07/09/2026
खैरो हेरोइनजस्तो पदार्थसहित दुई जना पक्राउ :
धनुषामा प्रहरीले खैरो हेरोइनजस्तो देखिने १९७ ग्राम ४४० मिलिग्राम लागुऔषधसहित दुई जनालाई मोटरसाइकलसहित नियन्त्रणमा लिएको छ। विशेष सूचनाका आधारमा लागुऔषध नियन्त्रण ब्युरो, कोटेश्वरको शाखा कार्यालय बर्दिवास, महोत्तरी र इलाका प्रहरी कार्यालय महेन्द्रनगर, धनुषाबाट खटिएको संयुक्त प्रहरी टोलीले उनीहरूलाई नियन्त्रणमा लिएको हो।
प्रहरीका अनुसार बुधबार २०८३/०५/२२ गते बिहान करिब ९ः४५ बजे मिथिला नगरपालिका–२, नक्टाझिझस्थित जनकपुर–ढल्केवर सडकखण्डमा जनकपुरबाट ढल्केवरतर्फ जाँदै गरेको ज ९ प ५६९७ नम्बरको मोटरसाइकल शंकास्पद रूपमा जाँच गरिएको थियो। जाँचका क्रममा मोटरसाइकलको पछाडि सवार भारतको मधुवनी जिल्ला, कमलावारी पुरी–१३ का करिब २७ वर्षीय संजित कुमार रामको साथमा रहेको कालो प्लास्टिकको झोलाबाट खैरो हेरोइनजस्तो देखिने पदार्थ फेला परेको प्रहरीले जनाएको छ।
बरामद पदार्थ तौल गर्दा १९७ ग्राम ४४० मिलिग्राम रहेको खुलेको प्रहरीले जनाएको छ। प्रहरीले मोटरसाइकल चालक धनुषाको सबैला नगरपालिका–१०, खरियानी टोलका करिब ३४ वर्षीय राकेश चमार र संजित कुमार रामलाई मोटरसाइकलसहित नियन्त्रणमा लिएको छ। घटनाबारे इलाका प्रहरी कार्यालय महेन्द्रनगर, धनुषाबाट थप अनुसन्धान भइरहेको जिल्ला प्रहरी कार्यालयले जनाएको छ।
District Police Office Dhanusha, Janakpur
