21/07/2025
बाल गायिका सोनम श्रेष्ठलाई भोटिङ गर्न आग्रह...
दाङ ,५ साउन । दाङकी बाल गायिका सोनम श्रेष्ठले चर्चित गायन रियालिटी शो ‘द भ्वाइस अफ किड्स सिजन–४’ मा सहभागिता जनाउँदै सबैको मन जित्न सफल भएकी छिन् । सुरिलो आवाज, आत्मविश्वासी प्रस्तुति र गहिरो भावनाले भरिएको गायनशैलीका कारण सोनमले ब्लाइन्ड अडिसनमै चारैजना कोचको कुर्सी घुमाउन सफल भएकी थिइन् ।
चारै कोचले आफ्ना टिममा ल्याउन चाहे पनि सोनमले सोचविचार गरेर कोच मिलन नेवारलाई रोजेकी थिइन् । उनी अहिले कोच मिलनको टिमबाट ब्याटल राउन्ड पार गर्दै टप–६ मा प्रवेश गरेकी छिन् । शनिवारदेखि भोटिङ राउन्ड सुरु भएसँगै सोनमको बुवा गोकुल श्रेष्ठले देश–विदेशमा रहेका सबै नेपालीलाई सोनमलाई भोट गर्न आग्रह गरेका छन् । उनले खल्ती एपमार्फत् भोट गर्न तथा विदेशमा रहेका नेपालीहरूले पनि भोट गर्न सकिने जानकारी गराउँदै सहयोगको आग्रह गरेका छन् ।
प्रतियोगिताको विभिन्न राउन्डमा उत्कृष्ट प्रस्तुति दिँदै अघिल्ला चरण पार गर्दै आएकी सोनमले अब उपाधि जित्ने दौडमा प्रवेश गरिसकेकी छन् । सोनम श्रेष्ठ दाङ जिल्लाकी छोरी तथा घोराहीको शानको रूपमा चिनिँदै गएकीले भोट गरिदिन दाङ जिल्ला उद्योग वाणिज्य संघका वरिष्ठ उपाध्यक्ष नरेश श्रेठले सबैमा आग्रह गरेका छन् । श्रेष्ठले अबको निर्णायक घडीमा उनलाई अघि बढ्न भोटमार्फत् जिताउन सबै नेपाली दर्शक, शुभेच्छुक र सहयोगी मनको साथ र समर्थन आवश्यक रहेको भन्दै सहयोग गर्न आग्रह गरेका हो ।
