31/05/2026
Big Breaking: घर बचाउन आन्दोलनको घोषणा....
महोत्तरीको गौशाला बजार आज बन्द रहने भएको छ। गौशालामा रहेको वडा नम्बर ५ अन्तर्गत कित्ता नम्बर ११५ मा बनेका घरटहरा हटाउने समयसीमा सकिएपछि स्थानीय घरधुरीहरूमा तनाव र हलचल बढेको हो।
अव्यवस्थित बसोबास तथा सुकुम्बासी समस्यासम्बन्धी विवाद चर्किएपछि प्रभावित स्थानीयहरूले केही दिनअघि बजार क्षेत्रमा नाराजुलुस समेत गरेका थिए। प्रदर्शनका क्रममा उनीहरूले “सुकुम्बासी समस्या समाधान गर”, “लालपुर्जा देऊ”, “घरटहरा भत्काउन पाइँदैन” लगायतका नाराहरू लगाएका थिए।
संघर्ष समितिका प्रतिनिधिहरूले शनिबार साँझ माइकिङ गर्दै आइतबार बिहान ११ बजेसम्म गौशाला बजारका सम्पूर्ण पसल बन्द गर्न व्यापारी तथा सर्वसाधारणसँग आग्रह गरेका छन्। बजार बन्दको आह्वानपछि स्थानीय क्षेत्रमा सुरक्षा सतर्कता समेत बढाइएको बताइएको छ।
उता, कित्ता नम्बर ११५ मा रहेका घरहरू तत्काल नहटाउन माग गर्दै प्रभावित पक्षले दिएको निवेदनमा उच्च अदालत जनकपुरले अन्तरिम आदेश दिन अस्वीकार गरेको स्रोतले जनाएको छ। अदालतबाट अन्तरिम आदेश नआएपछि घर हटाउने प्रक्रिया अगाडि बढ्न सक्ने भन्दै स्थानीय बासिन्दा थप चिन्तित बनेका छन्।
स्थानीयवासीहरूले आफूहरू वर्षौंदेखि बसोबास गर्दै आएको भन्दै उचित व्यवस्थापन, पुनःस्थापना तथा लालपुर्जाको माग गरिरहेका छन् भने सम्बन्धित निकायले सार्वजनिक तथा सरकारी जग्गा संरक्षणका लागि प्रक्रिया अघि बढाइएको जनाएको छ।
Source : Kumar Samrat
