17/07/2025
आर्थिक मामिला मन्त्री राम राना फाकफोकथुममा: ‘बेलि व्रिज ’ को भव्य उद्घाटन
फाकफोकथुम, श्रावण १ – कोशी प्रदेशका आर्थिक मामिला तथा योजना मन्त्री माननीय श्री राम राना ज्यूको प्रमुख आतिथ्यतामा फाकफोकथुम गाउँपालिकामा निर्माण सम्पन्न भएको गौरवको योजना अन्तर्गतको फाकफोक खोला वेलिब्रिज (सेतो पुल) आजदेखि औपचारिक रूपमा सञ्चालनमा ल्याइएको छ।
नेपालीहरुको महान चाड साउने संक्रान्तिका दिन उद्घाटनको मुख्य साईत जुराई विधिवत् पूजापाठ गरी, मन्त्री रानाले रातो रिबन काटेर पुलको उद्घाटन गर्नुभयो। कार्यक्रममा फाकफोकथुमका राजनीतिक, सामाजिक र समकालीन व्यक्तित्वहरूले झुम्मिएर मन्त्री रानाको स्वागत गरेका थिए।
उद्घाटन समारोहमा मन्तव्य राख्दै मन्त्री रानाले भने, “पुल बनेकोमा जति फाकफोकथुमबासी खुसी छन्, म त्योभन्दा दोब्बर खुसी छु। असारमै मेरा समकालीन साथीसँग भेट्ने अवसर मिल्यो।” उहाँले आगामी दिनमा फाकफोकथुममा विकास पूर्वाधारका लागि थप योजना तथा बजेटको व्यवस्था गर्ने प्रतिबद्धता पनि व्यक्त गर्नुभयो।
मन्त्री रानाले पालिकाको केन्द्र आम्चोक भएकाले सन्त ज्ञानदिलदासको जन्मस्थललाई धार्मिक पर्यटकीय गन्तव्यका रूपमा विकास गर्नुपर्ने आवश्यकता औंल्याउँदै त्यसतर्फ लाग्न पनि आग्रह गर्नुभयो। “सन्त ज्ञानदिलदाससँग तत्कालीन राजा–महाराजहरू प्रत्यक्ष भेट गरेर आशीर्वाद लिएको ऐतिहासिक अभिलेखसमेत भेटिएको छ,” उहाँले बताए।
फाक, फोक, थुम भन्ने शब्दहरूको समायोजनबाट बनेको “फाकफोकथुम” नामको ऐतिहासिक महत्वलाई स्मरण गर्दै उहाँले राष्ट्रिय पुनःसंरचना आयोगमा समेत यस्तै आधारमा सिफारिस गरिएको उल्लेख गर्नुभयो।
कार्यक्रमका अध्यक्ष एवं गाउँपालिका अध्यक्ष श्री दिपेन्द्र खनाल ज्यूले पुल निर्माण नागरिकसँगको प्रतिवद्धताको एक सफल उदाहरण भएको बताउँदै पालिकामा अन्य योजनाहरू पनि सुचारु रहेको जानकारी दिनुभयो।
गाउँपालिकाकी उपाध्यक्ष ज्यूले स्वागत मन्तव्य दिँदै, “पुल बनेपछि आम नागरिकले प्रत्यक्ष धन्यवाद दिनु भएको छ, यो हामी सबैको सफलता हो,” भन्नुभयो।
सामाजिक, धार्मिक, शैक्षिक तथा राजनीतिक क्षेत्रका विभिन्न विशिष्ट व्यक्तित्वहरूको उपस्थिति रहेको कार्यक्रममा पुलको नाम “सेतो पुल” राखिएको घोषणा गरिएको हो।
मन्त्री रानाले अन्त्यमा स्थानीय सरकार र जनतालाई आग्रह गर्दै भने, “यो पुलको संरक्षण गरौं, यसको दीगो उपयोगको सुनिश्चितता गरौं, यही समाजसेवा हो।”
स्रोत :- दिपेन्द्र लिम्बू
