15/09/2026
सरकारी तथा राजनीतिक पदको झुटो परिचय दिँदै हिँड्ने व्यक्ति पक्राउ
झापा । विभिन्न सरकारी तथा राजनीतिक पदमा रहेको भन्दै झुटो परिचय दिई सरकारी कार्यालय, बैठक तथा शैक्षिक संस्थामा प्रवेश गर्ने र दबाब तथा धाकधम्की दिने गरेको आरोपमा झापाबाट एक युवक पक्राउ परेका छन्।
पक्राउ पर्नेमा हल्दिबारी गाउँपालिकाका २६ वर्षीय सुजन विश्वकर्मा रहेका छन्। जिल्ला प्रहरी कार्यालय झापाका अनुसार विश्वकर्माले आफूलाई राष्ट्रिय स्वतन्त्र पार्टी (रास्वपा)को केन्द्रीय सदस्य तथा प्रधानमन्त्री कार्यालयको सचिवालय सदस्य रहेको भन्दै परिचय दिने गरेका थिए।
प्रहरीले गरेको प्रारम्भिक अनुसन्धानबाट उनले दाबी गरेका पद तथा जिम्मेवारी वास्तविक नभएको खुलेको जनाएको छ।
विश्वकर्मालाई पक्राउ गरी झापा जिल्ला अदालतबाट पाँच दिनको म्याद थप गरिएको छ। उनीमाथि थप अनुसन्धान भइरहेको प्रहरीले जनाएको छ।
प्रहरीले विश्वकर्माले झुटो परिचय दिई कसैबाट लाभ लिएको वा कसैलाई कुनै किसिमको हानि–नोक्सानी पुर्याएको भए जिल्ला प्रहरी कार्यालय झापामा सम्पर्क गरी जानकारी गराउन अनुरोध गरेको छ।
