18/03/2026
धनुषामा अन्तरजातीय विवाह गरेकी एक युवती मृत अवस्थामा फेला परेकी छन् । घटनालाई लिएर माइती पक्षले हत्या भएको आशंका व्यक्त गरेको छ ।
धनुषाको गणेशमान चारनाथ नगरपालिका–४ निवासी मुकेश धनखोटी यादवकी २५ वर्षीया श्रीमती विभाकुमारी महतो मंगलबार दिउँसो आफ्नै घरमा झुन्डिएको अवस्थामा फेला परेकी हुन् । मुकेश र विभाले करिब पाँच वर्षअघि भागी विवाह गरेका थिए ।
मृतकका दाजु मनिषकुमार महतोका अनुसार विवाह भएको लामो समयसम्म पनि सन्तान नभएको विषयलाई लिएर विभामाथि पटक–पटक शारीरिक तथा मानसिक यातना हुने गरेको थियो । उनले घटनामा संलग्नता रहेको आशंका गर्दै विभाको शरीरमा नीलडाम देखिएको दाबी गरेका छन् ।
घटनापछि मनिषले जिल्ला प्रहरी कार्यालय धनुषामा मुकेशविरुद्ध आत्महत्या दुरुत्साहनको जाहेरी दिएका छन् ।
जाहेरीका आधारमा प्रहरीले मुकेशलाई पक्राउ गरी अनुसन्धान सुरु गरेको छ । धनुषा प्रहरीका प्रवक्ता प्रहरी नायब उपरीक्षक (डीएसपी) गणेश बमले आत्महत्या दुरुत्साहन सम्बन्धी जाहेरीका आधारमा आरोपीलाई नियन्त्रणमा लिएर आवश्यक अनुसन्धान अघि बढाइएको जानकारी दिए ।
