05/05/2025
सोच र सङ्कल्पले बदलिन्छ जीवन
कमल पन्थी
आजबाट संकल्प गरौं कि मेरो जीवन अब पूरै बदलावको बाटोमा छ । आफैंलाई धन्यवाद दिउँ किनकि मैले आफू भित्रका अनेक सम्भावनाहरुलाई खोजी गर्न शुरुवात गरेको छु । आफैंसँग संकल्प गरौं कि आजबाट मेरो सोच्ने तरिका बिस्तारै–बिस्तारै बदलिँदै जानेछ । धेरै ठूलो क्रान्तिको यहाँ जरुरत छैन, छ त केवल आफ्नै सोच, विचार, दृष्टिकोण र विश्वासमा स–साना बदलाव ल्याउन जरुरत छ । ठूलो बदलाव गर्नु छ भने धेरै केही गर्नै पर्दैन, मात्रै यति गरे पुग्छ । समस्या पनि यहीँनेर छ । किनकि समस्या त यो भयो कि आफू बदलिनमा बदल्न तयार नै भएनौं, तैपनि परिवर्तनको रटानलाई हामीले कहिल्यैपनि गुन्जाउन छोडेका छैनौं ।
बाहिरी दुनियाँ त धेरै नै बदलिईसक्यो, अब बाँकी छ आफ्नै मानसिकतामा बदलाव ल्याउन । जुन काम बाहिरी दुनियाँ जस्तो दबाब र सङ्घर्षबाट पूरा हुनै सक्दैन । आफ्नै मानसिकता, विवेक र स्वअनुशासनबाट मात्रै सम्भव हुनेछ । यसकारण हामी आफ्ना लक्षित उपलब्धि हासिल गर्नको लागि निरन्तर प्रयत्न नै गर्नैपर्नेछ, तर जे गर्नुपर्नेछ, त्यो प्रयत्न दबाबमा होइन, प्रभावमा होइन, सङ्घर्षमा होइन, आनन्दपूर्वक गर्नुपर्नेछ । जहाँ–जहाँ बदलाव ल्याउनुपर्नेछ, केही कामहरुलाई क्रमिक रुपमा बढाउने प्रण (दृढनिश्चय) गरौं ।
जसरी हामीले धेरै टाढाको यात्रामा पुग्नुछ भने दौडिएर पुग्ने प्रयत्न गर्दैनौं, किनकि हामी तत्कालै थाकिहाल्नेछौं । बरु बिस्तारै–बिस्तारै यात्रालाई अघि बढाउँछौं । यात्राको क्रममा निश्चित दूरी वा भञ्ज्याङ चौतारी, कुवामा पुग्दा थकाई मेटाउँछौं, पानी पिउँछौं, आफैंलाई स–साना पुरष्कार दिने प्रयत्न गर्छौं, यसबाट हामीले नयाँ ऊर्जा अर्थात् पुनर्ताजगी प्राप्त गर्छौं । धेरै टाढाको गञ्तव्यमा पुग्नका लागि स–साना गञ्तव्यहरु तय गर्छौं, त्यसरी नै जिन्दगीको यात्रामा अघि बढ्ने क्रममा पनि आफूलाई विचलित नबनाउँ ।
क्रमशः
शुभ दिन ।
