15/08/2025
इलामवासी कवि ऋजन मायालु युवावयमै सुन्दर गीत र गम्भीर कविता लेखेर लोकप्रियता कमाइसकेका स्रष्टा हुन् । वि.सं. २०७४ मै ‘चुचुरो अनि स्वास्नीमान्छेहरू’ प्रकाशित गरेर कविताको फाँटमा उत्रिएका कवि मायालु २०७६ मा प्रकाशित संयुक्त कविता–सङ्ग्रह ‘उज्यालोका मालीहरू’ मा आइपुग्दा कला र कथ्य दुवै हिसाबले एक परिपक्व र प्रतिभाशाली कविको रूपमा परिचित भए । उनका कवितामा नेपालको पूर्वीपहाडको प्रकृतिले सिञ्चित मृदु अभिव्यञ्जना पाइन्छ भने किराँत सभ्यता र संस्कृतिको अविछिन्न प्रवाह र सौन्दर्य उनका कविताको परिचायक गुण हो । युवा सर्जक हुनुका नाताले होला उनका कविताका प्रेम र प्रणयका मृदु उद्गार पनि बाक्लै भेटिन्छन्, यद्यपि परिवर्तशील समयको स्वर, सामाजिक विचलनप्रतिको विमत्ति र गाम्बेसीको माया उनका कविताको मूल स्वर हो । उनको तेस्रो कविता–सङ्ग्रह ‘घुम्ती बिक्रीमा छ’ पेज टर्नरबाट चाँडै नै प्रकाशित हुँदैछ । कृपया प्रतीक्षा गर्नुहोला ।
