01/08/2026
हारै हारको श्रृंखलाः नेपालको ब्याटिङ संकट फेरि सतहमा
काठमाडौं । आइसिसी विश्वकप लिग २ अन्तर्गत नेदरल्यान्ड्समा सम्पन्न आठौं त्रिकोणात्मक श्रृंखलामा दयनीय प्रदर्शन गरेर नेपाली टोली शुक्रबार स्वदेश फर्कियो ।
नेपालले नेदरल्यान्ड्समा सबै चार खेल हार्यो । एक खेलबाहेक कुनैमा पनि नेपालको जित कल्पना बाहिरको कुरा थियो । यसले टोलीका पुराना कमजोरी फेरि एकपटक सतहमा ल्याएको छ ।
श्रृंखलाको सुरुआत नै निराशाजनक रह्यो । पहिलो खेलमा नेपाल नामिबियासँग ८ विकेटले पराजित भयो । ब्याटिङमा नेपाल १५६ रनमा समेटिँदा नामिबियाले लक्ष्य सहजै पूरा गर्यो । दोस्रो खेलमा पनि उही कमजोरी दोहोरियो । नेपाल फेरि १५७ रनमै अलआउट भयो र नेदरल्यान्ड्सले ६ विकेटको सहज जित निकाल्यो ।
तेस्रो खेल नेपालका लागि सबैभन्दा पीडादायी रह्यो । तीव्र गतिका बलर करण केसीको विशेष दिन नेपाल नामिबियासँग तीन रनको झिनो अन्तरले हार्न पुग्यो । करणले यो खेलमा पाँच विकेट लिँदै एकदिवसीय क्रिकेटमा १०० विकेटको कोसेढुंगा पूरा गरेका थिए । नामिबियालाई २११ रनमा रोक पनि ब्याटरले लक्ष्य भेट्न सकेनन् ।
अन्तिम खेलमा नेदरल्यान्ड्सले नेपाललाई ५७ रनले हरायो ।
तीव्र गतिका बलर करण केसीको विशेष दिन नेपालले आइसिसी विश्वकप लिग २ अन्तर्गत आठौं त्रिकोणात्मक श्रृंखलामा दूर्भाग्यजनक हार बेहोरेको छ । सोमबार आफ्नो तेस्रो खेलमा नेपाल नामिबियासँग तीन रनले पराजित भयो ।
नेपालले चारवटै खेलमा हार बेहोर्नुको कारण लगभग एउटै रह्यो । सबैभन्दा ठूलो समस्या ब्याटिङमै देखियो । चारमध्ये तीन खेलमा नेपालले दुई सय रनको आँकडासमेत पार गर्न सकेन ।
विशेषगरी शीर्षक्रमले टोलीलाई बलियो सुरुआत दिन सकेन । कुशल भुर्तेल, आसिफ शेख र इशान पाण्डेबाट अपेक्षित प्रदर्शन नआउँदा कप्तान रोहित पौडेल, दीपेन्द्रसिंह ऐरि, आरिफ शेख र गुल्सन झालगायत ब्याटरमाथि दबाब बढ्यो । मध्यक्रमले संघर्ष गरे पनि साझेदारी लामो समय टिक्न सकेन । परिणामस्वरुप नेपालले प्रतिस्पर्धात्मक स्कोर बनाउन सकेन । सारांशमा भन्दा सबै ब्याटर पूर्ण रुपमा फ्लप रहे ।
बलिङ भने अपेक्षानुरुप सन्तोषजनक रह्यो । करणले चार खेलमा कूल ९ विकेट लिए । दीपेन्द्र, सोमपाल, ललित राजवंशी र अन्य बलरले पनि महत्वपूर्ण योगदान दिए । तर, बलरले सिर्जना गरेका अवसरलाई फिल्डरहरुले उपयोग गर्न सकेनन् । महत्वपूर्ण क्याच छुट्दा विपक्षी ब्याटरहरुले त्यसको पूरा फाइदा उठाए ।
नेपालको अर्को कमजोरी विदेशी परिस्थितिमा अनुकूल हुन नसक्नु पनि रह्यो । घरेलु मैदानमा स्पिनअनुकूल विकेटमा आत्मविश्वासका साथ खेल्ने टोली नेदरल्यान्ड्सको सीम र स्विङ हुने पिचमा सहज देखिएन । धैर्य र लामो इनिङ्स खेल्ने क्षमताको अभावमा टोली बारम्बार दबाबमा पर्यो ।
रणनीतिक रुपमा पनि नेपालले अपेक्षित परिपक्वता देखाउन सकेन । साझेदारी बनेपछि त्यसलाई ठूलो इनिङ्समा रुपान्तरण गर्न नसक्नु, स्ट्राइकर रोटेट गर्न कठिन हुनु तथा अन्तिम ओभरमा खेल फिनिस गर्न नसक्नु हारका प्रमुख कारण बने ।
शुक्रबार स्वदेश फर्किने बित्तिकै पत्रकारसामू उपस्थित भएका कप्तान रोहित पौडेलले हारको जिम्मेवारी आफ्नै टोलीको प्रदर्शनमा रहेको स्वीकार गरे । उनले भने, ‘जुन हिसाबले सोचेर गएका थियौं, त्यो भएन । कन्डिसनलाई मात्रै बहाना बनाउन मिल्दैन । मुख्य कारण हाम्रो ब्याटिङ नै हो । ब्याटिङमा इन्टेन्ट देखिएन, त्यसैले हामी पछाडि पर्यौं । बलिङ भने ठीकै थियो ।’
फिल्डिङबारे पनि उनले स्पष्ट रुपमा भनेर्, ब्याटिङ र फिल्डिङ दुबै हाम्रो स्तरअनुसार भएन । सहज क्याचहरु छोड्यौं । जसको क्याच छोडेका थियौं । उसैले म्यान अफ दि म्याच जितेर गयो ।’
रोहितका यी भनाइले पनि हारको मुख्य कारण बाहिरी अवस्था नभई आफ्नै प्रदर्शन रहेको पुष्टि गर्छ ।
दयीनय टूरपछि नेपालको सोझै ग्लोबल क्वालिफायरमा पुग्ने सम्भावना लगभग सकिएको छ । चार खेल बाँकी रहेको अवस्थामा नेपाल अहिले २४ अंकसहित छैटौं स्थानमा छ । तीन खेल कम खेलेको ओमान ३१ अंकसहित चौथो स्थानमा छ । यसको मतलब नेपालको गणीतिय सम्भावनामा केवल एक अंकको फरक छ ।
