31/08/2026
राष्ट्रिय विपद् जोखिम न्यूनीकरण तथा व्यवस्थापन प्राधिकरणले रसुवाको भोटेकोशी नदीमा आएको विनाशकारी बाढीबाट ९०३ जनाको मृत्यु भएको जनाएको छ। सोमबार बिहानसम्मको विवरण सार्वजनिक गर्दै प्राधिकरणले ४ हजार २४७ जना अझै सम्पर्कविहीन रहेको जनाएको हो।
प्राधिकरणका अनुसार मृतकमध्ये रसुवामा २४, नुवाकोटमा ९५, धादिङमा ५५, गोरखामा ६२, नवलपरासी पूर्वमा २०७, नवलपरासी पश्चिममा १५१, तनहुँमा ३७ र चितवनमा २७२ जना छन्। केही घटनामा पूर्ण शव नभेटिएर आंशिक मानव अंग मात्र फेला परेको प्राधिकरणले जनाएको छ।
सम्पर्कविहीन हुनेमा जलविद्युत् आयोजनामा कार्यरत ९३३ जना छन्। यस्तै रसुवाका ५६२, नुवाकोटका १ हजार ५५८, मकवानपुरका ६५ र विदेशी नागरिक ५९२ जना सम्पर्कविहीन रहेको विवरणमा उल्लेख छ।
त्यसैगरी प्रहरी २५, नेपाली सेना ४५, सशस्त्र प्रहरी १३, भन्सार कार्यालयका १५ र अध्यागमन कार्यालयका चार जना पनि सम्पर्कविहीन रहेको प्राधिकरणले जनाएको छ। नेपाल घुम्न आएका विदेशमा बस्ने नेपाली नागरिक १२७ जना तथा लाङटाङ राष्ट्रिय निकुञ्जका तीन जना पनि सम्पर्कविहीनको सूचीमा छन्।
खोज तथा उद्धारका लागि १९ हजार ८९५ सुरक्षाकर्मी परिचालन गरिएको छ। हालसम्म ८ हजार १८६ जनाको उद्धार गरिएको प्राधिकरणले जनाएको छ।
जलविद्युत् आयोजनाका सुरुङबाट शुक्रबार १९१ जना र शनिबार थप ८८ जनाको उद्धार गरिएको थियो। त्यस्तै, हालसम्म २२७ जना विदेशी नागरिकलाई हेलिकोप्टरमार्फत उद्धार गरिएको प्राधिकरणले जनाएको छ।
