22/07/2025
शेयर बजारमा कीर्तिमानी उछालः नेप्से ८१ अंकले बढ्यो, कारोबार २० अर्ब नाघ्यो
मंगलबार शेयर बजारमा दोहोरो अंकको उत्साहजनक वृद्धि देखिएको छ। लगातार पाँचौँ दिन उकालो लागेको बजारमा नेप्से परिसूचक करिब ८१ अंकले बढेको छ भने कारोबार रकमले पनि २० अर्ब रुपैयाँको आँकडा पार गरेको छ।
आज नेप्से परिसूचक ८०.९७ अंकले बढेर २९७३.७० को विन्दुमा पुगेको छ। नेप्सेको वृद्धिले सेन्सेटिभ, फ्लोट र सेन्सेटिभ फ्लोट सबै इण्डेक्सहरूमा पनि सकारात्मक प्रभाव परेको छ।
बजार बढेसँगै कारोबार रकममा पनि उल्लेख्य वृद्धि भएको छ। सोमबार १६ अर्ब ३२ करोडको कारोबार भएकोमा आज ३१९ कम्पनीको २० अर्ब ८ करोड रुपैयाँभन्दा बढीको शेयर खरिदबिक्री भयो।
आज तीनवटा कम्पनीको शेयर मूल्यमा सकारात्मक सर्किट लागेको छ। ट्रेड टावर, शिवम् सिमेन्ट्स र सान्भी इनर्जीको शेयरमूल्य १० प्रतिशतले बढेको हो। यस्तै, उन्नति सहकार्य लघुवित्त र विन्ध्यवासिनी हाइड्रोपावरको शेयरमूल्य पनि करिब १० प्रतिशतले नै बढेको छ।
कारोबार रकमका आधारमा नेपाल पुनर्बीमा कम्पनी अग्रस्थानमा रह्यो, जसको ७१ करोड ८८ लाख रुपैयाँ बराबरको शेयर किनबेच भयो। त्यसपछि क्रमशः शिवम् सिमेन्ट्स र हिमालयन रि-इन्स्योरेन्सको सर्वाधिक कारोबार भयो।
आज कारोबारमा आएका सबै १३ वटै उपसमूहका परिसूचक हरियाली बनेका छन्। सबैभन्दा बढी उत्पादन तथा प्रशोधन उपसमूहको परिसूचक ४.६३ प्रतिशतले बढ्यो भने जीवन बीमा, लघुवित्त, होटल तथा पर्यटन, र लगानी उपसमूहको परिसूचकमा पनि ३ प्रतिशतभन्दा माथिको वृद्धि देखियो।
