05/09/2026
चीनको कदमले तान्यो विश्वको ध्यान, भारी वर्षापछि ६ लाख मानिस सुरक्षित स्थानमा सारिए
चीनको फुजियान प्रान्तमा लगातार परेको मुसलधारे वर्षा र टाइफुनको प्रभावपछि करिब ६ लाख मानिसलाई सुरक्षित स्थानमा सारिएको छ। प्रान्तीय बाढी नियन्त्रण तथा खडेरी राहत मुख्यालयका अनुसार शुक्रबार रातिसम्म जोखिमयुक्त तटीय तथा भित्री क्षेत्रबाट ५ लाख ९९ हजार ३०० जनालाई सुरक्षित स्थानमा स्थानान्तरण गरिएको हो।
भारी वर्षाबाट प्रभावित क्षेत्रमा उद्धार, राहत तथा विपद्पछिको पुनःस्थापनाका लागि फुजियानका विभिन्न सरकारी निकायले २१ करोड युआन बजेट छुट्याएका छन्। बाढीको जोखिमलाई ध्यानमा राख्दै प्रान्तमा तेस्रो उच्च तहको लेभल–३ आपतकालीन प्रतिक्रिया सक्रिय गरिएको छ भने टाइफुनका लागि लेभल–४ को प्रतिक्रिया कायम राखिएको छ।
यस विपद्को मुख्य कारण सन् २०२६ को १८औँ आँधी टाइफुन सौडेल बनेको छ। बिहीबार बिहान यसले फुजियानको झाङझाउस्थित झाङ्पु काउन्टीमा तेस्रोपटक जमिनमा प्रवेश गरेको थियो। तीव्र हावा र भारी वर्षाको चेतावनीपछि जोखिममा रहेका ठूलो संख्याका मानिसलाई सुरक्षित स्थानमा सारिएको थियो।
टाइफुनको प्रभाव छिमेकी जियाङ्सी प्रान्तमा समेत परेको छ। त्यहाँ ५३ काउन्टीका करिब १ लाख २८ हजार ५०० मानिस प्रभावित भएका छन् भने करिब ८ हजार ७०० जनालाई आपतकालीन रूपमा सुरक्षित स्थानमा सारिएको छ। बाढीको जोखिम बढेपछि जियाङ्सीमा पनि लेभल–४ आपतकालीन प्रतिक्रिया सक्रिय गरिएको छ।sinjadaroan #
