02/03/2026
परिवर्तनको घण्टी’ बजाउँदै प्रणाली सुधारको एजेन्डा अघि सार्दै मानबहादुर शाही
रुकुम पश्चिम — आगामी आम निर्वाचन २०८२ नजिकिँदै गर्दा मान बहादुर शाही ले ‘परिवर्तनको घण्टी’ शीर्षकमा सार्वजनिक सन्देशमार्फत प्रणाली सुधार र सुशासनलाई आफ्नो मुख्य एजेन्डाका रूपमा अघि सार्नुभएको छ।
राष्ट्रिय स्वतन्त्र पार्टी (रास्वपा) का जिल्ला सभापति तथा रुकुम पश्चिमका संघीय सांसद उम्मेदवार शाहीले यो निर्वाचनलाई सामान्य राजनीतिक प्रतिस्पर्धा नभई “राजनीतिक संस्कार सुधार्ने दुर्लभ अवसर”का रूपमा व्याख्या गर्नुभएको छ।
उहाँले तीन दशकदेखि दोहोरिँदै आएको अस्थिरता, कमजोर संस्था, महँगो निर्वाचन प्रणाली, पहुँच–प्रभावको राजनीति र उत्तरदायित्वको अभावले देशको सम्भावनालाई रोकिरहेको उल्लेख गर्नुभएको छ। अब सिटको गणितभन्दा पनि प्रणाली सुधार प्राथमिक हुनुपर्ने उहाँको धारणा छ।
शाहीले संस्थागत सुदृढीकरण, पारदर्शिता, जवाफदेहिता र मेरिट प्रणालीलाई स्थायी सुधारका आधारस्तम्भका रूपमा प्रस्तुत गर्नुभएको छ। “दलले दोहन गर्ने राज्य होइन, नागरिकको सेवा गर्ने राज्य हुनुपर्छ” भन्ने उल्लेख गर्दै उहाँले प्रशासनलाई पेशागत र उत्तरदायी बनाउनुपर्ने आवश्यकता औँल्याउनुभएको छ।
आर्थिक दृष्टिले उहाँले उत्पादन र उत्पादकत्व वृद्धि, उद्यमशील युवालाई अवसर, साना व्यवसायलाई सहजीकरण, लगानी प्रवर्द्धन तथा आर्थिक अपराधमाथि कडाइ गर्ने नीति अघि सार्नुभएको छ। सामाजिक न्यायसहितको उदार अर्थतन्त्रमार्फत परिश्रम गर्ने नागरिकलाई सम्मान र परिणाम दिने राज्य निर्माण गर्ने प्रतिबद्धता उहाँले जनाउनुभएको छ।
डिजिटल शासनलाई पनि प्राथमिकतामा राख्दै शाहीले “लाइनमा होइन, अनलाइनमा सेवा”को अवधारणा अघि सार्नुभएको छ। प्रविधिमार्फत पारदर्शिता, दक्षता र कम लागतमा सेवा प्रवाह गर्ने लक्ष्य उल्लेख गरिएको छ।
“यो चुनाव केवल सिटको गणित होइन; यसले भविष्यको दिशानिर्देश गर्नेछ,” भन्दै शाहीले कुशासनको निरन्तरता वा सार्थक परिवर्तनमध्ये एक रोज्ने समय आएको बताउनुभएको छ।
उहाँले आफूहरू पूर्ण नभए पनि प्रतिबद्ध रहेको उल्लेख गर्दै गल्ती भए सुधार्ने तर पुरानो भ्रष्ट संस्कार नदोहोर्याउने अठोट व्यक्त गर्नुभएको छ।
