20/10/2026
दशैँ–तिहारमा यात्रुको सुरक्षाका लागि प्रहरीको विशेष सुरक्षा योजना
दशैँ–तिहार मनाउन घर फर्किने यात्रुको यात्रा सुरक्षित बनाउन नेपाल प्रहरीले सवारीसाधनको जाँचदेखि राजमार्गका होटल तथा खाजा घरको अनुगमनसम्मलाई तीव्रता दिएको छ ।
प्रहरीले लामो दूरीका यात्रुवाहक गाडीका चालकले मादक पदार्थ वा लागूऔषध सेवन गरे–नगरेको परीक्षण गरिरहेको छ । साथै, चालक अनुमतिपत्र र सवारीसाधनको यान्त्रिक अवस्था जाँच गरी सम्भावित दुर्घटना रोक्ने प्रयास गरिएको छ ।
नेपाल प्रहरीका प्रवक्ता एवं प्रहरी नायव महानिरीक्षक अविनारायण काफ्लेले चाडपर्वका बेला प्रहरी कर्मचारीको नियमित बिदासमेत स्थगन गरी सुरक्षाकर्मी परिचालन गरिएको बताउनुभएको छ ।
यात्राका क्रममा ठगी हुन नदिन राजमार्गका होटल तथा खाजा घरमा पनि निगरानी बढाइएको छ । गुणस्तरहीन तथा मिसावटयुक्त खाना बिक्री गर्ने र बढी मूल्य असुल्ने गतिविधि नियन्त्रण गर्न सम्बन्धित सरकारी निकायसँगको समन्वयमा छड्के अनुगमन भइरहेको प्रहरीले जनाएको छ ।
