31/01/2026
बुद्धभूमि–९ मा रास्वपाको प्रभाव विस्तार, एमाले नेता काशीराम भट्टराईसहित सयौँ स्थानीय पार्टी प्रवेश
कपिलवस्तु । बुद्धभूमि नगरपालिका वडा नम्बर ९ का लोकप्रिय युवा कृषक तथा नेकपा एमाले निकट अखिल नेपाल किसान महासङ्घ जिल्ला कमिटीका सचिव एवं वडा कमिटी सदस्य काशीराम भट्टराईले आफ्नो जिम्मेवारीबाट राजीनामा दिँदै राष्ट्रिय स्वतन्त्र पार्टी (रास्वपा) मा प्रवेश गर्नुभएको छ।
भट्टराईसँगै परदेशी थारु, युवा व्यवसायी सूर्य विक, युवा व्यवसायी दिलबहादुर थारु, महेन्द्र भट्टराई, दुर्गा भट्टराई, शेरलाल भट्टराई, छविलाल पन्थी, रामसुन्दर थारु, रन्जित थारु, माधव खनाल, बिमल उपाध्याय लगायत सयौँ स्थानीयहरू पनि राष्ट्रिय स्वतन्त्र पार्टीमा प्रवेश गरेका छन्।
बुद्धभूमि नगरपालिका वडा नम्बर ९ स्थित चमरसटमा आयोजित विशेष पार्टी प्रवेश कार्यक्रममा राष्ट्रिय स्वतन्त्र पार्टीका कपिलवस्तु क्षेत्र नम्बर २ का प्रत्यक्षतर्फका उम्मेदवार विक्रम सिंह थापा तथा समानुपातिकतर्फका उम्मेदवार जनक न्यौपानेले नवप्रवेशीहरूलाई पार्टीमा स्वागत गर्नुभएको थियो।
कार्यक्रममा बोल्दै वक्ताहरूले राष्ट्रिय स्वतन्त्र पार्टीले नयाँ राजनीतिक संस्कार, सुशासन र जनमुखी विकासको एजेन्डा बोकेको भन्दै स्थानीय तहदेखि राष्ट्रिय तहसम्म परिवर्तनको आवश्यकता रहेको धारणा राखेका थिए। नवप्रवेशी काशीराम भट्टराईले पुराना दलहरूले जनअपेक्षा अनुसार काम गर्न नसकेको कारण आफू रास्वपामा प्रवेश गरेको बताउँदै आगामी दिनमा पार्टीलाई स्थानीयस्तरमा मजबुत बनाउने प्रतिबद्धता व्यक्त गर्नुभयो।
पार्टी प्रवेश कार्यक्रममा स्थानीयको उल्लेख्य सहभागिता रहेको थियो।
