14/05/2026
सरकारको वार्षिक नीति तथा कार्यक्रममाथि उठेका प्रश्नहरूको जवाफ आज अर्थमन्त्री डा. स्वर्णिम वाग्लेले प्रतिनिधिसभामा दिने भएका छन् । प्रतिनिधिसभाको कार्यसूचीमै प्रधानमन्त्रीको तर्फबाट अर्थमन्त्रीले जवाफ दिने उल्लेख भएपछि राजनीतिक वृत्तमा नयाँ बहस सुरु भएको छ ।
आज बिहान सार्वजनिक गरिएको प्रतिनिधिसभाको दैनिक कार्यसूचीअनुसार नीति तथा कार्यक्रममाथिको छलफलका क्रममा उठेका प्रश्नहरूको जवाफ अर्थमन्त्री वाग्लेले दिनेछन् । कार्यसूचीमा राष्ट्रपतिले वैशाख २८ गते संघीय संसद्को संयुक्त बैठकमा प्रस्तुत गरेको आर्थिक वर्ष २०८३/०८४ को नीति तथा कार्यक्रममाथिको छलफलको जवाफ अर्थमन्त्रीमार्फत आउने उल्लेख गरिएको छ।
प्रधानमन्त्री बालेन शाह संसदमा उपस्थित नभएको विषयलाई लिएर विपक्षी दलहरूले लगातार आपत्ति जनाउँदै आएका छन् । बुधबारको बैठकमा प्रधानमन्त्री अनुपस्थित भएपछि विपक्षी सांसदहरूले नाराबाजी गर्दै बैठक अवरुद्ध गरेका थिए ।
विपक्षी दलहरूको अडान थियो कि नीति तथा कार्यक्रम सदनमा प्रधानमन्त्री स्वयंले प्रस्तुत गर्नुपर्ने र उठेका प्रश्नहरूको जवाफ पनि उनले नै दिनुपर्छ । सभामुखको पहलमा भएको छलफलपछि मन्त्रीलाई प्रस्ताव टेबल गर्न दिने सहमति बने पनि प्रधानमन्त्री उपस्थित हुनुपर्ने मागमा विपक्षी दलहरू अडिग देखिएका थिए ।
प्रतिनिधिसभामा विपक्षी सांसदहरूले प्रधानमन्त्रीलाई उपस्थित गराउन सभामुखसँग पटक–पटक रुलिङको माग गरेका थिए । तर सभामुखले प्रधानमन्त्रीको कार्यतालिकाबारे आफूलाई जानकारी नभएको भन्दै त्यस्तो रुलिङ गर्न नसक्ने बताएपछि विपक्षी दलले बैठक चल्न दिएका थिएनन् ।
आजको बैठकमा नीति तथा कार्यक्रममाथिको छलफल टुंग्याएर संशोधनहरू निर्णयार्थ प्रस्तुत गर्ने कार्यसूची छ । त्यसपछि सरकारको वार्षिक नीति तथा कार्यक्रम पारित गरिनेछ । साथै विनियोजन विधेयकका सिद्धान्त र प्राथमिकता पनि सदनमा प्रस्तुत हुने कार्यक्रम रहेको छ ।
त्यसैगरी प्रतिनिधिसभा नियमावली मस्यौदा समितिका सभापति गणेश पराजुलीले ‘प्रतिनिधिसभा नियमावली मस्यौदा समितिको प्रतिवेदन, २०८३’ माथि विचार गरियोस् भन्ने प्रस्ताव पनि पेश गर्ने कार्यसूची रहेको छ।
