17/07/2025
उपसचिव सुरेश प्रसाद शर्माको सेवा निवृत्तिमा जनकपुरधाम वन प्राविधिक समाजद्वारा शुभकामना कार्यक्रम सम्पन्न
जनकपुरधाम — वन प्रशासन सेवामा लामो समयसम्म समर्पित जीवन बिताएका उपसचिव सुरेश प्रसाद शर्माको सेवा निवृत्तिको अवसरमा जनकपुरधाम वन प्राविधिक समाजले सेवानिवृत्त जीवनको कामना गर्दै एक शुभकामना कार्यक्रम आयोजना गरेको छ।
शर्माले वि.सं. २०४५ साल वैशाख ५ गते जिल्ला वन कार्यालय गुल्मीमा सहायक रेन्जर पदबाट आफ्नो सरकारी सेवा सुरु गर्नुभएको थियो। उहाँले स्याङ्जा, प्युठान, उदयपुर, वन विभाग, मधेश प्रदेशअन्तर्गत वन तथा वातावरण मन्त्रालय, डिभिजन वन कार्यालय धनुषा हुँदै अन्ततः प्रदेश निर्देशनालयमा उपसचिव पदमा रही वि.सं. 2082 साल साउन २ गते ५८ वर्षे उमेरहदका आधारमा सेवा निवृत्त हुन लाग्नु भएका छन।
शर्मा एक कुशल वन प्राविधिक मात्र नभई सक्रिय सामाजिक कार्यकर्ता पनि हुनुहुन्छ। उहाँले जनकपुरधामको गंगासागर, दूधमती र गेरुका नदी सरसफाइ अभियान तथा पिपल वृक्षारोपण जस्ता सामाजिक कार्यमा नेतृत्वदायी भूमिका निर्वाह गर्दै आउनुभएको छ। हाल उहाँ जनकपुरधाम वन प्राविधिक समाजको महासचिवका रूपमा क्रियाशील हुनुहुन्छ।
शुभकामना कार्यक्रममा वक्ताहरूले शर्माको सेवा अवधिभरको योगदानको स्मरण गर्दै उहाँको सरलता, इमान्दारिता र कार्यप्रतिको समर्पणको प्रशंसा गरे। कार्यक्रममा सहभागीहरूले उहाँको आगामी जीवन सुख, स्वास्थ्य र समृद्धिपूर्ण होस् भन्ने शुभकामना व्यक्त गरे।
कार्यक्रममा वन प्राविधिक समाजका पदाधिकारी, वन कर्मचारीहरू, सामाजिक अभियन्ता तथा शुभेच्छुकहरूको उल्लेखनीय उपस्थिति रहेको थियो।
