Hello Samaj, Kathmandu (2026)

06/06/2026

नेकपाका नेता वर्षमान पुनले राष्ट्रिय स्वतन्त्र पार्टी (रास्वपा) को सरकारले मुलुकको आवश्यकताअनुसार आर्थिक वृद्धि र रोजगारी सिर्जना गर्ने गरी बजेट ल्याउन नसकेको आरोप लगाएका छन्। नेपाल व्यवस्थापन संघद्वारा आयोजित आगामी आर्थिक वर्ष २०८३/०८४ को पोष्ट बजेटसम्बन्धी अन्तरक्रियामा बोल्दै नेता पुनले वर्तमान बजेटले कुनै पनि क्षेत्रमा नतिजा दिने गरी ‘फोकस’ गर्न नसकेको दाबी गरे।

लोकप्रियतावादी (पपुलिष्ट) सरकारले सबैले भन्दै आएका कर्णप्रिय कार्यक्रमहरू समावेश गरेको भए पनि त्यसले आर्थिक समृद्धिको दिशामा ठोस नतिजा दिन नसक्ने टिप्पणी पुनले गरे। "बजेटमा केही चिजमा ‘फोकस’ गरिएको छैन," पुनले भने, "पपुलिज्मको विशेषता भनेकै सबैले भनेका कर्णप्रिय लाग्ने कुरा भन्ने हो, तर त्यो पूरा होस् नहोस् मतलब हुँदैन।" सयबुँदे कार्यक्रम बनाउँदा पनि सबै राष्ट्रिय दलका एजेन्डा समेटिए पनि सरकारको आफ्नो स्पष्ट नीति, विचार, राजनीति र प्रवृत्ति कतै नदेखिएको पुनको भनाइ छ।

बजेटमा सबै कुरा समेटिएको र विगतका पार्टीहरूले थालेका कार्यक्रमको निरन्तरता जस्तो देखिए पनि सारमा केही नभएको जस्तो अवस्था रहेको पुनले औँल्याए। सरकारले नीति, कार्यक्रम र बजेटमार्फत कुन क्षेत्रबाट आर्थिक वृद्धि, देशको रूपान्तरण र रोजगारीका अवसर सिर्जना गर्न चाहेको हो भन्ने स्पष्ट दिशा लिन नसकेको उल्लेख गर्दै पुनले वर्तमान बजेट हेर्दा, सुन्दा र छाम्दा देखिने तर नतिजा र प्राथमिकता नदेखिने खालको रहेको टिप्पणी गरे।

06/06/2026

नेकपाका युवा नेता रञ्जित तामाङले देशको वर्तमान राजनीतिक अवस्थाप्रति गम्भीर आत्मसमीक्षा गर्दै नयाँ राजनीतिक एजेन्डा र विचारमा बहस गर्नुपर्ने आवश्यकता औँल्याएका छन्। सामाजिक सञ्जालमार्फत आफ्नो धारणा सार्वजनिक गर्दै नेता तामाङले विचार र सिद्धान्तविहीन राजनीतिले मुलुकलाई सही दिशा दिन नसक्ने दाबी गरे।

तामाङका अनुसार जब समग्र राजनीतिको मूल विचार नै फेल हुन्छ, तब जतिसुकै बलियो संगठन, राम्रो व्यवस्थापन र लोकप्रिय छवि भए पनि त्यसले मात्रै व्यवस्था वा दललाई धान्न सक्दैन। समाज र राजनीतिको अन्तरसम्बन्धलाई चिकित्सा विज्ञानसँग तुलना गर्दै तामाङले भनेका छन्, "समाजका लागि राजनीति फेल हुनु र मानिसका लागि ब्रेन हेमरेज हुनु उस्तै हो।"

नेपाली राजनीतिमा अहिले ठ्याक्कै यही परिस्थिति निर्माण भएको उल्लेख गर्दै तामाङले परम्परागत ढर्राको उपचार खोज्नुभन्दा पनि अब नयाँ राजनीतिको जग बसाल्नका लागि बृहत् बहस र छलफल सुरु गर्नुपर्नेमा जोड दिएका छन्।

06/06/2026

नेकपाका सहसंयोजक माधव नेपालले देशभित्रै पर्याप्त रोजगारीका अवसरहरू सिर्जना हुन नसक्दा नेपाली नागरिकहरू कामको खोजीमा विदेशतिर चहार्नुपर्ने बाध्यता उत्पन्न भइरहेको बताएका छन्। नेपालले राज्यले निजी क्षेत्र र उद्यमशीलतालाई प्रोत्साहन गर्ने खालका लचिलो नीतिहरू अवलम्बन गर्नुपर्नेमा जोड दिए।

सुनचाँदी कला व्यवसायले थुप्रै व्यक्तिहरूलाई उद्यमशील बन्न उत्प्रेरित गर्नुका साथै मुलुकभित्र रोजगारी र जीवनयापनको बलियो आधार खडा गरेको सहसंयोजक नेपालले उल्लेख गरे। "यो संस्थाले थुप्रै व्यक्तिहरूलाई व्यवसाय सञ्चालन गर्न उत्प्रेरित गरेको छ, जीवनयापनमा यसले मद्दत पुर्‍याएको छ, रोजगारी प्रदान गरेको छ, र अझै पनि यसका सम्भावनाहरू राम्रा छन्," नेपालले भने, "राज्यले रोजगारी सृष्टि गर्ने हो र रोजगारीका जुन–जुन सम्भावनाहरू छन् त्यसलाई प्रोत्साहित गर्ने हो।"

राज्यका विभिन्न नीतिगत झन्झटका कारण व्यापार व्यवसाय प्रभावित हुने गरेको संकेत गर्दै सहसंयोजक नेपालले कुनै पनि देशभित्र चल्ने व्यवसायमा प्रतिकूल असर नपर्ने र त्यसको विकासमा बाधा उत्पन्न नहुने वातावरण बनाउन सरकारको ध्यानाकर्षण गराए। नागरिकहरू देशभित्रै रोजगारी नपाएर संसारभर भौँतारिने स्थिति अन्त्य गर्नका लागि पनि परम्परागत तथा रैथाने सीपमा आधारित व्यवसायहरूको संवर्द्धन आवश्यक रहेको नेपालको भनाइ थियो।

06/06/2026

सूचना तथा सञ्चारमन्त्री डा. विक्रम तिमिल्सिनाले देश नयाँ राजनीतिक संस्कारतर्फ अग्रसर भइरहेको बताउँदै मन्त्रालय तथा सरकारी निकायमा हुने ‘सेटिङ’ विकृति र बिचौलियातन्त्रको प्रभाव अन्त्य हुँदै गएको दाबी गरेका छन्। राष्ट्रिय स्वतन्त्र पार्टी (रास्वपा) नुवाकोटको प्रथम जिल्ला अधिवेशन उद्घाटन समारोहलाई आज सम्बोधन गर्दै सञ्चारमन्त्री तिमिल्सिनाले नागरिक सेवा प्रवाहलाई भ्रष्टाचारमुक्त, पारदर्शी र उत्तरदायी बनाउने दिशामा सरकार दृढताका साथ लागिरहेको बताए।

"सरकार र मन्त्रीलाई प्रलोभनमा पारेर निर्णय प्रभावित गर्ने बिचौलियातन्त्रका नाइकेहरूको भूमिका समाप्त हुँदै गएको छ," सञ्चारमन्त्री तिमिल्सिनाले भने, "वडातहदेखि नै राजनीतिक संस्कार परिवर्तन गर्न आवश्यक छ र राजनीति कस्तो हुनुपर्छ भन्ने उदाहरण हामीले प्रस्तुत गर्नुपर्छ।" शक्ति, पहुँच वा प्रभावका आधारमा बजेट बाँडफाँट गर्ने विगतको गलत अभ्यास अन्त्य भएको जिकिर सञ्चारमन्त्री तिमिल्सिनाको थियो। दुई–तीन महिनामै सबै अपेक्षा पूरा हुन नसक्ने उल्लेख गर्दै सरकारले लिएको दिशा, गरिएका निर्णय र कार्यविधिको आधारमा मूल्याङ्कन हुनुपर्नेमा सञ्चारमन्त्री तिमिल्सिनाले जोड दिए। दलभित्र प्यानल वा गुटगत राजनीतिले छविलाई धुमिल बनाउने भन्दै आग्रह–पूर्वाग्रह त्यागेर सहकार्यको वातावरण बनाउन सञ्चारमन्त्री तिमिल्सिनाले आह्वान गरे।

कार्यक्रममा बोल्दै रास्वपाका सांसद बोधनारायण श्रेष्ठले नुवाकोट र धादिङ जिल्लाका साझा समस्या तथा विकासका मुद्दाहरूलाई संयुक्त रूपमा सम्बोधन गर्नुपर्ने आवश्यकता औँल्याए। नेतृत्व समस्या नभई समाधानको माध्यम हुनुपर्ने धारणा राख्दै सांसद श्रेष्ठले जिल्ला अधिवेशनबाट समस्याको समाधान गर्न सक्ने सक्षम नेतृत्वकर्ता छानिएर आउने विश्वास व्यक्त गरे।

06/06/2026

पूर्वप्रधानमन्त्री सुशीला कार्कीले आफ्नो आगामी जीवन पूर्ण रूपमा साहित्य क्षेत्रमै व्यतित गर्ने घोषणा गरेकी छन्। ललितपुरमा आयोजित ‘काठमाडौं कलिङ्ग साहित्य महोत्सव’लाई सम्बोधन गर्दै कार्कीले समाजले आफूलाई केवल पूर्वप्रधानन्यायाधीश वा पूर्वप्रधानमन्त्रीका रूपमा मात्र नभई एक सच्चा साहित्य अनुरागीका रूपमा बुझिदिन आग्रह गरिन्।

न्यायपालिका र कार्यपालिकामा आफूले निर्वाह गरेको भूमिका बाध्यता र कर्तव्यको उपज मात्र भएको प्रष्ट पार्दै कार्कीले साहित्य भने आफ्नो अन्तर्मनको वास्तविक रुचि भएको बताइन्। "मलाई न्याय र राजनीतिमा मात्र सीमित नगर्नुहोस्, म साहित्य अनुरागी पनि हुँ," कार्कीले भनिन्। सम्बोधनका क्रममा कार्कीले आफ्नो विगतको साहित्यिक यात्राको स्मरण गर्दै सन् १९९० को जनआन्दोलनका क्रममा जेल पर्दाको अनुभव समेत सुनाइन्।

दुई महिनाको जेल जीवनमा त्यहाँका महिला बन्दीहरूको पीडा र भोगाइलाई नजिकबाट नियालेपछि आफूले ‘कारा’ नामक उपन्यास लेखेको कार्कीको भनाइ थियो। सेवा निवृत्त भएपछि मात्र प्रकाशनमा ल्याइएको सो उपन्यासबाहेक आफूसँग अझै धेरै कथा र उपन्यासका अवधारणाहरू र आधा लेखिएका पाण्डुलिपिहरू सुरक्षित रहेको जानकारी दिँदै कार्कीले ती कृतिहरूलाई चाँडै पाठकमाझ ल्याउने आफ्नो योजना रहेको खुलासा गरिन्। नेपाल र भारतका ख्यातिप्राप्त कवि तथा लेखकहरूको बाक्लो उपस्थिति रहेको सो कार्यक्रममा कार्कीको प्राज्ञिक रूपको विशेष चर्चा भएको थियो।

06/06/2026

राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीभित्र हुर्किन थालेको ‘योगदानको हिसाब-किताब खोज्ने’ र ‘पदका लागि मरिहत्ते गर्ने’ प्रवृत्तिको कडा आलोचना गरेका छन्। पहिलो महाधिवेशनको प्रक्रिया अन्तर्गत जेठ २३ र २४ गते देशभर जिल्ला अधिवेशनहरू भइरहेको सन्दर्भमा सामाजिक सञ्जालमार्फत कार्यकर्तालाई सम्बोधन गर्दै सभापति लामिछानेले यस्तो बताएका हुन्।

वडा र पालिका तहका अधिवेशनहरू सफलतापूर्वक सम्पन्न भइसकेको जानकारी दिँदै उनले महाधिवेशनलाई केवल नेतृत्व चयनको प्रक्रिया मात्र नभई पार्टीको स्वस्थ परम्परा निर्माण गर्ने ऐतिहासिक अवसर भएको उल्लेख गरेका छन्।
पार्टीभित्र देखिएका केही नकारात्मक प्रवृत्तितर्फ संकेत गर्दै लामिछानेले भनेका छन्, “स्थापनाकालमा सीमित दायरामा सहमतिका आधारमा बाँडिएका तदर्थ जिम्मेवारीलाई स्थायी मानक मानेर पदोन्नतिको अपेक्षा राख्ने वा ‘योगदान’को हिसाब-किताब खोज्ने प्रवृत्ति पार्टी जीवनका लागि हितकर हुँदैन। चार वर्षमै यस्तो प्रवृत्तिले जरा गाड्न खोज्नु चिन्ताको विषय हो, जसलाई हामीले समयमै सच्याउनुपर्छ।”

उनले भविष्यमा संसदीय अवसर पाउने आशयले पार्टीको नेतृत्व हत्याउन खोज्नेहरूलाई पनि सचेत गराएका छन्। “पार्टी जिम्मेवारीमा रहेर भविष्यमा संसदीय अवसर प्राप्त गर्ने आशयले नेतृत्वका लागि मरिहत्ते गर्ने प्रवृत्ति पनि कहिलेकाहीँ देखिएको छ। यस्ता प्रवृत्तिलाई अधिवेशनकै लोकतान्त्रिक प्रक्रियाबाट न्यूनीकरण गर्नु आजको आवश्यकता हो,” उनले भनेका छन्।

सभापति लामिछानेले रास्वपालाई वैकल्पिक शक्तिबाट मुलुककै नेतृत्व गर्ने सक्षम राजनीतिक शक्ति बनाउने लक्ष्य रहेको सुनाउँदै संगठन विस्तार हुँदा पुरानो पुस्ताले 'म रहन्न कि' भन्ने संकीर्ण चिन्ता त्याग्नुपर्नेमा जोड दिएका छन्। उनले पार्टी अब 'म' बाट 'हामी' मा रूपान्तरण हुनुपर्ने बताएका छन्।

पार्टीको उन्नत लोकतान्त्रिक छवि निर्माणका लागि शैली र व्यवहार पनि परिष्कृत हुनुपर्ने भन्दै लामिछानेले भनेका छन्, “पुरानै सोच, शैली र प्रवृत्ति बोकेर हामी नयाँ र परिस्कृत जनमैत्री शक्ति बन्न सक्दैनौं। विचार मात्र होइन, हाम्रो शैली, व्यवहार र राजनीतिक संस्कार पनि उन्नत हुनुपर्छ।”

सहमति र आन्तरिक निर्वाचनजस्ता लोकतान्त्रिक विधिबाट सक्षम, इमानदार र जनमैत्री नेतृत्व चयन गर्न उनले देशभरका पार्टी सदस्यहरूलाई आह्वान गरेका छन्। रास्वपाको पहिलो ऐतिहासिक महाधिवेशन प्रक्रियालाई सभ्य र सन्देशमूलक बनाउन उनले शुभकामना समेत व्यक्त गरेका छन्।

06/06/2026

सन् १९९८ पछि पहिलो पटक फिफा विश्वकपको मैदानमा उत्रिन लागेको नर्वेली टोली यतिबेला एउटा विशेष कारणले विश्वभर चर्चामा छ। मैदानमा फुटबल जर्सी र सर्ट्समा देखिने एर्लिङ हालान्ड र उनको टोली यसपटक भने हातमा ढाल र हतियार बोकेको प्राचीन ‘भाइकिङ’ योद्धाको अवतारमा देखिएका छन्।

विश्वकप २०२६ को तयारीमा रहेको नर्वेली फुटबल एसोसिएसनले आफ्नो टोलीको ‘विदाईका लागि परम्परागत तरिका त्याग्दै ऐतिहासिक थिम रोजेको हो। सामान्यतया खेलाडीहरू विमानको सिँढीमा उभिएर औपचारिक पोसाकमा फोटो खिचाउने गर्छन्, तर नर्वेली टोलीले भने आफ्नै देशको प्राचीन सभ्यता र गौरव झल्काउने बाटो रोज्यो।

प्रख्यात बेलायती फोटोग्राफर डेभिड यारोले खिचेको यो तस्बिरको शीर्षक ‘द भाइकिङ्स आर कमिङ’ (भाइकिङहरू आउँदैछन्) राखिएको छ। नर्वेको प्रसिद्ध ‘फजोर्ड’ (Fjord) को किनारमा खिचिएको यस तस्बिरमा टोलीका सबै २६ खेलाडीहरू प्राचीन भाइकिङ पोसाक, जुत्ता र हतियारमा सजिएका छन्।
फोटोग्राफर यारोका अनुसार, म्यान्चेस्टर सिटीका स्टार स्ट्राइकर एर्लिङ हालान्डलाई यो अवतारमा ढाल्न खासै मेहनत गर्नु परेन। "विश्वमा यदि कुनै यस्तो खेलाडी छ जसलाई भाइकिङ जस्तो देखिन धेरै मेकअप वा कपाल बनाउनु पर्दैन भने, ती हालान्ड नै हुन्," यारोले भने।

यो फोटोसुटको अर्को रोचक पक्ष भनेको खेलाडीहरू बीचको समानता हो। फोटोग्राफर यारोले करोडौँ डलर मूल्यका स्टार खेलाडी एर्लिङ हालान्ड र टोलीका तेस्रो रोजाइका गोलकिपरलाई एउटै फ्रेममा बराबर स्थान दिएका छन्। उनले भने, "यो हालान्ड र अन्य २४ जनाको तस्बिर होइन, यो एउटा सिङ्गो टोलीको तस्बिर हो। टोलीमा एकताको भावना जगाउनु नै मेरो मुख्य उद्देश्य थियो।"
टोलीका कप्तान मार्टिन ओडेगार्ड आर्सनलबाट च्याम्पियन्स लिगको फाइनल खेलेर ढिलो आइपुगेका कारण उनको तस्बिर पछि खिचेर डिजिटल प्रविधिमार्फत टोलीको समूहमा मिसाइएको थियो।

यो ऐतिहासिक फोटोसुट केवल चर्चाका लागि मात्र नभई सामाजिक सेवाका लागि पनि गरिएको हो। तस्बिरको बिक्रीबाट संकलित रकम नर्वेका विभिन्न परोपकारी संस्थाहरूलाई सहयोग स्वरूप प्रदान गरिने बताइएको छ। फोटोग्राफर यारोले यसअघि सन् १९८६ को विश्वकपमा म्याराडोनाले ट्रफी उचालेको विश्वप्रसिद्ध तस्बिर खिचेर ख्याति कमाएका थिए।

विश्वकप २०२६ मा नर्वेको यो भाइकिङ टोलीले मैदानमा कस्तो प्रदर्शन गर्छ, त्यो त समयले नै बताउनेछ। तर, प्रतियोगिता सुरु हुनुअघि नै उनीहरूको यो आक्रामक र ऐतिहासिक अवतारले फुटबल प्रेमीहरूको मन भने जितिसकेको छ।

06/06/2026

काठमाडौंको तारकेश्वर नगरपालिका–६, लोलाङ पैँयुटारमा शुक्रबार साँझ एउटा घरेलु विवादले जिउँदो समाजको मुटु चिरिदियो। आफूलाई 'नेपाली ब्रो' नामले चिनाउने रेस्लर ४२ वर्षीय कुमार थापा मगरले आफ्नै ४२ वर्षीया श्रीमती ईश्वरी भुजेलको फलामको रड प्रहार गरी निर्मम ह*त्या गरेका छन्। ईश्वरी नेपाली सेनामा कार्यरत थिइन् । कामबाट स्कुटीमा फर्किने बेला घर अगाडि नै यो ज्यादती भएको थियो । रडको प्रहारबाट टाउकोमा गम्भीर चोट लागेकी उनलाई तत्काल स्थानीय अस्पताल पुर्‍याइए पनि अत्यधिक रक्तस्रावका कारण त्रिवि शिक्षण अस्पताल, महाराजगन्जमा उपचारका क्रममा उनको निधन भयो। यो घटना नेपाली समाजमा घरेलु हिंसाको अर्को पीडादायी उदाहरण बनेको छ।

उनीहरूबीच लामो समयदेखि सम्बन्ध बिग्रिँदै गएको थियो। प्रहरीका अनुसार उनीहरू सम्बन्ध बिच्छेदको तयारीमा थिए। घरायसी कलह र तनावले उनीहरूको वैवाहिक जीवनलाई चिन्ताग्रस्त बनाएको थियो। 'नेपाली ब्रो' ले ईश्वरी कामबाट फर्किने समय थाहा पाएर बाटोमा नै ढुकेर बसेका थिए र घर पुग्नासाथ आक्रमण गरेका थिए।

प्रत्यक्षदर्शीहरूले घाइते अवस्थामा उनलाई अस्पताल पुर्‍याए पनि समयले साथ दिएन। कुमारलाई घटनाको केही घण्टामै बालाजुबाट पक्राउ गरिएको छ। उनी जिल्ला प्रहरी परिसर भद्रकालीको हिरासतमा छन्। प्रहरीले कर्तव्य ज्यान मुद्दामा थप अनुसन्धान अघि बढाएको छ।

ईश्वरी जस्ती एक जिम्मेवार सैनिकले आफ्नो कर्तव्य निर्वाह गर्दागर्दै आफ्नै घरको आँगनमा यस्तो क्रूरता भोग्नुपर्नु दुःखद् र मार्मिक छ। उनीहरूको वैवाहिक जीवनको अन्त्य यति अमानवीय रूपमा हुनुले धेरैलाई स्तब्ध बनाएको छ।

शान्ति र समृद्धिको खोजीमा व्यस्त नेपाली समाजमा यस्ता घटनाहरूले मानवीय संवेदनालाई घाइते बनाउँछन्। ईश्वरीको आत्माले शान्ति पाओस्। यो दुःखद् घटनाबाट सिक्दै अरू कुनै परिवारले यस्तो पीडा नभोगोस् भन्ने कामना गराैँ।

06/06/2026

राष्ट्रिय स्वतन्त्र पार्टी (रास्वपा) को संगठनात्मक नीति र केन्द्रीय समितिको निर्णय बमोजिम देशभर एकैसाथ जिल्ला अधिवेशनहरू सुरु भएका छन्। रास्वपाका महामन्त्री कविन्द्र बुर्लाकोटीका अनुसार जेठ २३ र २४ गते देशभरका ६६ जिल्लामा र विशेष परिस्थितिका कारण बारामा जेठ २६ गते गरी कुल ६७ जिल्लामा अधिवेशन सम्पन्न गर्ने तयारी गरिएको छ।

कार्यतालिका अनुसार आज जेठ २३ गते देशभरका ३७ जिल्लाहरूको अधिवेशन एकैसाथ सम्पन्न हुँदैछ। जसमा कोशी प्रदेशका ८, मधेशका २, बागमतीका ९, गण्डकीका ५, लुम्बिनीका ८, कर्णालीका २ र सुदूरपश्चिम प्रदेशका ३ जिल्लाहरू रहेका छन्। यसैगरी भोलि जेठ २४ गते बाँकी २९ जिल्लाहरूको अधिवेशन सम्पन्न हुनेछ। जसमा कोशीका ४, मधेशका ४, बागमतीका २, गण्डकीका ४, लुम्बिनीका ३, कर्णालीका ६ र सुदूरपश्चिमका ६ जिल्लाहरू समावेश छन्।

पार्टीको ऐतिहासिक प्रथम राष्ट्रिय महाधिवेशन अगावै मुख्य संगठन रहेका अधिकांश जिल्लाहरूको अधिवेशन सम्पन्न गर्ने रास्वपाको रणनीति रहेको छ। बाँकी रहेका १० जिल्लाहरूको अधिवेशन भने राष्ट्रिय महाधिवेशन पश्चात् क्रमशः गरिने महामन्त्री बुर्लाकोटीले जानकारी दिए। जिल्ला अधिवेशनहरू सकिएलगत्तै जेठ २६ गतेदेखि सातै प्रदेशको अधिवेशन सुरु हुने र पहिलो प्रदेश अधिवेशन बागमती प्रदेशबाट प्रारम्भ हुने कार्यतालिका सार्वजनिक गरिएको छ।

06/06/2026

स्वास्थ्य तथा खाद्य स्वच्छता मन्त्रालयकी मन्त्री निशा मेहताले औषधी व्यवस्था विभाग र राष्ट्रिय औषधी प्रयोगशालाको स्थलगत भ्रमण गरेकी छन्। भ्रमणका अवसरमा मन्त्री मेहताले विभाग तथा प्रयोगशालाका पदाधिकारीहरूसँग हालको वस्तुस्थितिबारे गहन छलफल गर्दै औषधी आपूर्ति र गुणस्तर नियन्त्रणका लागि ६ बुँदे निर्देशन दिएकी छन्।

मन्त्री मेहताले हाल बजारमा अभाव देखिएका अत्यावश्यक औषधीहरूको आपूर्ति तथा व्यवस्थापनलाई सहज बनाउन तत्काल प्रक्रिया अगाडि बढाउन निर्देशन दिइन्। यसैगरी, हालसम्म औषधी आपूर्ति र वितरणको अनुमति प्राप्त गरेर पनि बजारमा नियमित आपूर्ति नगर्ने आपूर्तिकर्ताहरूको तत्काल नियमन कार्य अघि बढाउन मन्त्रालयको स्पष्ट निर्देशन छ। अनुमतिका लागि निवेदन र कागजात पेस गरेर पनि प्रक्रियामा अड्किएका कम्पनीहरूको हकमा तत्काल स्थलगत निरीक्षण तथा आवश्यक जाँचबुझ गरी प्रक्रिया अगाडि बढाउन भनिएको छ।

विभागको नियमन क्षमता अभिवृद्धि गर्न सबै प्रकारका कदम चाल्ने गरी तयारी थाल्न निर्देशन दिँदै मन्त्री मेहताले औषधी आपूर्ति व्यवस्थापनलाई सहज र गुणस्तरीय बनाउन आवश्यक पर्ने अतिरिक्त स्रोतसाधन र जनशक्तिको विवरण तत्काल पेस गर्न विभागलाई सचेत गराइन्। यसका साथै, नेपाल सरकारबाट निःशुल्क वितरण गरिने औषधीहरू र स्वास्थ्य बीमाअन्तर्गत नागरिकले पाउने औषधीहरूको गुणस्तर परीक्षणलाई बढी प्रभावकारी र विश्वसनीय बनाउन आवश्यक व्यवस्थापन गर्न मन्त्री मेहताले निर्देश गरेकी छन्।

Hello Samaj

06/06/2026

06/06/2026

06/06/2026

06/06/2026

06/06/2026

06/06/2026

06/06/2026

06/06/2026

06/06/2026

06/06/2026

Address

Telephone

Website

Alerts

Contact The Business

Shortcuts

Share

Category