29/07/2026
वीरगञ्जस्थित नारायणी अस्पतालमा चिकित्सक तथा स्वास्थ्यकर्मीमाथि भएको हातपात र अस्पताल तोडफोडको विरोधमा चिकित्सकहरू आन्दोलनमा उत्रिएका छन्।
नेपाल चिकित्सक सङ्घको आह्वानमा बुधबार देशभरका सरकारी तथा निजी अस्पतालमा आकस्मिक बाहेकका सबै स्वास्थ्य सेवा बन्द गरिएको छ। सोही क्रममा चिकित्सकहरूले काठमाडौंको माइतीघर मण्डलामा विरोध प्रदर्शन गर्दै दोषीमाथि तत्काल कानुनी कारबाहीको माग गरेका छन्।
सङ्घका अध्यक्ष डा. बद्री रिजालले घटना भएको पाँच दिन बितिसक्दा पनि दोषीहरू पक्राउ नपरेको र न्याय माग्न गएका चिकित्सकमाथि नै दुर्व्यवहार भएको आरोप लगाए। सरकारले घटनालाई गम्भीर रूपमा नलिएको भन्दै आन्दोलन गर्न बाध्य भएको उनको भनाइ छ।
उनले चिकित्सकको सुरक्षाको ग्यारेन्टी गर्दै दोषीमाथि तत्काल कारबाही गरिए आन्दोलनका सबै कार्यक्रम फिर्ता लिन तयार रहेको बताए।
नेपाल चिकित्सक सङ्घले चिकित्सक र स्वास्थ्यकर्मी सुरक्षित वातावरणमा काम गर्न पाउने अधिकार सुनिश्चित गर्न सरकारसँग माग गरेको छ।
