01/11/2025
मेयर पदको तयारीसँगै जनताको घरदैलोमा यादव, परिवर्तनका नारा गाउँगाउँमा गुञ्जियो
अभिमनु पटेल, रौतहट, १५ कार्तिक । देशमा भइरहेको राजनीतिक संक्रमण र स्थानीय तहको शक्तिशाली व्यवस्थासँगै अब नेतृत्वमा नयाँ पुस्ताको आगमन अपरिहार्य भएको चर्चा चलिरहेको बेला, रौतहटको परोहा नगरपालिका पनि राजनीतिक गतिविधिमा तातिन थालेको छ।
नेकपा माओवादी केन्द्रबाट परोहा नगरपालिका वडा नं. ४ लौकाहाका दुईपटकका वडाअध्यक्ष पदका प्रत्याशी रहिसकेका अमिन्द्र प्र. यादवले यसपालि २०८४ सालको स्थानीय तहको निर्वाचनमा मेयर पदको लागि औपचारिक तयारी सुरु गरेको घोषणा गरेका छन्।
२०७९ सालको स्थानीय निर्वाचनमा वडास्तरमै दोस्रो स्थान हासिल गरेका यादव त्यसयता जनताको बीचमा निरन्तर सम्पर्कमा रहेर उनीहरूको समस्याहरू सुन्दै आएका छन्। अहिले वडा नं. १ देखि ९ सम्मका जनप्रतिनिधि, युवा, महिला, किसान, व्यापारीदेखि सर्वसाधारण नागरिकहरूसँग नियमित भेटघाट गर्दै यादवले अबको नेतृत्व पारदर्शी, जवाफदेही र जनमुखी हुनुपर्छ भन्ने सन्देश फैलाइरहेका छन्।
मैले विगत पाँच वर्ष जनताको भावना नजिकबाट बुझें, जनताले परिवर्तन खोजेका छन्। भ्रष्टाचार, नातावाद र असमानताको अन्त्य गरेर सुशासनको शुरुवात गर्नुपर्छ, यादवले एक कार्यक्रममा भने।
भ्रष्टाचार र नातावादविरुद्ध कडा अभिव्यक्ति यादवले हालको नगर नेतृत्वमाथि गम्भीर आरोप लगाउँदै भने, परोहा नपा अहिले हात्तीको जस्तो ठूला कुरा गर्ने तर सुइँ सुइँ गरेर भ्रष्टाचार गर्ने केन्द्र बनेको छ।
उनका अनुसार, शिक्षा, स्वास्थ्य, कृषि, खानेपानी, विद्युत, सडक, नाला लगायतका अधिकांश विकास योजनामा पार्टीगत नातावाद, ठेकेदारको चलखेल र बजेटको हेरफेर व्याप्त छ।
नगरमा भएका अधिकांश टेन्डर नेपाली कांग्रेस नजिकका ठेकेदार र निर्माण कम्पनीले मात्रै पाएका छन्। कर्मचारीदेखि मेयरसम्म मिलोमतोमा ठेक्का बाँडफाँट हुने गरेको छ, यादवले आरोप लगाए।
उनले थपे, करार शिक्षक, कर्मचारी, नगर प्रहरी, सवारी चालक, राहत वितरणदेखि कृषि बोरिङ, बीउ-बिजन कार्यक्रम सम्ममा नातावाद र कृपावादको जालो रहेको छ, जसले सच्चा नागरिकलाई अधिकारबाट वञ्चित बनाएको छ।
नेतृत्वको खाली ठाउँ र नयाँ विकल्पको उदय परोहा नगरपालिका १८ वटा स्थानीय तहमध्ये एउटा सक्रिय नगरपालिकाको रूपमा परिचित छ। यहाँको नेतृत्व विगत दुई कार्यकालदेखि नेपाली कांग्रेसको हातमा रहँदै आएको छ।
संविधान अनुसार एकै व्यक्ति लगातार दुई कार्यकाल मेयर रहिसकेपछि तेस्रोपटक उम्मेदवारी दिन नपाउने कानुनी व्यवस्था भएकाले हालका मेयर शेख वकिल अब प्रदेशसभा वा संघीय राजनीतिमा प्रवेश गर्ने तयारीमा रहेको चर्चा छ।
त्यसैले, यस पटकको निर्वाचनमा नयाँ पुस्ताको उम्मेदवारीले प्रतिस्पर्धालाई अझ रोचक बनाउने अनुमान गरिएको छ। राजनीतिक विश्लेषकहरूका अनुसार यादवजस्ता सक्रिय युवा र गाउँस्तरबाट उठेका जनमुखी नेताहरूले स्थानीय राजनीतिमा नयाँ ऊर्जा ल्याउन सक्छन्।
राष्ट्रिय राजनीतिक सन्दर्भमा परोहा रौतहट नेपालको राजनीतिक रूपमा अत्यन्त संवेदनशील जिल्लामध्ये पर्दछ। यहाँको मतदाता संरचना जातीय, धार्मिक र आर्थिक विविधतामा आधारित रहेको छ, जसले हरेक निर्वाचनलाई राष्ट्रिय दलहरूको परीक्षाको रूपमा बदल्ने गर्छ।
स्थानीय चुनावले राष्ट्रिय सन्देश दिने भएकाले परोहाको परिणामले पनि माओवादी केन्द्र, नेपाली कांग्रेस र अन्य दलहरूको संगठनात्मक बल र जनविश्वासको सूचक बन्ने अनुमान राजनीतिक विश्लेषकहरूले गरिरहेका छन्।
यादवले भनेका छन् हामी अब आन्दोलन होइन, परिणामका राजनीतिमा जानेछौं। युवाको नेतृत्व र जनताको विश्वासले मात्र स्थानीय विकास सम्भव छ। उनले आगामी दिनमा सबै वडाहरूमा ‘परिवर्तनका लागि घरदैलो अभियान’ सञ्चालन गर्ने र नगरको दीर्घकालीन विकास योजना सहित विस्तृत घोषणापत्र सार्वजनिक गर्ने तयारी समेत गरेका छन्।
