05/06/2026
सुनवर्षी–६ केरौनंजामा मकै खरिदमा अनियमितता भएको आरोप, स्थानीयद्वारा ट्र्याक्टर नियन्त्रणमा
मोरङको सुनवर्षी नगरपालिका–६, केरौजामा मकै खरिदका क्रममा किसानमाथि ठगी भएको आरोप लागेपछि स्थानीयले व्यापारीको ट्र्याक्टर नियन्त्रणमा लिएका छन्।
स्थानीयका अनुसार हाल मकै खरिद गर्दा एक बोरामा करिब ५१ किलो १०० ग्राम मकै (बोराको तौलसहित) राख्ने प्रचलन रहेको छ। तर मकै लोड गरिरहेको एक ट्र्याक्टरमा रहेका बोराहरू जाँच गर्दा अधिकांश बोरामा करिब ५३ किलो हाराहारी मकै रहेको फेला परेको छ।
घटनाको सुरुवात एक किसानले आफ्नो मकै कम भएको आशंका गरी प्रश्न उठाएपछि भएको बताइएको छ। त्यसपछि गाउँलेहरूले अन्य किसानहरूको मकै पनि नापजाँच गर्दा सबैजसो बोरामा तोकिएको भन्दा करिब डेढदेखि दुई किलोसम्म बढी मकै हालिएको भेटिएको स्थानीयहरूको दाबी छ। स्थानीयहरूको भनाई अनुसार उनीहरुले नाप्ने प्रयोग गर्ने तराजु नै मिलाएर राखेर किसानलाई ठगी गरेको आरोप लगाएका छन्।
त्यहाँ नाप्दा ५१ किलो देखाएता पनि अरु तराजु रुमा नाप्दा ५३-५४ किलो देखिएको छ।
स्थानीयका अनुसार उक्त ट्र्याक्टर रङ्गेलीका व्यापारी गणेश शाहको रहेको बुझिएको छ भने मकै खरिद गर्ने स्थानीय व्यापारी बिरु शाह रहेको जानकारी प्राप्त भएको छ।
घटनापछि व्यापारी बिरु शाहले गल्ती स्वीकार गर्दै यो काम लेबरहरूको कमजोरीका कारण भएको बताएको स्थानीयहरूको भनाइ छ। उनले घटनाबारे थप विवाद नगरी त्यहाँबाट फर्किएको समेत जनाइएको छ।
यस घटनापछि स्थानीयले सम्बन्धित निकाय र प्रहरी प्रशासनले निष्पक्ष छानबिन गरी दोषीमाथि आवश्यक कारबाही गर्नुपर्ने माग गरेका छन्।
