07/06/2026
मकवानपुरगढीमा पालिकास्तरीय आठौं फुटसल रनिङ शिल्ड प्रतियोगिता हुने
एमपी शर्मा
मकवानपुरगढी २४ जेठ
मकवानपुरगढी गाउँपालिकामा पालिकास्तरीय आठौं संस्करणको फुटसल रनिङ शिल्ड प्रतियोगिता–२०८२ आयोजना हुने भएको छ। प्रतियोगिताबारे जानकारी दिन आयोजित पत्रकार सम्मेलनमा आयोजकले प्रतियोगिता आगामी जेठ ३१ गतेदेखि असार १ र २ गतेसम्म सञ्चालन हुने जनाएको छ।
प्रतियोगिताका खेलहरू मकवानपुरगढी गाउँपालिका–३, मक्राञ्चुलीस्थित श्री भानु माध्यमिक विद्यालयको फुटसल मिनि पिच मा सञ्चालन गरिनेछन्। स्थानीय स्तरमा खेलकुदको विकास, युवाहरूमा खेलप्रति रुचि अभिवृद्धि तथा प्रतिभावान खेलाडीहरूको पहिचान गर्ने उद्देश्यले प्रतियोगिता आयोजना गर्न लागिएको आयोजकको भनाइ छ।
आयोजकका अनुसार प्रतियोगितामा गाउँपालिकाका आठवटै वडाबाट १६ वटा टोलीको सहभागिता रहने अपेक्षा गरिएको छ। प्रतियोगितामा सहभागी हुने टोलीका लागि प्रति टोली रु. ५ हजार प्रवेश शुल्क निर्धारण गरिएको छ।
प्रतियोगितामा उत्कृष्ट प्रदर्शन गर्ने टोलीलाई आकर्षक नगद पुरस्कारको व्यवस्था गरिएको छ। विजेता टोलीले रु. ७५ हजार नगदसहित ट्रफी, मेडल र प्रमाणपत्र प्राप्त गर्नेछ भने उपविजेता टोलीलाई रु. ५० हजार नगदसहित ट्रफी, मेडल र प्रमाणपत्र प्रदान गरिनेछ।
