31/07/2025
उनी हुन् ६ घण्टा मुखले श्वास दिएर नवजात शिशुको ज्यान बचाउने अनमी जानकी पुजारा
गत साउन ८ गते राति, बैतडीको दुर्गम मानिने सिगास–४ कान्धारस्थित आधारभूत स्वास्थ्य सेवा केन्द्रमा २० वर्षीया लक्ष्मी धामीले जन्म दिएको शिशु रोएन।
राति ठीक ९ बजेर ३३ मिनेटमा जन्मिएको शिशु नरुने, श्वास नफेर्ने र शरीरमा कुनै प्रतिक्रिया नभएपछि २७ वर्षीया अनमी पुजाराले आफ्नो ६ वर्षे करियरको सबैभन्दा कठिन परीक्षाको सामना गर्नुपर्यो।
कृत्रिम श्वास दिने ‘एम्बू ब्याग’ शिशुको सानो मुखमा ठ्याक्कै मिलेन र हावा बाहिर फुस्किरहेको थियो। अब अन्तिम बिकल्प थियो—आफ्नै मुखले शिशुको मुखमा श्वास भर्नु। जानकीले पूरै ६ घण्टाको लगातार सास दिइन्। जब बिहानको ३ बज्यो, अचानक शिशुले रुन सुरु ग¥यो र हातखुट्टा चलाउन थाल्यो। त्यो रुवाइ जानकी र त्यहाँ उपस्थित सबैका लागि संसारको सबैभन्दा ठूलो खुसी बन्यो।
‘मैलेँ त्यो क्षण सम्झिँदा मेरो आँखाबाट आशु खस्छन्, भगवान् रहेछन् भन्ने लाग्यो, कति डर थियो, अहिले पनि हात काप्छन्, मुट चिसो हुन्छ त्यो रातिको अवस्था सम्झिँदा, हामीलाई भगवान्ले साथ दियो, हामीले आफ्नो ड्युटी गरेका हौँ, सबैले राम्रो काम गर्नुभयो भनेर सबैबाट साहस पाउँदा धेरै खुसी लाग्यो, सबैबाट यति धेरै माया पाउँला भन्ने सोचेकी थिइन्,’उनले भनिन्।
