12/10/2025
ग्लोबल आईएमई बैंकका कर्मचारीको किर्ते धन्दा: आफ्नै श्रीमतिलाई दिन्छन् मासीक २ लाख
काठमाडौं । ग्लोबल आईएमई बैंक लिमिटेडका कर्मचारीले किर्ते धन्दा गर्दै आएको प्रमाण फेला परेको छ । बैंकका एक कर्मचारीले आफ्नै श्रीमतिका नाममा मासिक दुइ लाख रुपैयाँ निरन्तर रुपमा बैंकबाट निकासा गर्दै आएका छन् । उनको यस अवैध कार्यमा बैंकका अर्का कर्मचारीको समेत मिलेमतो रहेको पाईएको छ ।
बैंकका बजार प्रबन्धक प्रमुख तथा पब्लिक रिलेसन अफिसर योगेश पोखरेलले आफ्नै श्रीमतीको नाममा कम्पनी खडा गरी अनलाइन मिडियाका नाममा मासिक २ लाख भन्दा बढी रकम श्रीमतिलाई दिँदै आएका हुन् । पोखरेलले श्रीमती प्रभा पन्थिका नाममा थर्ड पोल मिडिया ग्रुप खडा गरेका छन् । उक्त कम्पनीले news polar. com संचालन गर्दै आएको छ । सोही कम्पनीलाई बैंकले मासिक २ लाख रुपैयाँ वितरण गर्दे आएको छ ।
निज पोखरेललाई कुनै पनि संस्था वा मिडिया कम्पनीलाई पचासहजार रुपैयाँ भन्दा माथिको विज्ञापन दिने अधिकार छैन । उनको यो कार्यमा बैंकका डेपुटी सिइओ सुमन पोख्रेलको पनि संलग्नता रहेको बताईएको छ । तर, पोखरेले यो बिषय लुकाउँदै मिथ्या भएको बताउने गरेका छन् ।
हामीले बैंकका सूचना अधिकारी समेत रहेका पोखरेललाई यस बिषयमा जानकारी गराएका छौँ। तर उनले पोखरेलका अवैध धन्दाबारे अनभिज्ञता देखाएर पन्छिए । साथै यस बिषयमा उनी आँफै संलग्नता रहेको भन्ने आरोपबारे बुझ्न खोज्दा उनले जवाफ दिन चाहेनन् । पोखरेलका अनियमिताबारे हामीले बैंकका अध्यक्ष चन्द्र ढकाललाइ समेत सोधेका छौँ, तर उनले पनि यस बिषयमा चासो देखाएनन्। त्यसो त पोखरेलले बैंकको तलबमा ढकालको व्यक्तिगत तथा निजी कम्पनीको काम गर्दै आएका छन्।
गुल्मी जिल्ला तम्घास -७ स्थायी घर भएकी प्रभा पन्थी थर्ड पोल मिडिया ग्रुपको सञ्चालक छिन्, जो निज पोखरेलकी श्रीमती हुन् । सो कम्पनी आफ्नो श्रीमतीको नभएको योगेशको भनाई छ । कम्पनीकी संचालक पन्थीलाई चिन्दै नचिनेको बताउने गरेका पोखरेलले प्रभा पन्थीका बुवा राममणी पन्थी र आमा भने आफ्ना सासु ससुरा भएको स्वीकार गरेका छन् । यधपी कम्पनी रजिस्टर कार्यालयबाट हामीलाई प्राप्त प्रमाणमा निज पन्थी नै सञ्चालक छिन् । पोखरेलकी श्रीमतीले बैंकमा खाता खोल्दा पेश गरेको नागरिकता नम्बर ४१३००१/४३ र कम्पनीमा रजिस्टर्ड भएको नम्बर उहि छ।
त्यसो, त योगेश पोखरेल आँफै नेपाल सरकारका कर्मचारी समेत हुन् । उनी गोरखापत्र संस्थानद्वारा प्रकाशित राइजिङ नेपालमा कार्यरत छन् । घुमाउरो् भाषामा उनले गोरखापत्र संस्थानमा पार्ट टाईम जागिर भएको स्वीकारेका छन् ।
यदी उनी सरकारी कर्मचारी हुन् भने यो वित्तीय अपराध भएको नेपाल राष्ट्र बैंकका प्रवक्ता किरण पण्डित बताउँछन् । उनी भन्छन् ‘यदि बैंकको कर्मचारीले यस किसिमको अपराध भएको छ भने यो सरसर अपराध हो । हामी यस बिषयमाथि अनुसन्धान गर्छौं, प्रमाणित भए कारबाही हुन्छ।’
यस सम्बन्धमा हामीले बैंकका गुनासो अधिकारी अनिल जोशीलाई पनि सोधेका छौँ । उनले सुरुमा त यस किसिमको क्रियाकलाप बैंकभित्र हुनै नसक्ने दावी गरे । तर, आँफू बैंकको गुनासो अधिकारी भएकाले प्रमाणसहित लिखित उजुरी दिन सुझाए । उनले भने– ‘बैंक भित्र पनि सबै कर्मचारी सहि हुँदैनन्। सबैका बिषयमा बुझ्दै हिंड्ने कुरा पनि भएन । यदि यो बिषय सत्य हो भने त्यस्ता कर्मचारीमाथि नियमअनुसार कारबाही हुन्छ ।’ यस किसिमको वित्तीय अपराध भएको भेटिए त्यस्ता कर्मचारीलाई निलम्बन समेत गर्ने जोशीले बताएका छन् ।
