13/01/2026
नेपाल पुस्तक प्रकाशक संघको पहल तथा निरन्तर मागको आधारमा पाठ्यक्रम विकास केन्द्रले विद्यालय तहमा विदेशी पुस्तक तथा शैक्षिक सामग्रीको प्रयोगमा रोक लगाउने निर्णय गरेको छ। यस निर्णयले नेपालमै छापिएका तथा निर्मित शैक्षिक सामग्रीलाई प्राथमिकता दिने व्यवस्था थप सुदृढ बन्दै गएको छ, जसले देशभित्रको प्रकाशन उद्योग, छापाखाना तथा स्टेशनरी व्यवसायलाई प्रतिस्पर्धी र आत्मनिर्भर बनाउने दिशामा महत्वपूर्ण योगदान पुर्याउने छ।
यस्ता पहलकदमीले सयौँ छापाखानाहरू सञ्चालनमा आउने, हजारौँ रोजगारी सिर्जना हुने, र लाखौँ प्रतिको पुस्तक तथा शैक्षिक सामग्री नेपालमै उत्पादन हुने अपेक्षा गरिएको छ। यससँगै मुलुकभित्र आवश्यक कच्चा पदार्थ, जनशक्ति, प्रविधि तथा लगानीको माग बढ्दै जाने भएकाले दीर्घकालीन अवस्थामा प्रकाशन तथा मुद्रण क्षेत्र आत्मनिर्भर र सक्षम बन्नेछ।
यस्ता कार्यलाई अझ प्रभावकारी बनाउन मुद्रण महासंघ, पुस्तक प्रकाशक संघ, पुस्तक तथा स्टेशनरी महासंघ, मासलन्द संघ लगायतका सरोकार संस्थाहरूबीच आपसी सहकार्य र एकीकृत रणनीति आवश्यक छ। सुदृढ समन्वयमार्फत अघि बढ्न सकिएमा यस अभियानले अझ व्यापक सफलता हासिल गर्ने विश्वास गर्न सकिन्छ।
