30/07/2026
बंगलाचुलीमा ८ थान अवैध भरुवा बन्दुक बरामद
मधुसूदन गिरी
दाङ, १४ साउन । पछिल्लो समय दाङका विभिन्न जंगल तथा सामुदायिक वनबाट अवैध भरुवा बन्दुक बरामद हुने क्रम जारी रहेको छ।
विशेष गरी बंगलाचुली क्षेत्रका सामुदायिक वनहरुबाट अवैध भरुवा बन्दुक बरामद हुने गरेको छ । जस अन्तर्गत इलाका प्रहरी कार्यालय कमिरेचौरले दाङको बंगलाचुली गाउँपालिका–६ स्थित लालिगुराँस सामुदायिक वन क्षेत्रबाट ८ थान अवैध भरुवा बन्दुक बरामद गरेको छ।
इलाका प्रहरी कार्यालय कमिरेचौरका प्रहरी सहायक निरीक्षक अनबहादुर पुनको कमाण्डमा खटिएको प्रहरी टोलीले विशेष सूचनाको आधारमा उक्त वन क्षेत्रमा लुकाइछिपाइ राखिएको अवस्थामा भरुवा बन्दुकहरू फेला पारी बरामद गरेको हो।
बरामद गरिएका बन्दुकहरू आवश्यक कानुनी प्रक्रिया पूरा गरी प्रहरी नियन्त्रणमा राखिएको छ। बरामद गरिएका बन्दुक कसले र किन जंगलमा लुकाएर राखेको भन्ने विषयमा अनुसन्धान भइरहेको प्रहरीले जनाएको छ।
