Mithila Pati, janakpurdham, Janakpur (2026)

27/05/2026

भारत सरकार द्वारा नेपाल सरकारलाई कैदी वाहन हस्तान्तरण:

26/05/2026

महोत्तरीको भ्रमरपुरामा ‘स्वास्थ्यको आशा’ बन्दै कम्युनिटी हेल्थ सेन्टर, २० रुपैयाँमै उपचार सेवा

महोत्तरी । स्वास्थ्य सेवा महँगो बन्दै गइरहेको समयमा महोत्तरीको लोहारपट्टी नगरपालिका–भ्रमरपुरामा सञ्चालन भइरहेको कम्युनिटी हेल्थ सेन्टर आर्थिक रूपमा कमजोर तथा ग्रामीण भेगका नागरिकका लागि राहतको केन्द्र बनेको छ । न्यून शुल्कमा स्वास्थ्य सेवा उपलब्ध गराउँदै आएको यो केन्द्र अहिले स्थानीयवासीको भरोसाको थलो बन्दै गएको छ ।

काठमाडौंस्थित ‘पिपल्स जेनरल हस्पिटल’मा लामो समयदेखि सेवा दिँदै आउनुभएका डा. अहमद रेजाको पहलमा करिब दुई वर्षअघि सुरु गरिएको यो स्वास्थ्य केन्द्रले अहिले दैनिक दर्जनौं बिरामीलाई सेवा दिइरहेको छ । हेल्पिङ हार्ट (Helping Heart) नामक गैरसरकारी संस्थाको सहयोगमा सञ्चालन भइरहेको केन्द्रमा स्थानीय मात्र नभई बाहिरी क्षेत्रबाट समेत बिरामी उपचारका लागि पुग्ने गरेका छन् ।

यस केन्द्रको सबैभन्दा आकर्षक पक्ष भनेको सुलभ शुल्कमा उपलब्ध स्वास्थ्य सेवा हो । यहाँ ओपीडी सेवा केवल २० रुपैयाँमा उपलब्ध छ । ल्याब परीक्षण, एक्स–रे तथा यूएसजी सेवामा ५० प्रतिशत छुट दिइएको छ भने फार्मेसीमा औषधिमा १० प्रतिशत छुटको व्यवस्था गरिएको छ ।

डा. अहमद रेजाका अनुसार हाल दैनिक २५ देखि ३० जना बिरामीले सेवा लिइरहेका छन् । दम, अल्सरजस्ता दीर्घरोगका बिरामीसँगै बालरोग र स्त्रीरोग सम्बन्धी सेवाका लागि आउने सेवाग्राहीको संख्या पनि उल्लेख्य रहेको छ ।

महोत्तरीका ग्रामीण क्षेत्र अझै पनि सहज स्वास्थ्य सेवाबाट टाढा रहेको अवस्थालाई मध्यनजर गर्दै अब सेवा विस्तारको तयारीसमेत सुरु गरिएको छ । आगामी दिनमा रौजाबजार, महदैया र सम्सी बजारमा थप तीन वटा कम्युनिटी हेल्थ सेन्टर सञ्चालन गर्ने योजना रहेको डा. रेजाले जानकारी दिनुभयो ।

स्थानीयका अनुसार गाउँमै सस्तो, सहज र गुणस्तरीय स्वास्थ्य सेवा उपलब्ध भएपछि धेरै परिवारलाई राहत पुगेको छ । आर्थिक अभावका कारण उपचारबाट वञ्चित हुनुपर्ने अवस्थालाई कम गर्न यस्तो पहल प्रभावकारी बन्दै गएको उनीहरूको भनाइ छ ।

साथै हेल्पिङ ह्यान्ड र हेल्पिङ हार्ट को सहकार्यमा निःशुल्क स्वास्थ्य शिविरसमेत सञ्चालन भइरहेका छन् । ग्रामीण क्षेत्रमा स्वास्थ्य पहुँच विस्तार गर्ने लक्ष्यसहित अघि बढाइएको यो अभियान अहिले धेरैका लागि ‘स्वास्थ्यको आशा’ बनेर उभिएको छ ।

23/05/2026

बारामा बैठकबाटै लखेटिए रास्वपाका सांसदहरु, प्रहरीले उद्धार गर्‍यो...
बैठकमा भागाभाग भएको छ। रहबर अंसारी लगायतका नेताहरुलाई प्रहरीले सुरक्षित हटाएका छन।

(भिडियो साभार सामाजिक सञ्जाल बाट)

22/05/2026

प्रदेश सभामा विश्वासको मतको पक्षमा नेपाली कांग्रेस संसदीय दलका उपनेता तथा प्रदेशसभा सदस्य वीरेन्द्र प्रसाद सिंहको धारणा।विश्वासको मतमाथि आफ्नो भनाइ राख्दै प्रदेश सभामा सम्बोधन।

19/05/2026

मधेशमा ‘परिवर्तनको आवाज’ परियोजना शुभारम्भ
कला, पहिचान र सिर्जनशीलतामार्फत युवाको भविष्य निर्माणमा जोड
जनकपुरधाम ।
एफसीए नेपाल, दलित लाइभ्स म्याटर ग्लोबल अलायन्स र शान्ता फाउण्डेशनको साझेदारीमा सञ्चालन हुने ‘परिवर्तनको आवाजः सिर्जनशीलता, पहिचान र अभियानमार्फत भविष्य निर्माण’ परियोजनाको मधेश प्रदेशस्तरीय शुभारम्भ कार्यक्रम जनकपुरधाममा सम्पन्न भएको छ ।
युरोपेली संघको ७ लाख युरो सहयोगमा सञ्चालित उक्त परियोजनाले नेपालको सांस्कृतिक तथा सिर्जनात्मक क्षेत्रमा संलग्न महिला, दलित, आदिवासी जनजाति तथा यौनिक एवं लैङ्गिक अल्पसंख्यक समुदायका युवालाई अवसर, स्रोत र सुरक्षित कार्य वातावरण उपलब्ध गराउने लक्ष्य लिएको आयोजकले जनाएको छ ।
परियोजनाले काठमाडौं उपत्यकासहित मधेश र सुदूरपश्चिम प्रदेशमा कला, साहित्य तथा शिल्प क्षेत्रमा सक्रिय युवाहरूलाई आत्मनिर्भर बनाउँदै समग्र सांस्कृतिक तथा सिर्जनशील क्षेत्रको प्रवद्र्धनमा योगदान पुर्याउने अपेक्षा गरिएको छ ।
कार्यक्रममा प्रदेश सरकार, स्थानीय तह, नागरिक समाज, कलाकार, युवा समूह, सञ्चारकर्मी तथा सांस्कृतिक क्षेत्रमा कार्यरत विभिन्न सरोकारवालाको सहभागिता रहेको थियो । सहभागी युवा कलाकारहरूले नेपालको सिर्जनात्मक क्षेत्रलाई रोजगारी, सामाजिक रूपान्तरण र पहिचानको माध्यमका रूपमा विकास गर्न आवश्यक सहकार्य र लगानी बढाउनुपर्ने धारणा राखेका थिए ।
कार्यक्रमका प्रमुख अतिथि राम अशिष यादवले ‘परिवर्तनको आवाज’ परियोजना संघीय लोकतान्त्रिक गणतन्त्रलाई संस्थागत गर्ने ऐतिहासिक यात्रामा महत्वपूर्ण पहल भएको बताए । उनले संविधान संशोधनको वर्तमान बहससँग पनि परियोजना सान्दर्भिक रहेको उल्लेख गरे ।
त्यसैगरी, रीता मिश्रले परियोजनालाई स्थानीय तहको तर्फबाट स्वागत गर्दै कार्यक्रम अवधिभर आवश्यक सहयोग रहने प्रतिबद्धता व्यक्त गरिन् ।
राम भरोस कापडीले परियोजनामार्फत समावेशिता र पहुँचका सवाललाई थप सशक्त रूपमा उठाउन सकिने विश्वास व्यक्त गरे । उनले मधेश प्रदेशमा परियोजनाको सफल कार्यान्वयनले सांस्कृतिक क्षेत्रलाई नयाँ ऊर्जा दिने अपेक्षा राखे ।
कार्यक्रमको अन्त्यमा नेपालमा समावेशी, सुरक्षित र दिगो सांस्कृतिक तथा सिर्जनात्मक क्षेत्र निर्माणका लागि सरकार, नागरिक समाज, युवा तथा समुदायबीच सहकार्य आवश्यक रहेको साझा प्रतिबद्धता व्यक्त गरिएको थियो ।

18/05/2026

प्रधान न्यायाधीश सिफारिससम्बन्धी विवादले सर्वोच्च अदालतभित्रै असामान्य अवस्था सिर्जना गरेको छ। कामु प्रधान न्यायाधीश सपना प्रधान मल्लले रिट निवेदन दर्ता गर्न आदेश दिएपछि सर्वोच्च अदालत प्रशासनका कर्मचारीहरू कार्यकक्ष छाडेर हिँडेको बताइएको छ।

नेपाल प्रेसअनलाइनमा प्रकाशित समाचारका अनुसार, कामु प्रधान न्यायाधीश मल्लले अदालत प्रशासनले रिट दर्ता नगरी न्याय प्राप्तिको बाटो अवरोध गरेको ठहर गर्दै आइतबार दिउँसो १ बजेसम्म सबै निवेदन दर्ता गरी भोलिका लागि पेशी तोक्न आदेश दिएकी थिइन्। त्यसलगत्तै सर्वोच्च प्रशासनका प्रमुख कर्मचारीहरूले कार्यालय छाडेको स्रोतले जनाएको छ।

घटनापछि सर्वोच्च अदालत परिसर तनावग्रस्त बनेको छ। आदेशको विरोधमा केही कानुन व्यवसायीहरूले प्रदर्शनको तयारी गरिरहेको जानकारीसमेत सार्वजनिक भएको छ।

चौथो वरीयताका न्यायाधीश डा. मनोजकुमार शर्मालाई प्रधान न्यायाधीश सिफारिस गरिएको विषयविरुद्ध दायर रिट सर्वोच्च प्रशासनले दर्ता गर्न अस्वीकार गरेपछि कानुन व्यवसायीहरूले गुनासो गरेका थिए।

सर्वोच्चको आदेशमा संवैधानिक प्रावधानअनुसार दायर गरिएका निवेदन तथा दरपीठविरुद्धका निवेदनलाई मुख्य रजिष्ट्रार र रजिष्ट्रारले अलमल्याउन खोजेको उल्लेख गरिएको छ। आदेशमा यस्तो कार्य न्यायपालिकाको स्वच्छता, निष्पक्षता र स्वतन्त्रतामाथिको अकर्मण्यता भएको टिप्पणी गरिएको छ।

त्यस्तै, मुख्य रजिष्ट्रारसँग ध्यानाकर्षण गराउँदा “प्रधान न्यायाधीशमा सिफारिस भएका माननीय न्यायाधीशकै निर्देशनमा निवेदन दर्ता नगरिएको” भन्ने जवाफ आएको उल्लेख गर्दै आदेशमा न्याय प्रशासनलाई प्रभावकारी बनाउने अन्तिम जिम्मेवारी प्रधानन्यायाधीशकै हुने स्मरण गराइएको छ।

प्रधान न्यायाधीश नियुक्ति प्रक्रियासँग जोडिएको यो विवादले अहिले न्यायपालिका, कानुन व्यवसायी र राजनीतिक वृत्तमा व्यापक बहस सिर्जना गरेको छ। सर्वोच्च अदालतभित्रै देखिएको असन्तुष्टि र प्रशासनिक अव्यवस्थाले न्यायालयको विश्वसनीयतामाथि समेत प्रश्न उठ्न थालेको छ।

18/05/2026

रवि लामिछाने नेतृत्वको राष्ट्रिय स्वतन्त्र पार्टी (रास्वपा) का सांसद कृष्णकुमार कार्कीमाथि एक विदेशी युवतीलाई गर्भवती बनाएर बेवास्ता गरेको गम्भीर आरोप लागेको छ। मोरङ निर्वाचन क्षेत्र नम्बर २ बाट निर्वाचित सांसद कार्कीले नाइजेरियन नागरिक २६ वर्षीया रिता अजुकोसँग लिभिङ रिलेसनमा बसेपछि गर्भवती बनाएर सम्पर्कविहीन भएको दाबी गरिएको हो।

जनआस्थाले प्रकाशित गरेको समाचार अनुसार, ठमेल क्षेत्रमा बस्दै आएकी अजुकोले आफू अहिले आर्थिक र मानसिक समस्यामा परेको बताएकी छन्। गर्भवती भएपछि कार्कीले सम्पर्क गर्न छोडेको र अहिले खाने खर्चसमेत जुटाउन कठिन भएको उनको गुनासो छ।

अजुकोका अनुसार उनीहरूबीच लामो समयदेखि सम्बन्ध थियो। गर्भ रहेको थाहा पाएपछि उनले गर्भपतन गर्ने कुरा उठाएकी थिइन्। तर, कार्कीले विभिन्न भावनात्मक सन्देश पठाएर बच्चा नराख्ने निर्णयबाट पछि हटाएको उनको दाबी छ।

‘यस्तो कुरा नगर, मलाई रुन मन लाग्छ’, ‘म धेरै खुशी छु, म बुवा बन्न लागेको छु’ जस्ता म्यासेजहरू कार्कीले पठाएको बताइएको छ। उनीहरूले सँगै बिताएका भिडियोहरू, ड्राइभिङ सिकाएको दृश्य तथा ‘माई वाइफ’, ‘माई लाइफ’, ‘माई लभ’ लेखिएका म्यासेजहरू पनि सार्वजनिक भएको जनाइएको छ।

अस्पतालमा समेत पतिको नाम कृष्ण कार्की उल्लेख गरिएको बताइन्छ। तर, अजुकोको गर्भ बढ्दै गएपछि कार्की टाढिन थालेको र फोन तथा म्यासेजको जवाफ दिन छोडेको आरोप छ। अहिले डेलिभरी नजिकिँदै जाँदा आफ्नो र बच्चाको भविष्यलाई लिएर उनी तनावमा रहेको बताइएको छ।

क्षेत्रपाटी फ्रि क्लिनिकमा उपचार गराइरहेकी अजुकोले बच्चाको पालनपोषणको जिम्मेवारी कार्कीले लिनुपर्ने माग गरेकी छन्। यस विषयमा प्रतिक्रिया लिन खोज्दा सांसद कार्कीले आफू बैठकमा रहेको भन्दै तत्काल बोल्न नमानेका थिए।

कार्की यसअघि पनि विवादित गतिविधिका कारण चर्चामा आएका व्यक्ति हुन्। भदौ २३ र २४ गते भएको जेनजी प्रदर्शनका क्रममा सिंहदरबार क्षेत्रमा भएको प्रदर्शनमा उनको सहभागिता चर्चामा आएको थियो। सामाजिक सञ्जालमा उनी अर्धनग्न अवस्थामा प्रदर्शन गरेको भिडियो र तस्वीर भाइरल बनेका थिए।

त्यस्तै, उनीमाथि विगतमा गुण्डा नाइके दिनेश अधिकारी ‘चरी’ समूहसँग निकट रहेको आरोपसमेत लाग्दै आएको छ। लामो समय जापान बसेर नेपाल फर्किएका कार्की फागुन २१ गते सम्पन्न प्रतिनिधिसभा निर्वाचनमा रास्वपाबाट निर्वाचित भएका थिए।

संसद बैठक चलिरहेकै बेला सार्वजनिक भएको यो प्रकरणले रास्वपामाथि पुनः नैतिक र राजनीतिक प्रश्न खडा गरेको छ। पुराना दलभन्दा आफू फरक रहेको दाबी गर्दै आएको पार्टीका सांसदमाथि यस्तो आरोप सार्वजनिक भएपछि सामाजिक सञ्जालदेखि राजनीतिक वृत्तसम्म व्यापक चर्चा सुरु भएको छ।

17/05/2026

विश्व उच्चरक्तचाप दिवसमा जनकपुरधाममा प्रभातफेरी तथा स्वास्थ्य परीक्षण
जनकपुरधाम । विश्व उच्चरक्तचाप दिवसको अवसरमा जनकपुरधामस्थित जनक मन्दिर परिसरमा प्रभातफेरी कार्यक्रम तथा निःशुल्क स्वास्थ्य परीक्षण कार्यक्रम सम्पन्न गरिएको छ ।
लायन्स क्लब अफ जनकपुरधामको आयोजनामा सम्पन्न कार्यक्रममा उच्च रक्तचाप सम्बन्धी जनचेतना फैलाउने उद्देश्यले प्रभातफेरी निकालिनुका साथै ब्लड प्रेसर तथा युरिन प्रोटिन सम्बन्धी जाँच गरिएको थियो । करिब १०० जना लाभान्वित भएको आयोजकले जनाएको छ ।
कार्यक्रममा लायन्स क्लब अफ जनकपुरधाम तथा लियो क्लब क्यापिटलको समेत सहकार्य रहेको थियो ।लायन्स क्लब अफ जनकपुरधामका अध्यक्ष तथा मुटुरोग विशेषज्ञ डाक्टर राजेश साहले उच्च रक्तचाप समयमै पहिचान र नियन्त्रण गर्न सके जटिल रोगबाट बच्न सकिने बताउँदै नियमित स्वास्थ्य परीक्षण आवश्यक रहेको उल्लेख गर्नुभयो ।
जनस्वास्थ्यप्रति सचेतना अभिवृद्धि गर्ने उद्देश्यले आयोजना गरिएको उक्त कार्यक्रमप्रति सहभागीहरूले सकारात्मक प्रतिक्रिया दिएका थिए ।

17/05/2026

मधेश प्रदेश सभाको बैठकमा बिरेन्द्र प्रसाद सिंह ले वर्तमान राजनीतिक तथा जनजीवनको अवस्थाबारे धारणा राख्नुभएको छ । नेपाली कांग्रेस संसदीय दलका उपनेता समेत रहेका सिंहले बढ्दो महँगीका कारण जनताको भान्सा नै बन्द हुने अवस्था सिर्जना भइरहेको बताउँदै सरकार जनताको समस्या समाधानतर्फ गम्भीर नभएको आरोप लगाउनुभयो ।
उहाँले महँगी नियन्त्रण र जनजीविकाको सुरक्षामा ध्यान दिनुको सट्टा गरिबका घरमा डोजर चलाउने काम भइरहेको भन्दै सरकारको कार्यशैलीप्रति असन्तुष्टि व्यक्त गर्नुभयो ।

17/05/2026

जनकपुरधाममा संस्थागत विद्यालय छात्रवृत्ति प्रवेश परीक्षाको अनुगमन

जनकपुरधाम।जनकपुरधाम उपमहानगरपालिका द्वारा संस्थागत विद्यालयमा अध्ययनरत विद्यार्थीहरूका लागि प्रदान गरिने निःशुल्क छात्रवृत्ति प्रवेश परीक्षाको अनुगमन गरिएको छ ।

नगर प्रमुख मनोज कुमार साह सहित शिक्षा, युवा तथा खेलकुद विकास शाखाको टोलीले विभिन्न विद्यालयमा पुगेर परीक्षा व्यवस्थापन तथा सञ्चालन अवस्थाको निरीक्षण गरेको हो ।
उपमहानगरपालिकाले कक्षा १ देखि १० सम्म अध्ययनरत विद्यार्थीहरूका लागि “संस्थागत विद्यालय छात्रवृत्ति वितरण कार्यविधि–२०८१” अनुसार छात्रवृत्ति प्रक्रिया अघि बढाइएको जनाएको छ ।
नगर प्रमुख साहका अनुसार विद्यार्थीहरूले निष्पक्ष र व्यवस्थित रूपमा परीक्षा दिन सकून् भन्ने उद्देश्यले अनुगमन गरिएको हो ।
आइतबार बिहान ८ बजेदेखि सम्बन्धित विद्यालयमै सञ्चालन गरिएको प्रवेश परीक्षामा सहभागी विद्यार्थीहरूको उपस्थिती तथा परीक्षा व्यवस्थापनको अवस्थाबारे अनुगमन गरिएको शिक्षा समितिका सदस्य तथा एन–प्याब्सन जनकपुर का नगर अध्यक्ष दिपक ठाकुर ले जानकारी दिनुभयो ।
उपमहानगरपालिकाका अनुसार छात्रवृत्ति प्रवेश परीक्षाको नतिजा आगामी जेठ ७ गते प्रकाशन गरिनेछ ।

15/05/2026

मधेशका युवालाई सीप, नेतृत्व र अवसरसँग जोड्ने “रंग प्रोजेक्ट” शुभारम्भ

जनकपुरधाम ।मधेश प्रदेशका युवाहरूलाई सीप, नेतृत्व, रोजगारी र सामाजिक सहभागितासँग जोड्ने उद्देश्यले “RANGA Project” को औपचारिक शुभारम्भ जनकपुरधाममा सम्पन्न भएको छ।
Debate Network Nepal (DNN) को नेतृत्वमा सञ्चालन हुने उक्त परियोजनाको उद्घाटन जनकपुरधामस्थित होटल वेलकम, शिव चोकमा गरिएको हो। युरोपियन कमिसनको सहयोगमा सञ्चालन हुने यस राष्ट्रियस्तरको कार्यक्रममा Mandala Theatre Nepal आवेदक संस्था तथा Campaign for Change (CfC) र DNN सहकार्य संस्थाका रूपमा रहेका छन्।
“Inception Meeting and Needs, Risks and Opportunities Assessment” शीर्षकमा आयोजित कार्यक्रममा सरकारी निकाय, स्थानीय तह, गैरसरकारी संस्था, शैक्षिक संस्था, युवा सञ्जाल तथा विभिन्न सरोकारवालाहरूको उल्लेखनीय सहभागिता रहेको थियो।
परियोजनाअन्तर्गत विद्यालय तथा समुदायस्तरमा डिबेट र ड्रामा क्लब गठन, नेतृत्व विकास तथा सार्वजनिक वक्तृत्व तालिम, बहस प्रतियोगिता, नाटक प्रस्तुति तथा सामाजिक समावेशीता, सुशासन, लैङ्गिक समानता र अधिकारसम्बन्धी संवाद कार्यक्रम सञ्चालन गरिने जानकारी दिइएको छ।
विशेषगरी महिला, दलित, आदिवासी–जनजाति, अपाङ्गता भएका युवा तथा LGBTQI समुदायका युवाहरूको अर्थपूर्ण सहभागिता सुनिश्चित गर्दै कार्यक्रम मधेश प्रदेशभर सञ्चालन गरिने आयोजकले जनाएको छ।
कार्यक्रममा रंग परियोजनाकी प्रदेश संयोजक सीमा कुमारी शाह, राष्ट्रिय संयोजक दीक्षा नकर्मी तथा डिबेट नेटवर्क नेपालका प्रबन्ध निर्देशक पियुष पन्तलगायतको उपस्थिति रहेको थियो।

Mithila Pati

27/05/2026

26/05/2026

23/05/2026

22/05/2026

19/05/2026

18/05/2026

18/05/2026

17/05/2026

17/05/2026

17/05/2026

15/05/2026

Address

Website

Alerts

Contact The Business

Shortcuts

Share

Category