Janata Television HD

16/09/2025

राष्ट्रिय सभाको चालु अधिवेशन अन्त्य

राष्ट्रपति रामचन्द्र पौडेलले राष्ट्रियसभाको चालु अधिवेशन अन्त्य गर्नुभएको छ । राष्ट्रपति पौडेलले मन्त्रिपरिषद्को सिफारिसमा आज राति १२ः०० बजेदेखि राष्ट्रियसभाको चालु अधिवेशन अन्त्य गर्नुभएको राष्ट्रपतिको कार्यालयले जनाएको छ ।

नेपालको संविधानको धारा ९३ को उपधारा (२) बमोजिम राष्ट्रपतिले मन्त्रिपरिषद्को सिफारिसमा संसद्को अधिवेशन अन्त्य गर्ने संवैधानिक प्रावधान छ । यसैबिच राष्ट्रियसभाले आज एक सूचना जारी गर्दै सभाको चालु अधिवेशन अन्त्य भएको सूचना प्रकाशन गरेको छ ।

16/09/2025

सचिवस्तरका २१ निर्णय

सरकारले सिंहदरबार परिसरमा जलेर पूर्णरुपमा क्षति भएर प्रयोगमा आउन नसक्ने सवारी साधन, विभिन्न यन्त्र, उपकरण तथा फर्निचर अन्तर्राष्ट्रिय सम्मेलन केन्द्र, नयाँ बानेश्वरमा लैजाने तयारी गरेको छ। सचिवस्तरीय बैठकले २१ बुँदे प्रस्तावित निर्णयहरु सार्वजनिक गर्दै सो जानकारी गराएको हो।

16/09/2025

बडादसैँको शुभ साइत असोज १६ गते बिहान ११ः५३ बजे

विजया दशमीको टीकाको शुभ साइत असोज १६ गते बिहीबार बिहान ११ः ५३ बजे तोकिएको छ। नेपाल पञ्चाङ्क निर्णायक विकास समितिका अध्यक्ष शम्भुप्रसाद ढकालले मङ्गलबार साँझ एक विज्ञप्ति सार्वजनिक गरी सो साइत सार्वजनिक गर्नुभएको हो। असोज ६ गते सोमबार घटस्थापनाको साइत बिहान ९ः१३, असोज १३ गते फूलपातीमा तुलजाभवानी यात्रा ७ः१७ र स्थिरासन ९ः२३ बजे शुभ साइत रहेको समितिले जनाएको छ।

15/09/2025

आजदेखि सहुलियत पसल

सरकारले चाडपर्वलक्षित सोमबारदेखि देशका १५३ स्थानमा सहुलियत मूल्य पसल सञ्चालन गरिने भएको छ । उद्योग, वाणिज्य तथा आपूर्ति मन्त्रालयले खाद्य व्यवस्था तथा व्यापार कम्पनी र साल्ट टे«डिङ कर्पोरेसनमार्फत सोमबारदेखि देशभरका १५३ स्थानमा चाडपर्वलक्षित सहुलियत मूल्य पसल सञ्चालन गर्न लागेको हो ।

15/09/2025

शीतलनिवासमा साढे ११ बजे मन्त्रीहरूको सपथ

अन्तरिम सरकारका तीन नयाँ मन्त्रीको शपथ सोमबार हुँदैछ । प्रधानमन्त्री सुशीला कार्कीले तीन सदस्यीय मन्त्रिपरिषद् विस्तार गर्नुभएको हो । नेपाल विद्युत् प्राधिकरणका पूर्व कार्यकारी निर्देशक कुलमान घिसिङलाई ऊर्जा जलस्रोत तथा सिँचाइ मन्त्रालय, ओमप्रकाश अर्याललाई गृहसहित कानुन मन्त्रालय र रामेश्वर खनाललाई अर्थ मन्त्रालयको जिम्मेवारी दिइएको छ ।

13/09/2025

धनगढी उपमहानगरपालिकाका मेयर गोपाल हमालले नेपालको अन्तरिम सरकारको प्रधानमन्त्रीमा नियुक्त भएकोमा सुशीला कार्कीलाई बधाई दिएका छन्।

13/09/2025

अन्तरिम सरकार गठनसँगै जनजीवन सामान्य बन्दै

13/09/2025

काठमाडौंमा चल्न थाले सार्वजनिक गाडी

काठमाडौंको कर्फ्यु हटाइएकाले जनजीवन सामान्य छ । सार्वजनिक बस, ट्याक्सी लगायतका सवारी साधन बिहानैदेखि चलिरहेका छन् ।

13/09/2025

कर्फ्यु हट्यो, जनजीवन सामान्य

नयाँ सरकार गठन भएसँगै देशभर जनजीवन सामान्य बन्न थालेको छ । आन्दोलनपछि मुलुकका विभिन्न क्षेत्रमा केही दिनअघिदेखि लगाइको कर्फ्यु र निषेधाज्ञा पनि हटेको छ । ललितपुर र भक्तपुरमा भने कायमै छ । आम नागरिक आफ्नो पेसा व्यवसायमा फर्किएका छन् ।

12/09/2025

12/09/2025

प्रतिनिधि सभा विघटन,आगामी फागुन २१ गते चुनाव

राष्ट्रपति रामचन्द्र पौडेलले प्रतिनिधिसभा विघटन गरेका छन् । प्रधानमन्त्री कार्कीको सिफारिसमा राष्ट्रपति पाैडेलले चुनावको मिति घोषणा गरेका हुन् । प्रतिनिधि सभा विघटन गर्दै फागुन २१ गतेका लागि चुनावको मिति समेत तोकिएको राष्ट्रपति कार्यालयले जनाएको छ । राष्ट्रपति रामचन्द्र पौडेलले आगामी ६ महिनाभित्र प्रतिनिधिसभाको नयाँ निर्वाचन सम्पन्न गर्ने जिम्मेवारीसहित पूर्वप्रधानन्यायाधीश सुशीला कार्कीलाई आज मात्रै प्रधानमन्त्रीमा नियुक्त गरेका थिए ।

12/09/2025

सुशीला कार्की प्रधानमन्त्री हुँदा एमाले नेता सूर्य थापालाई खसखस् लेखे यस्तो स्टाटस

नेकपा एमालेका पोलिटव्युरो सदस्य सूर्य थापाले सुशीला कार्कीलाई प्रधानमन्त्री नियुक्त गर्नु असंवैधानिक र अग्राह्य काम भएको भन्दै आलोचना गरेका छन्। थापाले संविधानको धारा १३२(१) र (२) उल्लङ्घन गर्दै यस्तो नियुक्ति गरिएको बताए।

“राष्ट्रपतिको अधिकारको दुरुपयोग गर्दै प्रधानमन्त्री नियुक्त गर्नु मजाकपूर्ण देखिन्छ। बिहान उठ्दा नागरिक, राति नसुत्दै कृपामा प्रधानमन्त्री–तर यो पद त सरकारी जिम्मेवारीसँग सम्बन्धित हो,”उनले फेसबुकमा लेखेका छन् ।