्त्र प्रवर्द्धन गर्ने उद्देश्यका साथ आजदेखि ‘दशौँ धादिङ महोत्सव–२०८२’ सुरु हुँदैछ। “धादिङको दिगो विकास र अर्थतन्त्रको आधार: कृषि, पर्यटन, जलस्रोत तथा उद्योगको पूर्वाधार” भन्ने मूल नाराका साथ महोत्सव धादिङबेसीस्थित खुल्ला मञ्चमा आयोजना हुन लागेको हो।
धादिङ उद्योग वाणिज्य संघको आयोजनामा हुन लागेको महोत्सवको उद्घाटन नेपाल उद्योग वाणिज्य महासंघका अध्यक्ष चन्द्रप्रसाद ढकालले गर्ने कार्यक्रम रहेको छ।
महोत्सवका अवसरमा जिल्लाका विभिन्न जातजाति तथा समुदायको कला, संस्कृति र परम्परा झल्किने मौलिक झाँकीसहितको र्याली आयोजना गरिनेछ। साथै कृषि, घरेलु उद्योग तथा व्यावसायिक गरी कुल १६० वटा स्टल रहनेछन्, जहाँ स्थानीय उत्पादनहरूको प्रदर्शनी तथा बिक्री गरिनेछ।
यस महोत्सवमा ऐतिहासिक भैरवी मन्दिरको प्रचार–प्रसार र स्थानीय उत्पादनको प्रवर्द्धनलाई विशेष प्राथमिकता दिइएको आयोजकले जनाएको छ। महोत्सवले जिल्लाको कृषि, पर्यटन र उद्योग क्षेत्रलाई थप चलायमान बनाउने विश्वास लिइएको छ।
आयोजकले स्थानीय बासिन्दा तथा जिल्लाबाहिरका आगन्तुकहरूलाई महोत्सवमा सहभागिता जनाई स्थानीय अर्थतन्त्र र पर्यटन प्रवर्द्धनमा सहयोग गर्न आग्रह गरेका छन्
Pic :Routine Of Dhading Banda
