11/06/2026
सुशासनको एजेण्डा बोकेको सरकारले दुई महिनामै जनतालाई धोका दिँदैन : अर्थमन्त्री डा. स्वर्णिम वाग्ले
काठमाडौं । अर्थमन्त्री डा. स्वर्णिम वाग्लेले सुशासनको एजेण्डा लिएर अघि बढेको वर्तमान सरकारले दुई महिनामै जनतालाई धोका नदिने स्पष्ट गरेका छन्। आगामी आर्थिक वर्षको बजेटमाथि सांसदहरूले उठाएका प्रश्नको जवाफ दिँदै उनले आफूले दुई रुपैयाँको पनि बेइमानी गरेको प्रमाणित भए मन्त्री पद र सार्वजनिक जिम्मेवारी नै त्याग्न तयार रहेको बताए।
करको दर हेरफेरमा अनियमितता भएको भन्ने प्रचार गलत रहेको उल्लेख गर्दै उनले बजारलाई व्यवस्थित र सन्तुलित बनाउन राज्यको नियमन आवश्यक रहेको बताए। बजेटले रोजगारी सिर्जना, उत्पादन वृद्धि र स्थायी आम्दानीका स्रोत विस्तार गर्ने लक्ष्य लिएको उनको भनाइ छ।
अर्थमन्त्री वाग्लेले किसानमुखी कृषि प्रणाली, सामाजिक सुरक्षा सुधार, निजी क्षेत्र प्रवर्द्धन तथा सामुदायिक विद्यालयको स्तरवृद्धिलाई बजेटको प्राथमिकतामा राखिएको बताए। संस्थागत विद्यालयमा लगाइएको ३ प्रतिशत कर र विद्युत्मा कर लगाइएको विषयमा फैलाइएको भ्रमप्रति पनि उनले आपत्ति जनाए।
“रु २१ खर्बको बजेटले एकैपटक कायाकल्प गर्दैन, तर विकासको बीउ रोप्ने काम गर्छ,” उनले भने, “सरकारले एक रुपैयाँ खर्च गर्दा निजी क्षेत्रले पाँच रुपैयाँ लगानी गर्ने वातावरण निर्माण गर्नु आवश्यक छ।”
उनले बजेट कार्यान्वयनमार्फत आर्थिक सुधार, लगानी प्रवर्द्धन र रोजगारी वृद्धि गर्ने दिशामा सरकार प्रतिबद्ध रहेको समेत दोहोर्याए।
📌 तपाईंलाई अर्थमन्त्रीको भनाइ कत्तिको विश्वसनीय लाग्छ? आफ्नो धारणा कमेन्टमा लेख्नुहोस्।
