12/08/2026
श्री शीतला माध्यमिक विद्यालयसम्बन्धी उठेका जनसमुदायका गम्भीर चासो तथा प्रश्नहरू :
१. सार्वजनिक गुठीअन्तर्गत रहेको श्री शीतला माध्यमिक विद्यालय हाल प्रचलित कानुन, नियम तथा गुठीसम्बन्धी व्यवस्थाअनुसार विधिसम्मत रूपमा सञ्चालन भइरहेको छ वा छैन? विद्यालयको गुठीसम्बन्धी अभिलेख, व्यवस्थापन संरचना तथा सञ्चालन प्रक्रियाको सम्बन्धित निकायबाट आवश्यक छानबिन तथा परीक्षण गरिएको छ वा छैन?
२. वि.सं. २०६१ सालमा पाख्रीबास कृषि केन्द्र संस्थापक गुठियार रहेको भनिएको श्री शीतला माध्यमिक विद्यालयमा वि.सं. २०८२ सालसम्म आइपुग्दा गुठियारको संरचना कसरी परिवर्तन भयो? हाल पाख्रीबास नगरपालिकाका मेयर तथा उहाँकी श्रीमती, स्थानीय चर्चका पास्टर तथा उहाँका छोरा (प्रधानाध्यापक), साथै अर्को एक परिवारका श्रीमान्–श्रीमती गरी जम्मा छ जना व्यक्ति कुन कानुनी प्रक्रिया, निर्णय वा प्रमाणका आधारमा गुठियारका रूपमा स्थापित भए? उक्त गुठियार नियुक्ति/परिवर्तनसम्बन्धी निर्णय, अभिलेख तथा कानुनी आधार सार्वजनिक गर्न सकिन्छ कि सकिँदैन?
३. नेपाल सरकारको सार्वजनिक स्रोतबाट सञ्चालित तथा बुढानीलकण्ठ विद्यालयमार्फत उपलब्ध गराइने छात्रवृत्ति कार्यक्रममा गरिब, विपन्न तथा जेहेन्दार विद्यार्थीहरूको वास्तविक पहुँच कस्तो छ? छात्रवृत्ति छनोटका मापदण्ड, लाभग्राही विद्यार्थीको विवरण तथा छनोट प्रक्रिया पारदर्शी र निष्पक्ष छ कि छैन भन्ने विषयमा सम्बन्धित निकायबाट अनुगमन भएको छ वा छैन?
४. सार्वजनिक विद्यालयले गुठियारको निजी स्वामित्वमा रहेको भनिएको जग्गा प्रयोग गरेबापत भाडा तिर्नुपर्ने अवस्था किन सिर्जना भयो? उक्त जग्गाको स्वामित्व, विद्यालयले प्रयोग गर्ने कानुनी आधार, भाडा सम्झौता, भाडा निर्धारण प्रक्रिया तथा विद्यालयको आर्थिक दायित्वसम्बन्धी निर्णयहरू के–कस्ता छन्?
५. विद्यालयको नाममा खरिद तथा ल्याइएको भनिएको स्कुल बस हाल कानुनी रूपमा कसको नाममा दर्ता रहेको छ? बस खरिदका लागि प्रयोग भएको रकमको स्रोत, खरिद प्रक्रिया, स्वामित्वसम्बन्धी कागजात तथा सवारी दर्ता अभिलेख सार्वजनिक गर्न सकिन्छ कि सकिँदैन?
६. सार्वजनिक विद्यालयको नाम अंकित स्कुल बसलाई कुनै अमुक राजनीतिक दल वा राजनीतिक गतिविधिका कार्यक्रममा कसरी प्रयोग गरियो? विद्यालयको सम्पत्ति राजनीतिक दलका कार्यक्रम वा अन्य गैरशैक्षिक प्रयोजनमा प्रयोग गर्न अनुमति दिने निर्णय कसले गरेको हो? त्यसका लागि विद्यालय व्यवस्थापन समिति, सम्बन्धित स्थानीय तह वा अन्य अधिकारप्राप्त निकायबाट स्वीकृति लिइएको थियो वा थिएन?
७. श्री शीतला माध्यमिक विद्यालयमा सञ्चालनमा रहेको छात्रावास कानुनी तथा मापदण्डअनुसार स्वीकृत र व्यवस्थित रूपमा सञ्चालनमा छ वा छैन? छात्रावास सञ्चालनका लागि आवश्यक स्वीकृति, व्यवस्थापन समिति, वार्डेन/हेरचाह गर्ने जिम्मेवार व्यक्ति, विद्यार्थीको दैनिक हाजिरी तथा आवतजावत अभिलेख, सुरक्षा व्यवस्था र अभिभावकसँगको समन्वयसम्बन्धी व्यवस्था के–कस्तो छ?
छात्रावासमा बस्दै आएको विद्यार्थी विगत केही दिनदेखि सम्पर्कविहीन/हराइरहेको अवस्थामा उक्त विद्यार्थीको सुरक्षा तथा संरक्षणको प्राथमिक जिम्मेवारी कसको हो? विद्यार्थी छात्रावासबाट बाहिरिएको वा हराएको विषयमा विद्यालय प्रशासन, छात्रावास व्यवस्थापन, जिम्मेवार कर्मचारी तथा सम्बन्धित व्यवस्थापन निकायले तत्काल के–कस्ता कदम चालेका छन्? घटनाबारे सम्बन्धित अभिभावक तथा प्रहरीलाई समयमै जानकारी गराइएको छ वा छैन?
