07/09/2026
दसैँ नजिकिँदै गर्दा नरहरिनाथमा फुटबल प्रतियोगिताको लागि युवाहरुको माग ।
दसैँ नजिकिँदै गर्दा कालिकोट जिल्लाका विभिन्न स्थानीय तहमा खेलकुद प्रतियोगिताको तयारी भइरहेका बेला नरहरिनाथ गाउँपालिकामा भने यस वर्ष फुटबल प्रतियोगिता आयोजना हुने वा नहुने विषयमा युवाहरूले चासो व्यक्त गरेका छन्।
गत वर्ष पचालझरना गाँउपालिकाले आयोजना गरेको फुटबलतर्फ नरहरिनाथ गाउँपालिकाले दोस्रो स्थान हासिल गरेको स्मरण गर्दै स्थानीय युवाहरूले त्यसबेला पालिका अध्यक्षज्यूबाट प्राप्त हौसला र प्रतिबद्धता कार्यान्वयनको अपेक्षा राखेका छन्।
दसैँजस्तो चाडपर्वको समयमा फुटबल प्रतियोगिता आयोजना गर्दा स्थानीय खेलाडीहरूले प्रतिभा प्रदर्शन गर्ने अवसर पाउने, युवाहरूबीच आपसी सद्भाव बढ्ने तथा नयाँ पुस्तालाई खेलकुदतर्फ आकर्षित गर्न सहयोग पुग्ने उनीहरूको भनाइ छ।
“अरू पालिकामा फुटबलको माहोल बनिसक्यो, हाम्रो पालिकामा पनि प्रतियोगिता आयोजना होस् भन्ने अपेक्षा छ,” युवाहरूको भनाइ छ।
उनीहरूले पालिकासँग दसैँअघि फुटबल प्रतियोगिता आयोजना गर्ने विषयमा आवश्यक पहल गर्न आग्रह गरेका छन्। साथै, प्रतियोगिता आयोजना गर्न कठिनाइ भए त्यसको कारण र सम्भावित योजनाबारे स्पष्ट जानकारी गराउनसमेत माग गरेका छन्।
युवाहरूले खेलकुदमा लगानी, स्थानीय खेलाडीलाई अवसर र प्रतिभाको सम्मानलाई प्राथमिकतामा राख्नुपर्ने बताएका छन्।
दसैँअघि फुटबल प्रतियोगिता आयोजना हुन्छ कि हुँदैन भन्ने विषयमा अब पालिकाको निर्णय र आधिकारिक धारणा सार्वजनिक हुन बाँकी छ।
स्रोत: कमल बिष्ट
