21/02/2026
कर्फ्यू आदेश जारी गरिए पनि रौतहटको गौर क्षेत्रमा आगजनीका घटना रोकिएका छैनन्। जिल्ला प्रशासन कार्यालयले कर्फ्यू लगाएर नेपाली सेनासमेत परिचालन गरेपछि मुख्य सडक क्षेत्र शान्त देखिए पनि भित्री बस्तीहरूमा भने तनाव कायमै रहेको छ।
शनिबार दिउँसो गौर नगरपालिका–४ मचकुटिया टोलमा एउटा स्कुटरमा आगजनी गरिएको छ। यससँगै हालसम्म प्रदर्शनकारीहरूद्वारा ६ वटा मोटरसाइकल र २ वटा जिपमा आगजनी भएको पुष्टि भएको छ।
गौर नगरपालिका–६ स्थित सनगढा गाउँमा दुई समुदायबीच भएको झडप उग्र बन्दै गएपछि अवस्था तनावग्रस्त बनेको हो। मुस्लिम समुदाय मस्जिदमा प्रार्थनामा रहेको बेला हिन्दु समुदायले बाजा बजाएको विषयलाई लिएर विवाद सुरु भएको बताइएको छ। विवाद चर्किँदै जाँदा गौरका वडा नम्बर ४, ५ र ६ मा झडप भएको थियो।
स्थिति नियन्त्रणमा लिन प्रहरीले हवाई फायर गर्नुका साथै अश्रुग्यास प्रहार गरेको थियो। झडपका क्रममा केही सवारी साधनमा आगजनी हुनुका साथै घरमा तोडफोडसमेत भएको प्रहरीले जनाएको छ। घटनामा केही व्यक्ति सामान्य घाइते भएका छन्।
थप हिंसा फैलिन सक्ने आकलन गर्दै जिल्ला प्रशासन कार्यालयले शनिबार दिउँसो १ बजेदेखि कर्फ्यू आदेश जारी गरेको छ। प्रशासनको सूचनाअनुसार पूर्वतर्फ मुडबलवा गेट, पश्चिमतर्फ लालबकैया बाँध, उत्तरतर्फ बम नहर र दक्षिणतर्फ गौर भन्सार कार्यालयसम्म कर्फ्यू लागू गरिएको प्रमुख जिल्ला अधिकारी दिनेश सागर भूसालले जानकारी दिएका छन्।
सुरक्षाकर्मीहरूको उपस्थितिका बीच अवस्था नियन्त्रणमा ल्याउने प्रयास जारी रहेको प्रशासनले जनाएको छ।
