12/12/2025
३० वर्ष महानगर प्रहरीमा काम गरेका लोकनाथ चुडाल अब हर्क साम्पाङसँग राजनीतिमा
काठमाडौं महानगरपालिकामा करिब तीन दशक सेवा गरेका पूर्व नगर प्रहरी सई लोकनाथ चुडाल अब धरानका मेयर हर्क साम्पाङ नेतृत्वको श्रम संस्कृति पार्टीका उपाध्यक्ष बनेका छन्। २०५० भदौदेखि २०७९ पुससम्म नगर प्रहरीमा काम गरेका चुडालले अवकाश लिँदै गर्दा तत्कालीन नगर प्रहरी प्रमुख राजुनाथ पाण्डेले गरेको अत्याचार सहन नसकेर राजीनामा दिएको सार्वजनिक रूपमा बताएका थिए। नगर प्रहरी सेवाबाट अलग भएको तीन वर्षपछि उनी राजनीतिमा प्रवेश गरेका हुन्।
चुडालले हर्क साम्पाङसँग पहिलो भेट काठमाडौंमा चार महिनाअघि भएको बताउँछन्। त्यतिबेला छोटो कार्यक्रममार्फत परिचय भएपछि धरानमा २०–२५ मिनेटको वैचारिक छलफलले आफू साम्पाङको विचार, श्रम–उत्पादनमूलक राजनीति र राष्ट्रवादप्रति उनी देखाएको प्रतिबद्धताबाट प्रभावित भएको चुडालले बताए। त्यसपछि भएका भेटघाट र निरन्तर संवादले पार्टीमा जिम्मेवारी लिन प्रेरित गरेको उनले बताए।
उनका अनुसार पार्टी उपाध्यक्षको प्रस्ताव स्वयं साम्पाङले नै गरेका थिए। यसअघि उपाध्यक्ष देवराज, महासचिव आरेन राईलगायतसँग लगातार भएको वैचारिक बैठकहरूले पनि आफूलाई पार्टीको नजिक ल्याएको चुडालको भनाइ छ। उनी भन्छन्, “राजनीति सही दिशामा भए मात्र राष्ट्र सही ट्रयाकमा जान्छ। श्रम, उत्पादन, आत्मनिर्भरता र सार्वभौमिकतामा आधारित नयाँ राजनीतिक मूल्य चाहिएको थियो।”
चुडालले मुलुकको मूलभूत समस्या विदेशी हस्तक्षेप, असमान सम्झौता, एनजीओ–आईएनजीओमार्फत समाजमा फैलिएको विभाजन र राजनीतिक नेतृत्वको कायरता भएको दाबी गरे। विशेषगरी एमसिसीलाई संविधानभन्दा माथि राखिएको आरोप गर्दै उनले यसलाई राष्ट्रिय स्वाधीनतामा ठाडो हस्तक्षेपको उदाहरण भने। “सबै दल बिक्री भएका छन्, व्याख्यात्मक टिप्पणी पनि त्यही प्रमाण हो,” उनले टिप्पणी गरे।
पूर्वराजनीतिक पृष्ठभूमिबारे चुडाल भन्छन्, विद्यार्थी जीवनमा माले हुँदै एमालेमा रहे पनि २०५३ सालमा महाकाली सन्धिपछि एमाले छाडे। त्यसपछि माओवादी पार्टीको परिवर्तनकारी एजेन्डाबाट प्रभावित भएर धेरै वर्षगतसम्म समर्थन गर्दै कर्मचारी संगठनमा सक्रिय रहे। २०७४ पछि माओवादी पनि छोडेर स्वतन्त्र बसेको उनी बताउँछन्।
बालेन शाहतर्फ कटाक्ष गर्दै चुडालले काठमाडौं महानगरमा नौ महिना काम गर्दा उहाँको टिम कमजोर, आर्थिक पारदर्शिता अभाव र कर्मचारीमाथि दमन देखिएको दाबी गरे। “यदि बालेनजी हर्कजीजस्तो आत्मनिर्भरता र राष्ट्रवादको विचार बोकेका भए, म त्यहीँ हुन्थेँ,” उनी भन्छन्।
चुडालले आफू अहिले असल राष्ट्रवाद, श्रमकेन्द्रित अर्थनीति, सामूहिक उत्पादन, जमिनको संरक्षण र आत्मनिर्भर नेपालको स्पष्ट एजेन्डासहित हर्क साम्पाङकै विचारमा विश्वास गरेर पार्टीको उपाध्यक्ष बन्न तयार भएको बताए। “यदि कुनै दिन श्रम संस्कृति पार्टीले पनि राष्ट्रिय हितविपरीत काम गर्यो भने म एक्लै भए पनि राष्ट्रिय स्वाधीनताको पक्षमा उभिरहनेछु,” उनले भने।
