Bahujan Aawaj.com

04/09/2024

चूपचाप दिनहुँ ५० मान्छे मारिरहेको क्षयरोग
------------------------------------------------------------------
सन् २०५० सम्म विश्वबाटै क्षयरोग उन्मूलन गर्ने लक्ष्य राखिए झैं नेपालको पनि २०३५ सालसम्म क्षयरोग अन्त्य गर्ने लक्ष्य छ।
तर जसरी यो रोग फैलिरहेको छ, त्यसले सरकारले तोकेको समयसीमाभित्र निमिट्यान्न हुनेमा राष्ट्रिय क्षयरोग नियन्त्रण केन्द्रका निर्देशक प्रज्वल श्रेष्ठ नै विश्वस्त छैनन्। “समाजमा जसरी यो रोग फैलिइरहेको देखिन्छ, क्षयरोग ‘माइक्रोब्याक्ट्रेरियम ट्यूबरक्लोसिस ब्याक्टेरिया’ द्वारा फैलिने संक्रामक रोग हो, जसले मुख्यतः मान्छेको फोक्सोमा असर पार्छ। तर यो रोगले मिर्गौला, मेरुदण्ड, मस्तिष्क जस्ता अन्य अंगमाथि पनि आक्रमण गर्छ। यो खोकी, हाच्छिँउ र कुरा गर्दा श्वासप्रश्वासबाट सर्ने गर्छ। यो दुई प्रकारको हुन्छ- डिस टीबी अर्थात् सामान्य टीबी र डिआर टीबी अर्थात् जटिल खालको टीबी
यी टीबी सर्ने र नसर्ने दुवै खालका हुन्छन्। सरुवा- यसले रोगको लक्षण देखाउँछ र संक्रामक पनि हुन्छ। सक्रिय क्षयरोगका लक्षण भएका व्यक्तिलाई लामो समयसम्म खोकी लाग्छ। छाती दुख्छ, तौल घट्छ, ज्वरो आउँछ, रातमा पसिना बहन्छ र थकान महसूस हुन्छ। कहिलेकाहीं रगत मिसिएको खकार निस्कन्छ। क्षयरोगको समयमा उपचार नगराए यो प्राणघातक हुन सक्छ।
क्षयरोगलाई गरीबको रोग पनि भनिन्छ। आर्थिक अभावका कारण उचित खुराकको कमीले प्रतिरोधक क्षमतामा ह्रास आउने र क्षयरोग लाग्ने हुनाले यस्तो भनिएको हो। नेपाल जीवनस्तर सर्वेक्षण, २०७९/८० अनुसार नेपालमा गरीबीको रेखामुनि रहेका जनसंख्या करीब साढे ५८ लाख छ। गरीबी सँगसँगै जनघनत्व बढी हुने स्थानमा यो रोग फैलिइरहेको छ। जस्तै- मधेशमा २२.५३ प्रतिशत नागरिक गरीबीको रेखामुनि छन् भने जनसंख्याको घनत्व पनि बढी भएकाले क्षयरोगको असर बढी देखिन्छ।राष्ट्रिय क्षयरोग नियन्त्रण केन्द्रको तथ्यांकअनुसार, २०८० सालमा क्षयरोगीको संख्या ३७ हजार ४४७ देखिएको थियो, जसमध्ये जनघनत्व बढी हुने मधेशमा नौ हजार १६१, बागमतीमा आठ हजार ८४९ र लुम्बिनीमा सात हजार ७०६ जनामा क्षयरोग संक्रमण देखियो। यी तीन वटा प्रदेशमा मात्र ६८ प्रतिशत बिरामी छन्। केन्द्रले मधेशका आठ वटै जिल्लाका स्थानीय तहमा गई अध्ययन गरेको थियो। श्रेष्ठ भन्छन्, “गरीबी निवारण नभएसम्म क्षयरोग न्यूनीकरण गर्न सकिने अवस्था छैन।”
मधेशमा गरीबी मात्र छैन, अशिक्षा पनि निकै छ। मधेशमा सबैभन्दा कम साक्षरता दर (६३.५५ प्रतिशत) छ। त्यसैले क्षयरोग सम्बन्धी जनचेतना यी जिल्लामा कम रहेको निर्देशक श्रेष्ठ बताउँछन्। त्यसमाथि भारतसँगको बाक्लो सामाजिक सम्पर्कका कारण पनि उतैबाट संक्रमण फैलिएको पनि केन्द्रको आकलन छ।

04/09/2024

कपाल स्ट्रेट गर्नु हानिकारक !
-----------------------------------
केराटिन भनेको सामान्य रूपमा बुझ्दा प्रोटिन हो । जुन हाम्रो कपालमै पनि हुन्छ । केराटिन आफैँमा हानिकारक होइन । केराटिनले कपाललाई राम्रै गर्ने हो । केराटिनजस्ता रसायनिक तत्व कपाल स्ट्रेट गर्नलाई प्रयोग गर्छौँ । ती केराटिन रहिरहोस् भनेर अन्य रसायनिक तत्व प्रयोग गरिएको हुन्छ । त्यस्ता रसायनिक तत्वले चाहिँ कालान्तरमा कपाललाई हानि गर्छन् ।

तुरुन्तै हेर्दा त्यसको असर कपाल स्ट्रेट भएको देखिन्छ । राम्रो पनि देखिन्छ । तर कालान्तरमा कपाल टुक्रिने, खुइलिने, हाँगा फाटिने जस्ता समस्याहरू देखिन्छन् । त्यसैले केराटिन मात्र लगाउने हो फाइदाजनक नै हुन्छ । तर त्यसको प्रक्रिया हुन्छ त्यसले नकारात्मक असर गर्छ।आइरन गर्ने, कपाल स्ट्रेट पार्नका लागि केमिकल प्रयोग हुने, कलर गर्नलाई ब्लीच गरिन्छ । ब्लीच नगरेसम्म कलर लाग्दैन । त्यसले गर्दा कपाललाई हानि हुन्छ ।

04/09/2024

१७ वर्ष नपुग्दै विवाह गर्ने बालबालिका ७४ हजार
--------------------------------------------------------------
कानूनले २० वर्ष नपुगी विवाह गर्न निषेध गरे पनि देशमा कम उमेरमै घरजम गर्नेको संख्या ठूलो रहेको तथ्यांकले देखाएको छ।

राष्ट्रिय जनगणना, २०७८ को बालबालिका सम्बन्धी तथ्यांकीय प्रतिवेदनले २०७८ सालमा ७४ हजार २७२ जनाले १० देखि १७ वर्षको उमेरमै विवाह गरेको देखाएको हो। यसले देशमा बालविवाहको समस्या गम्भीर रहेको देखाएको छ।

१७ वर्षभन्दा कम उमेरमै विवाह गरेकामध्ये आधा जति ग्रामीण क्षेत्रका छन्। बाँकी अर्धशहरी र शहरी क्षेत्रमा बसोबास गर्ने बालबालिका छन्।

संख्याका आधारमा सबैभन्दा धेरै बालविवाहको समस्या मधेशमा देखिएको छ। मधेश प्रदेशमा १६ हजार ३४७ बालबालिकाको १७ वर्षभन्दा कम उमेरमै विवाह भएको पाइएको छ।

लुम्बिनीमा १३ हजार ७३८ जना बालबालिकाको विवाह भएको छ। तर कुल विवाहितमध्ये बालविवाह गर्नेको अनुपात कर्णालीमा सबैभन्दा धेरै २.६२ प्रतिशत छ। त्यस्तै, गण्डकीमा १.८७ प्रतिशत छ।

बाल्यकालमै विवाह भएकामध्ये ५३४ जना एकल भएको, १०७ जनाको पारपाचुके भएको र २२२ जना छुट्टिएको देखिएको छ।

जनगणनामा २० देखि २४ वर्ष उमेर पुगेका विवाहित बालबालिकालाई सोधिएको विवाहको उमेर सम्बन्धी प्रश्न अनुसार १४.१ प्रतिशत उत्तरदाताले आफ्नो विवाह १८ वर्ष नपुग्दै भएको उत्तर दिएका थिए। यसरी उत्तर दिएकामध्ये २१.९ प्रतिशत बालिका थिए। यसले पाँचमध्ये एक बालिकाको १८ वर्षको उमेर नपुग्दै विवाह भइरहेको देखिएको छ।

आर्थिक स्थिति अनुसार गरीब घरपरिवारमा जन्मिएका बालबालिकाको विवाह छिटै हुने गरेको पनि प्रतिवेदनले औंल्याएको छ। अति न्यून परिवारका २०.८ प्रतिशतको विवाह १८ वर्ष नपुग्दै हुने गरेकामा अति धनी परिवारका भने ४.९ प्रतिशतको मात्रै १८ वर्ष नपुग्दै विवाह भएको देखिएको छ।

प्रतिवेदनले नेपालमा बालबालिकाको वार्षिक वृद्धिदर नै ऋणात्मक रहेको देखाएको छ। २०६८ देखि २०७८ सालको एक दशकभरिमा नेपालमा बालबालिका (०-१७ वर्ष)को संख्या त्योभन्दा अघिल्लो दशकका तुलनामा पाँच लाख ११ हजारले घटेको देखिएको छ।

04/09/2024

होमस्टेले फेरिएको मुक्त कमैया परिवार
---------------------------------------------------
सरकारले २४ वर्षअघि कमैया मुक्ति घोषणा गरे पनि प्रदेसनी चौधरीले मुक्तिको खास अनुभव बल्ल गरेकी छन्। विजयसाल सामुदायिक होमस्टेकी अध्यक्ष चौधरी भन्छिन्, “यति खुशी यसअघि कहिल्यै थिइनँ।”

आँगनमा इँटा, बालुवा र रड चाङ लागेका छन्। पर्खाल आधाउधी उठिसकेको छ। छानो ढलान हुन अब धेरै दिन कुर्न नपर्ला। भित्रपट्टि पुरानो घरमा बसेर नयाँ घरमा सर्ने दिन पर्खंदै छिन्, प्रदेसनी चौधरी।

यही ठाउँमा पहिले अझ पुरानो घर थियो, कच्ची गारो लगाएर सेउला-सेउलीले छोपिएको। जस्तो उनको जिन्दगी थियो, अढाई दशकअघिसम्म। नयाँ घर चाहिं इँटाले बनेको पक्की छ। जस्तो उनको जिन्दगी छ, अहिले। यी दुई घर सूचक हुन्, उनले पार गरेको यात्राको- गरीबी र थिचोमिचोदेखि मुक्ति र उन्नतिसम्मको।

यो परिवर्तनको जग हालिएको थियो, २४ वर्षअगाडि। देशमा सशस्त्र द्वन्द्व चलिरहँदा कञ्चनपुरको कृष्णपुर नगरपालिका-७, शान्तिपुरका बासिन्दा उनीहरू पनि मुक्ति खोजिरहेका थिए, जमीनदारको दासताबाट। तत्कालीन माओवादीले वर्गीय मुक्तिको नारा लगाइरहँदा ‘बेस’ नामक संस्था गाउँ गाउँ पुगेर कमैया मुक्तिको नारा लगाउँदै थियो। साहुको बारीमा सित्तैमा हड्डी घोट्नुलाई नै आजीवन कर्म-धर्म ठान्दै आएका कतिपय कमैया आफ्नो नियति विरुद्ध जागरूक हुँदै थिए। बैठक, आन्दोलनमा उनीहरूको उपस्थिति बढ्दै थियो। प्रदेसनीको घरबाट उनका ससुरा जान्थे।

२०५७ साउन २ गते सरकारले कमैया मुक्तिको घोषणा गर्‍यो ।

सरकारी तथ्यांक अनुसार त्यति वेला देशभर १८ हजार २९१ परिवार कमैया थिए। प्रदेसनीको परिवार सम्पत्तिका नाममा केही पनि नरहेको अर्थात् ‘क’ वर्गमा पर्‍यो। सरकारले मुक्ति घोषणा मात्र गर्‍यो, पुनःस्थापना गरिदिएन। त्यसैले उनीहरूले त्यसपछि पनि झन्डै डेढ वर्ष आन्दोलन गरे। बल्ल सरकारले जग्गा दिने भयो। प्रदेसनीको परिवारलाई वडा नं २ वाणीस्थित चार कट्ठा भागमा पर्‍यो। “संकटकाल थियो। त्यसैले जहाँ दिए त्यहीं लियौं। धेरै बोले माओवादीमा गन्दिन्छौं भन्थे आर्मीहरू,” उनी सुनाउँछिन्।

त्यो जग्गाको प्रमाण बापत हातमा सेतो पुर्जा आयो।

सोही ठाउँमा ५५८ मुक्त कमैया लहरै बसे। अहिले घर संख्या लगभग ६०० पुगेको छ। करीब एक किलोमिटर फैलिएको यो गाउँ पाँच वटा गल्लीमा बाँडिएको छ। नाम दिइएको छ- मुक्त कमैया बस्ती वाणी शिविर। प्रदेशनीको घर पहिलो गल्लीमा पर्छ।

04/09/2024

नेपालमा झन्डै तीन खर्ब वैदेशिक लगानी, सबैभन्दा बढी भारतको
---------------------------------------------------------------------
नेपालमा वैदेशिक लगानीको एकतिहाइभन्दा बढी हिस्सा भारतको देखिएको छ।

नेपाल राष्ट्र ब्यांकले सार्वजनिक गरेको प्रत्यक्ष वैदेशिक लगानी सम्बन्धी सर्वेक्षण प्रतिवेदन, २०७९/८० ले नेपालमा रहेको प्रत्यक्ष वैदेशिक लगानीको ३५ प्रतिशत हिस्सा भारतीय देखाएको हो। राष्ट्र ब्यांकले आर्थिक वर्ष २०७९/८० मा नेपालमा प्रत्यक्ष वैदेशिक लगानीमा सञ्चालित कम्पनीमध्ये कुल २३८ वटा कम्पनीको नमूना छनोट गरी सम्पन्न गरेको अध्ययनले नेपालमा ५८ देशका कम्पनीको प्रत्यक्ष वैदेशिक लगानी रहेको देखाएको छ।

केन्द्रीय ब्यांकका अनुसार नेपालमा कुल दुई खर्ब ९५ अर्ब ५० करोड रुपैयाँ वैदेशिक लगानी छ। यो अघिल्लो वर्षको तुलनामा ११.८ प्रतिशतले बढेको हो।

यसमध्ये भारतीय कम्पनीहरूको लगानी एक खर्ब तीन अर्ब ४५ करोड रुपैयाँ छ। भारतपछि नेपालमा प्रत्यक्ष वैदेशिक लगानी गर्नेमा चिनियाँ कम्पनी धेरै छन्। चिनियाँ लगानीकर्ताले नेपालमा ३५ अर्ब ४६ करोड रुपैयाँ लगानी गरेका छन्।

त्यस्तै, नेपालमा आयरल्यान्डबाट रु.२२ अर्ब ६२ करोड (७.७ प्रतिशत), अस्ट्रेलियाबाट रु.१९ अर्ब ६ करोड (६.४ प्रतिशत) र सिंगापुरबाट रु.१८ अर्ब ८१ करोड (६.४ प्रतिशत) प्रत्यक्ष वैदेशिक लगानी भएको छ।

नेपालमा प्रत्यक्ष वैदेशिक लगानीमध्ये ५९.७ प्रतिशत औद्योगिक क्षेत्रमा र ४०.२ प्रतिशत सेवा क्षेत्रमा रहेको देखिन्छ। औद्योगिक क्षेत्र अन्तर्गत जलविद्युत् क्षेत्रमा ३० प्रतिशत र उत्पादन क्षेत्रमा २९.४ प्रतिशत वैदेशिक लगानी छ। यसैगरी, कुल प्रत्यक्ष वैदेशिक लगानीमध्ये २६ प्रतिशत सेवा क्षेत्र अन्तर्गत ब्यांक तथा वित्तीय संस्था र बीमा कम्पनीमा रहेको देखिन्छ।

प्रदेशगत आधारमा भएको प्रत्यक्ष लगानीमध्ये सबैभन्दा बढी बागमती प्रदेशमा ५९.७ प्रतिशत रहेको सर्वेक्षणमा देखिएको छ। त्यसपछि क्रमशः गण्डकी प्रदेशमा १५.१ प्रतिशत, कोशी प्रदेशमा १४.७ प्रतिशत, मधेश प्रदेशमा ८.८ प्रतिशत छ भने लुम्बिनी, कर्णाली तथा सुदूरपश्चिम प्रदेशमा प्रत्यक्ष वैदेशिक लगानी एक प्रतिशतभन्दा कम देखिन्छ।

वैदेशिक लगानीमा सञ्चालित उत्पादनमूलक कम्पनीहरूको क्षमता उपयोग ६०.६९ प्रतिशत पाइएको छ। अध्ययनले वैदेशिक लगानीको स्वपूँजी (इक्विटी)को प्रतिफल करीब ११.६१ प्रतिशत रहेको देखाएको छ।

04/09/2024

सर्लाही । सर्लाही जिल्लाको धनकौलमा संघीय सांसद डा.अमरेश कुमार सिंहको समूहमाथि ढुंगामुढा गरिएको छ । निर्वाचन क्ष....

04/09/2024

पूर्व काँग्रेसी रहेका साँसद डा. सिँहमाथि काँग्रेसका कार्यकर्ताहरुले गरे ढुँगामुढा
------------------------------------------------------------------------
सर्लाही । सर्लाही जिल्लाको धनकौलमा संघीय सांसद डा.अमरेश कुमार सिंहको समूहमाथि ढुंगामुढा गरिएको छ ।

निर्वाचन क्षेत्र भ्रमणमा रहेका सांसद डा. सिंह धनकौल गाउँपालिकाको वडा नम्बर २ मा कार्यकर्ताको घरमा खाना खाइरहेको बेला नेपाली कांग्रेसका नेता तथा कार्यकर्ताहरुले ढुंगामुढा गरेका हुन् ।डा. सिंह आफ्ना समर्थक विलासी साहको घरमा दिवा भोजन गर्न गएका थिए । केही दिन देखि उनी निर्वाचन क्षेत्रमा भेटघाट कार्यक्रम चलाइरहेका छन् । घर भित्र भोजन गरिरहेको बेला कांग्रेसका रामश्रेय साह, नरेन्द्र प्रसाद सिंह, सुनिल साह, दिपेन्द्र साह, धर्मेन्द्र साह, कृष्णनन्दन साह, शम्भु साह, सन्तोष ठाकुर, छोटेलाल सहनी लगायतका नेता कार्यकर्ताहरुले अचानक ढुंगामुढा गरेको सांसद डा. सिंहले आरोप लगाएका छन् ।

गाउँपालिका अध्यक्ष रामश्रेय साह, प्रदेश सांसद एवं पूर्वमन्त्री वीरेन्द्र प्रसाद सिंहको निर्देशनमा आक्रमण गराइएको सांसद सिंहले आरोप लगाएका छन् ।

डा. सिंहलाई सुरक्षा दिइरहेका सशस्त्र र नेपाल प्रहरीका केही सुरक्षाकर्मी सहित डा. सिंहका कार्यकर्ताहरु घाइते भएका छन् । उनीहरुलाई समान्य उपचार भइरहेको बताइएको छ ।

नेपाली कांग्रेसका नेताहरुले भने उत्तेजनात्मक भाषण गर्न थालेपछि स्थानीयवासिन्दा आक्रोशित भइ विरोध गरेको बताएका छन् । तर ढुंगामुढा गर्नेमा पूर्वमन्त्री सिंहका भतिजसमेतको सहभागिता रहेको थियो । डा. सिंह दुई पटक नेपाली कांग्रेसको टिकटबाट सर्लाही जिल्लाबाट सांसद जितेका हुन् ।

पछिल्लो निर्वाचनमा कांग्रेसले उनलाई टिकट नदिएपछि स्वतन्त्र भएर प्रतिनिधि सभामा निर्वाचित भएका डा. सिंह आफ्नो निर्वाचन क्षेत्रमा शिक्षा, स्वास्थ्य, सडक, उद्योग स्थापनामा महत्वपूर्ण भूमिका निर्वाह गर्दै आएका छन् । जिल्ला प्रहरी कार्यालय सर्लाहीले स्थिती सामान्य भइसकेको जनाएको छ ।

04/09/2024

पत्रकार उपाध्यायको ‘द्वन्द्व पत्रकारिताको एक दशक’ विमोचित
-----------------------------------------------------------
काठमाडौँ– पत्रकार दीर्घराज उपाध्यायद्वारा लिखित पुस्तक ‘द्वन्द्व पत्रकारिताको एक दशक’ विमोचन भएको छ। शुक्रबार काठमाडौँमा पूर्वप्रधानमन्त्री एवं नेपाली कांग्रेसका सभापति शेरबहादुर देउवाले पुस्तकको विमोचन गरेका हुन्।

पुस्तक विमोचन गर्दै देउवाले द्वन्द्वकालमा पत्रकारिता क्षेत्रले भोगेका समस्या र देखेका घटनाक्रमलाई पुस्तकमा मिहिनेतसाथ समावेश गरिएको बताए। पुस्तक विमोचनका क्रममा उनले पुस्तकमै समेटिएको एउटा घटना, कैलालीको आमखैयामा आफूमाथि भएको आक्रमणको घटना उल्लेख गरे । धनगढीबाट नेपालगञ्ज जादै गरेका देउवालाई २०५९ साल भदौ ८ गते माओवादीले कैलालीको आमखैयामा आक्रमण गरेको थियो । पुस्तकमा समेटिएको देउवामाथिको त्यो आक्रमण शिर्षकको लेखका विषयमा बोल्दै देउवाले ‘ममाथि आक्रमण हुँदा देशमा युद्धविराम थियो, गोली हान्न हुँदैनथ्यो’ भन्ने टिप्पणी गरे।कार्यक्रममा देउवाले सबै दलले आवश्यक ठानेमा संविधान संशोधन हुन सक्ने प्रस्ट पारे।

पुस्तकमाथि टिप्पणी गर्दै पत्रकार कुन्द दीक्षितले यो पुस्तक द्वन्द्वलाई फेरि दोहोरिन नदिन सहयोगी बन्ने आशा व्यक्त गरे। संगम बुक्स पब्लिकेसनले प्रकाशन गरेको पुस्तकमा लेखक उपाध्यायले द्वन्द्वको एक दशकमा सुदूरपश्चिम क्षेत्रको पत्रकारिता र त्यस समयमा घटेका विभिन्न घटनाक्रमलाई समावेश गरेका छन्।

04/09/2024

एमबीबीएस प्रवेश परीक्षाको विषयमा सांसदको प्रश्न– ‘मानवीय गल्ती भन्दै विद्यार्थीको भविष्य धरापमा पार्न पाइन्छ?’
-----------------------------------------------------------
काठमाडौं : माओवादी केन्द्रका सांसद् देवेन्द्र पौडेलले चिकित्सा शिक्षा आयोगले लिएको एमबीबीएस प्रवेश परीक्षाको नतिजामा गम्भीर त्रुटी भएको भन्दै सरकारको ध्यानाकर्षण गराएका छन्।

मंगलबारको प्रनिनिधिसभा बैठकको आकस्मिक समयमा बोल्दै सांसद पौडेलले समान अंक प्राप्त गर्ने विद्यार्थीको योग्यताक्रम टाइब्रेकको आधारमा कायम गर्नुपर्ने परीक्षाको नतिजा रोल नम्बरका आधारमा भएकोमा आश्चर्य प्रकट गरे।

उनले भने, ‘चिकित्सा शिक्षा आयोग कार्यकारी समिति र एकीकृत प्रवेश परीक्षा समितिले किन गम्भीर प्रकृतिको गल्ती गरेका? वक्तव्य निकालेर मानवीय गल्ती भयो भनेर सच्याइयो पनि! मानवीय गल्ती गरेर विद्यार्थीको भविष्य धरापमा पार्न पाइन्छ र?’विद्यार्थीले समान अंक प्राप्त गर्दा क्रमशः बायोलोजी, केमेस्ट्री, पिजिक्स र गणितमा प्राप्त अंकका आधारमा मेरिट प्राप्त गर्नुपर्नेमा झण्डै तीन हजार विद्यार्थीको नतिजा परिवर्तन भएको उनको भनाइ छ।

परीक्षार्थीले परीक्षाको विश्वसनियता, प्रश्नपत्रको गोपनियताबारे प्रश्न उठाइरहेको समेत बताए।

उनले थपे, ‘ओएमआर सिटबारे प्रश्न उठ्दैन सभामुख महोदय। रोल नम्बर एउटा विद्यार्थीको प्राप्ताङ्क अर्को विद्यार्थीको। भद्रगोल बनाउने अनि फेरि सच्याइयो भन्ने?’परीक्षा लिने निकायको यस किसिमको गम्भीर लापरबाहीले विद्यार्थीले आश गरेको मेडिकल साइन्सजस्तो विषय समेत गन्जागोल भएको उनले बताए।

उनले अगाडि भने, ‘यस प्रकारको मजाकभन्दा माथि उठेर सम्बन्धित निकायले निकै पारदर्शिता र गम्भीरतापूर्वक मेरिटका आधारमा पढ्न पाउने विद्यार्थीको सिट र कोटाको व्यवस्थित गर्न ध्यानाकर्षण गराउँछु।’

04/09/2024

'असोजको पहिलो सातादेखि काठमाडौंमा मेलम्चीको पानी'
---------------------------------------------------
काठमाडौं : खानेपानीमन्त्री प्रदीप यादवले आम नागरिकलाई शुद्ध र स्वच्छ खानेपानी उपलब्ध गराउन सरकारले अल्पकालीन, मध्यकालीन र दीर्घकालीन योजना तय गरी कार्यान्वयनमा लगिएको दाबी गरेका छन्।

राष्ट्रिय सभाको आजको बैठकमा सांसद मदनकुमारी साह गरिमाले सोधेको प्रश्नको जवाफ दिँदै मन्त्री यादवले आम नागरिकलाई सहज रुपमा शुद्ध खानेपानी उपलब्ध गराउन सरकारले अगाडि बढाएको योजनालाई पूर्णरुपमा कार्यान्वयन गर्ने बताए।

हाल बन्द गरिएको मेलम्ची खानेपानी आयोजनालाई आगामी असोजको पहिलो सातादेखि पुनःसञ्चालनमा ल्याई काठमाडौंबासीलाई खानेपानी सुविधा उपलब्ध गराउने उनको दाबी छ। मौसममा सुधार आउनेबित्तिकै मेलम्चीको सुरुङमा पानी पठाइने छ। मेलम्ची खानेपानी आयोजनाको पानी नियमित उपलब्ध हुन नसक्दा वैकल्पिक उपाय अवलम्बन गरेर काठमाडौंबासीलाई खानेपानी उपलब्ध गराइएको मन्त्री यादबले बताए।

उनका अनुसार मेलम्ची खानेपानी आयोजनाको बाँधस्थललाई सुरक्षित बनाइ नियमित रुपमा खानेपानी उपलब्ध गराउन सरकारले आवश्यक कार्यक्रम अगाडि बढाइएको छ।

उनले तराई-मधेशमा डिप बोरिङमार्फत खानेपानी उपलब्ध गराइएको भएपनि पछिल्ला दिनमा पानीको स्रोत सुकेका कारण केही समस्या पैदा भएको बताए।

04/09/2024

04/09/2024

एमबीबीएस प्रवेश परीक्षाको विषयमा सांसदको प्रश्न– ‘मानवीय गल्ती भन्दै विद्यार्थीको भविष्य धरापमा पार्न पाइन्छ?’