20/08/2026
दुई दिनपछि जंगलमा हराएका साढे दुई वर्षीय बालक सकुशल फेला
गैँडाकोट, ४ भदौ ।
गैँडाकोट–१४, माथिल्लो भागरस्थित मामाघरबाट हराएका साढे दुई वर्षीय बालक सिवान तामाङ दुई दिनपछि सकुशल फेला परेका छन्।
मंगलबार बिहान हजुरआमा यामकुमारी आले मगर च्याउ खोज्न शंखदेवी सामुदायिक वनतर्फ जाने क्रममा सिवान पनि पछि–पछि जंगलतर्फ पुगेका थिए। सोही क्रममा बाटो बिराएर उनी घनघोर जंगलमा हराएका थिए।
सिवानका आमाबुवा रोजगारीका सिलसिलामा भारतमा रहेका कारण उनी विगत डेढ वर्षदेखि मामाघरमै बस्दै आएका थिए।
बालक हराएको जानकारी पाएलगत्तै नेपाल प्रहरी, सशस्त्र प्रहरी बल, स्थानीय जनप्रतिनिधि तथा स्थानीयवासीले संयुक्त रूपमा खोजी अभियान सञ्चालन गरेका थिए। रातदिन नभनी गरिएको व्यापक खोजीका क्रममा दुई दिनपछि बालकलाई सकुशल फेला पारिएको हो।
