02/05/2026
सुकुम्बासीको नारा कडा..मारे चिहान, बांचे घर,एकता नै हाम्रो
बस्ती रक्षा आन्दोलन परिचालन समितिका संयोजक सुवास राईले भुटानी शरणार्थीहरूले नेपालमा आश्रय पाउन सक्ने तर नागरिकता भएका नेपालीहरू नै घरबासविहीन हुनुपर्ने अवस्था आउनु विडम्बनापूर्ण भएको टिप्पणी गरे। उनले बालेनले आफूलाई पहिले “काम गर्ने मान्छे” भनेको स्मरण गराउँदै अहिले भने “देशमा आगो लगाउने” र “भत्काउने” प्रवृत्तिमा लागेको आरोप लगाए।
उनले वर्तमान सरकारलाई “हत्यारा सरकार” को संज्ञा दिँदै गरिब र सुकुम्बासीहरूको पीडा नबुझेको आरोप समेत लगाए। “बालेनसँग अर्बौँ रुपैयाँ र सुन छ, तर गरिबसँग खाने नुनसमेत छैन,” भन्दै उनले बढ्दो आर्थिक असमानताप्रति चिन्ता व्यक्त गरे।
राणाकाल र राजतन्त्रको समयमा समेत जनता यसरी घरबासविहीन हुन नपरेको दाबी गर्दै उनले बालेन “राजाभन्दा पनि माथि उठ्न खोजेको” टिप्पणी गरे। साथै, रास्वपाका नेताहरूलाई नेतृत्व सुधार गर्न र जनतालाई शासक होइन, सेवकका रूपमा व्यवहार गर्न आग्रह गरे।
राईले सहकारी प्रकरणतर्फ संकेत गर्दै गरिब तथा सुकुम्बासीहरूले जम्मा गरेको रकम ठूला व्यक्तिहरूले हिनामिना गरेको आरोप लगाए। “एकातिर गरिबको पैसा खाइन्छ, अर्कोतर्फ उनीहरूको झुपडी भत्काइन्छ,” उनले भने।
यसैबीच, धरानका केही रास्वपा कार्यकर्ताले सुकुम्बासी आन्दोलनमा सहभागी हुनेलाई “हातखुट्टा भाँचिने” धम्की दिएको उल्लेख गर्दै राईले यस्ता धम्कीबाट आन्दोलन नडराउने चेतावनी दिएका छन्।
सभामा नेपाल सुकुम्बासी संरक्षण समाजका पूर्व अध्यक्ष सन्जुहाङ सावाले विकासको नाममा गरिब तथा विपन्न समुदायमाथि अन्याय भइरहेको बताए ।
