15/09/2026
मौका परीक्षा हटाउने निर्णयविरुद्ध काठमाडौँ विश्वविद्यालयमा वैज्ञानिक समाजवादी विद्यार्थी संगठनको हस्ताक्षर अभियान !
काठमाडौँ विश्वविद्यालयले कम्पार्टमेन्ट (मौका) परीक्षा प्रणाली हटाएपछि उत्पन्न समस्यालाई लिएर विद्यार्थीहरू आन्दोलित भएका छन्। विश्वविद्यालयको उक्त निर्णयको विरोध गर्दै वैज्ञानिक समाजवादी विद्यार्थी संगठन नेपाल, काठमाडौँ विश्वविद्यालय कमिटीले हस्ताक्षर अभियान सुरु गरेको हो । विगतमा परीक्षाफल प्रकाशित भएको १५ दिनभित्र कुनै विषयमा अनुत्तीर्ण विद्यार्थीका लागि मौका परीक्षा दिने व्यवस्था रहँदै आएको थियो । तर, प्रशासनले यो व्यवस्था एकाएक हटाएपछि चौथो वर्षका विद्यार्थीहरू एउटा मात्र विषयमा अनुत्तीर्ण हुँदा पनि तोकिएको समयमा स्नातक गर्न नसक्ने जोखिममा परेका छन् ।
यसअघि कम्पार्टमेन्ट परीक्षा पुनः सञ्चालनको माग राख्दै संगठनले विश्वविद्यालय प्रशासनलाई ७ दिने अल्टिमेटमसहितको मागपत्र बुझाएको थियो । अल्टिमेटमको पाँचौँ दिन बितिसक्दा पनि प्रशासनले माग पूरा गर्न कुनै चासो नदेखाएपछि दबाबमूलक हस्ताक्षर संकलन कार्यक्रम सुरु गरिएको संगठनले जनाएको छ । हालसम्म ५०० भन्दा बढी विद्यार्थीहरूले हस्ताक्षर गरिसकेका छन् भने यो अभियान भोलि पनि जारी रहने बताइएको छ । ७ दिने समयावधिसम्म पनि मागको सुनुवाइ नभए अझ कडा र सशक्त आन्दोलनका कार्यक्रमहरू सार्वजनिक गर्ने चेतावनी विद्यार्थी संगठनले दिएको छ ।
