16/10/2025
प्रहरीको प्रारम्भिक अनुसन्धानले पछिल्लो जेन–जी आन्दोलन भड्काउने मुख्य भूमिका ‘टिब्बटेन ओरिजिनल ब्लड’ (टिओबी) नामक समूहको रहेको देखाएको छ। यस समूहका सदस्यहरूले रेडियो सेटमार्फत आन्दोलन समन्वय गरेको र भीडलाई हिंसात्मक ढङ्गले उक्साएको प्रहरीको भनाइ छ।
जिल्ला प्रहरी परिसर काठमाडौंका प्रमुख एसएसपी रमेश थापाका अनुसार, टिओबी अंकित ज्याकेट र टी–सर्ट लगाएका बाइक राइडरहरू आन्दोलनका विभिन्न स्थानमा घुम्दै भिडलाई भड्काउने गतिविधिमा सक्रिय देखिएका छन्। प्रहरीको फेला परेको भिडियो फुटेज अनुसार, ती युवाहरूले बिजुलीबजारको आर्कब्रिजबाट मोटरसाइकलमा हुंइकिँदै नयाँबानेश्वरतर्फ अघि बढेका थिए। त्यसपछि आन्दोलन शान्त अवस्थाबाट आक्रामक रूपमा रूपान्तरित भएको देखिन्छ।
