National Tv

30/08/2026

पहिचान नखुलेका शव सामूहिक रूपमा गाड्ने निर्णयप्रति विनय जंग बस्नेतको आपत्ति

रसुवाको भोटेकोशी बाढीमा परी चितवनसम्म बगाएर ल्याइएका पहिचान नखुलेका शवलाई जमिनमुनि व्यवस्थापन गर्ने निर्णयप्रति लामो समयदेखि बेवारिसे शवको सद्गत गर्दै आएका विनय जंग बस्नेतले आपत्ति जनाएका छन्।

शनिबार चितवन पुगेका बस्नेतले पहिचान नखुलेका शवलाई सामूहिक रूपमा गाड्नुको सट्टा परम्पराअनुसार सम्मानपूर्वक दाहसंस्कार गर्न आफू र आफ्नो टोली तयार रहेको बताएका छन्।

उनले प्रहरीको आवश्यक प्रक्रिया पूरा भइसकेका शवलाई देवघाट वा सम्बन्धित घाटमा लगेर दाहसंस्कार गर्न आफूहरूलाई अनुमति दिन आग्रह गरे।

बस्नेतका अनुसार उनले विगत १७ वर्षदेखि बेवारिसे तथा पहिचान नखुलेका शवको सद्गत गर्दै आएका छन्। उनका अनुसार हालसम्म ५४ जिल्लाका शाखामार्फत ७ हजार ७८१ शवको सद्गत गरिएको छ।

उनले भविष्यमा डीएनए परीक्षणबाट शवको पहिचान खुलेमा आफन्तलाई समस्या पर्न सक्ने भन्दै सबै शवको डीएनए परीक्षण, अभिलेखीकरण र पहिचान प्रक्रिया पूरा गरेर मात्र अन्तिम व्यवस्थापन गर्नुपर्नेमा जोड दिएका छन्।

“मान्छेको मृत्यु भएपछि उसले पाउनुपर्ने सद्गत पाउनुपर्छ। मृत्यु भएपछि सम्मानपूर्वक अन्तिम संस्कार हुनुपर्छ।”

30/08/2026

30/08/2026

त्रिशूलीमा जलसतह खतराको तहभन्दा ३ मिटर माथि, तटीय क्षेत्रमा उच्च सतर्कता

पछिल्लो भारी वर्षापछि त्रिशूली नदीमा जलसतह खतराको तहभन्दा ३ मिटर माथि पुगेको छ। धादिङस्थित जलमापन केन्द्रमा जलसतह तीव्र रूपमा बढेको जल तथा मौसम विज्ञान विभागको बाढी पूर्वानुमान महाशाखाले जनाएको छ।

रसुवाको भोटेकोशी क्षेत्रमा आएको बाढीका कारण त्रिशूलीमा पानीको बहाव बढेको बताइएको छ। साथै गण्डकी प्रदेशका विभिन्न जलाधार क्षेत्रमा भारी वर्षा भएकाले नारायणी नदी र सहायक नदीहरूमा समेत जलसतह थप बढ्न सक्ने चेतावनी दिइएको छ।

यस्तै, सिन्धुलीको खुर्कोटस्थित सुनकोशी नदीले पनि सतर्कता तह पार गरेको महाशाखाले जनाएको छ।

नदी किनार, तटीय बस्ती तथा जोखिमयुक्त क्षेत्रमा रहेका नागरिकलाई उच्च सतर्कता अपनाउन, सुरक्षित स्थानमा रहन र नदीको बहाव नजिक नजान आग्रह गरिएको छ।

सतर्क रहौँ, सुरक्षित रहौँ।

#बाढी #सतर्कता

30/08/2026

दुःखद खबर : बाढीमा बेपत्ता सुन्दरी श्रेष्ठको निधन पुष्टि

रसुवाको भोटेकोशीमा आएको विनाशकारी बाढीमा बेपत्ता भएकी मुक्तिनाथ विकास बैंककी कर्मचारी सुन्दरी श्रेष्ठको निधन भएको पुष्टि भएको छ।

परिवारसहित गोसाइँकुण्ड भ्रमणमा गएका बेला बाढी आएपछि उनी सम्पर्कविहीन भएकी थिइन्। खोजीका क्रममा हातमा ‘गोपाल’ लेखिएको ट्याटु भएको शव फेला परेको थियो। उक्त शवको पहिचानपछि सोही शव सुन्दरी श्रेष्ठकै भएको पुष्टि भएको हो।

यसअघि मुक्तिनाथ विकास बैंकले उनको तस्बिर सार्वजनिक गर्दै उनी सम्पर्कविहीन रहेको जानकारी गराएको थियो। तर, लामो खोजीपछि शव फेला परेपछि परिवार, आफन्त तथा सहकर्मीहरू शोकमा डुबेका छन्।

भोटेकोशी बाढीले रसुवासहित विभिन्न जिल्लामा ठूलो जनधनको क्षति पुर्‍याएको छ। बाढीपछि अझै केही व्यक्ति सम्पर्कविहीन रहेको बताइएको छ भने खोज तथा उद्धार कार्य जारी छ।

दिवंगत सुन्दरी श्रेष्ठप्रति हार्दिक श्रद्धाञ्जली। शोकसन्तप्त परिवारजनमा गहिरो समवेदना।

#सुन्दरीश्रेष्ठ #भोटेकोशीबाढी #रसुवा #मुक्तिनाथविकासबैंक

29/08/2026

🚨 सुरुङमा फसेकाको उद्धारका लागि भारतीय प्राविधिक टोलीद्वारा रेकी

बाढी प्रभावित क्षेत्रमा सुरुङभित्र फसेका व्यक्तिको खोज तथा उद्धारका लागि भारतबाट नेपाल आएको विशिष्ट प्राविधिक टोलीले त्रिशूली क्षेत्रमा स्थलगत अनुगमन (रेकी) गरेको छ।

टोलीले सुरुङको अवस्था, लेदो तथा भग्नावशेष र उद्धारका लागि आवश्यक प्राविधिक पक्षबारे जानकारी संकलन गरेको जनाइएको छ।

प्रारम्भिक रेकीपछि आवश्यक उपकरण र प्रविधिसहित थप उद्धार कार्य अघि बढाउने तयारी गरिएको छ। नेपाली सुरक्षा निकायसँगै भारत र चीनका विशेषज्ञ टोलीसमेत उद्धार अभियानमा जुटिरहेका छन्।

यसैबीच, भारतले रसुवाको भोटेकोशी बाढी प्रभावितका लागि हालसम्म ५७.५ मेट्रिक टन मानवीय सहायता नेपाललाई हस्तान्तरण गरिसकेको जनाएको छ।

29/08/2026

🚨 भोटेकोशी बाढीमा बगेर चितवन पुगेका २२७ शवको जीपीएस र डीएनएसहित व्यवस्थापन सुरु

रसुवाको भोटेकोशीमा आएको विनाशकारी बाढीमा बगेर चितवन पुगेका तर पहिचान हुन नसकेका २२७ शवलाई जीपीएस म्यापिङ, डिजिटल अभिलेख र डीएनए नमुनासहित जमिनमुनि व्यवस्थापन गर्न थालिएको छ।

चितवनमा हालसम्म २३३ शव संकलन भएकोमा ६ शव पहिचान गरी आफन्तलाई बुझाइएको छ। बाँकी शवलाई भविष्यमा डीएनए परीक्षणबाट पहिचान गर्न सकिने गरी छुट्टाछुट्टै संकेत नम्बर र जीपीएस लोकेसनसहित सुरक्षित व्यवस्थापन गरिँदै छ।

प्रत्येक शवको गाडिएको स्थानको जीपीएस विवरण, फोटो तथा भिडियो अभिलेखमा राखिनेछ। भविष्यमा डीएनए मिलान भएपछि सम्बन्धित शव पुनः उत्खनन गरी आफन्तलाई बुझाउन सकिने व्यवस्था गरिएको प्रहरीले जनाएको छ।

29/08/2026

गएराति त्रिशूली–३ ‘ए’ को सुरुङमा फसेकाहरूको उद्धारमा गृहमन्त्री सुधन गुरुङ आफैं फिल्डमा खटिनुभएको छ।

29/08/2026

माटोमुनिबाट बालिका रोएको आवाज आएपछि एपीएफ टोलीले गर्‍यो उद्धार, अचेत अवस्थामा फेला

रसुवाको गोसाइँकुण्ड गाउँपालिका–२, टिमुरेमा बाढी–पहिरो गएको दोस्रो दिन माटोमुनि पुरिएकी करिब ६ वर्षीया बालिकाको सशस्त्र प्रहरी बलको टोलीले सकुशल उद्धार गरेको छ।

शुक्रबार साँझ करिब ६ः१५ बजे खोज तथा उद्धारमा खटिएको सशस्त्र प्रहरीको टोलीले माटोमुनिबाट बालिका रोइरहेको आवाज सुनेपछि तत्काल खोजी थालेको थियो।

खोजीका क्रममा माटोमुनि पुरिएको अवस्थामा बालिकालाई फेला पारिएको हो। सीमा सुरक्षा चौकी टिमुरेबाट खटिएको ६ सदस्यीय टोलीले बालिकालाई उद्धार गरी चौकीमा ल्याएको जनाएको छ।

उद्धार गर्दा बालिका गम्भीर तथा अचेत अवस्थामा रहेकी थिइन्। चौकीमा ल्याएपछि उनलाई न्यानो बनाएर राखिएको छ भने थप उपचारका लागि हेलिकप्टरमार्फत उद्धार गर्ने पहल भइरहेको छ। तर, रातिको समय भएकाले तत्काल हेलिकप्टर उडान सम्भव नभएको बताइएको छ।

माटोमुनिबाट आएको रोएको आवाज समयमै सुनेर खोजी तथा उद्धार गर्न सफल हुनुले विपद्का बेला सुरक्षाकर्मीको सतर्कता र सक्रिय खोजीको महत्त्वलाई थप पुष्टि गरेको छ।

बाढी–पहिरो प्रभावित टिमुरे क्षेत्रमा सुरक्षाकर्मीहरूले जोखिमका बीच पनि खोज तथा उद्धार कार्यलाई निरन्तरता दिइरहेका छन्।

28/08/2026

Alert!!