16/05/2026
संविधान संशोधनमा ‘डाइरेक्टर’ नियुक्तिप्रति प्रश्न, मिराज ढुंगानाको प्रधानमन्त्रीलाई खुलापत्र
संविधान संशोधन प्रक्रियामा संलग्न एक ‘डाइरेक्टर’को नियुक्तिलाई लिएर जेन–जी अभियन्ता मिराज ढुंगानाले प्रधानमन्त्रीलाई खुलापत्र लेख्दै पारदर्शिता र योग्यता आधारित नियुक्तिको माग गरेका छन्।
ढुंगानाले सामाजिक सञ्जालमार्फत सार्वजनिक गरेको पत्रमा संविधान संशोधनजस्तो संवेदनशील विषयमा नियुक्त व्यक्ति संविधानविद् वा अनुभवी विज्ञ भए त्यसको अनुभव र CV सार्वजनिक गर्न आग्रह गरेका छन्। उनले “यदि उहाँ संविधान संशोधन गर्न संविधानविद् भन्दा पनि क्षमतावान र विज्ञ हो भने अनुभव र योग्यता सार्वजनिक गरियोस्, हामीलाई कुनै आपत्ति हुँदैन,” भन्दै लेखेका छन्।
तर योग्यता पुष्टि नभए नियुक्ति प्रधानमन्त्रीको निकट सम्बन्धका आधारमा गरिएको हो भने त्यसलाई स्पष्ट रूपमा स्वीकार गर्नुपर्ने उनको माग छ। “हामीले खोजेको पारदर्शिता हो,” उनले उल्लेख गरेका छन्।
ढुंगानाले वर्तमान सरकारमाथि नेपोटिजम अन्त्य गर्ने अपेक्षा गरिएको बेला फेरि ‘आफ्ना मान्छे’लाई अवसर दिने प्रवृत्ति दोहोरिएको आरोपसमेत लगाएका छन्। उनले “नेपोटिजम हटाएर फेरि नेपोटिजम ल्याउने जनताको चाहना होइन,” भन्दै संविधानलाई कुनै फिल्म वा व्यक्तिगत सम्पत्ति जस्तो व्यवहार गर्न नहुने चेतावनी दिएका छन्।
उनले संविधान देशको सर्वोच्च कानुन भएकाले नियुक्ति मित्रता वा पहुँचका आधारमा नभई क्षमता, विज्ञता र योग्यताका आधारमा हुनुपर्ने बताएका छन्।
