Annapurna Network

16/03/2025

पेट्रोलमा ५, डिजेल–मट्टीतेलमा ४ रुपैयाँ मूल्य घट्यो

पेट्रोलमा प्रतिलिटर पाँच तथा डिजेल र मट्टीतेलमा प्रतिलिटर चार रुपैयाँ मूल्य घटेको छ ।
चैत, काठमाडौं । नेपाल आयल निगमले इन्धनको मूल्य घटाएको छ । पेट्रोलमा प्रतिलिटर पाँच तथा डिजेल र मट्टीतेलमा प्रतिलिटर चार रुपैयाँ मूल्य घटेको छ ।

शनिबार मध्यरातदेखि लागू हुने गरी निगमले इन्धनको मूल्य समायोजन गरेको हो । अब काठमाडौँ उपत्यकामा पेट्रोल प्रतिलिटर १६३ रुपैयाँ र डिजेल तथा मट्टीतेल १५१ रुपैयाँमा बिक्रीवितरण हुनेछ ।

इन्डियन आयल कर्पोरेशनबाट १५ मार्चमा प्राप्त पेट्रोल तथा डिजेलको नयाँ खरिद मूल्यमा घटेर आएअनुसार निगमन सञ्चालक समितिको निर्णयअनुसार शनिबार मध्यरातबाट लागू हुने गरी इन्धनको मूल्य समायोजन गरिएको निगमका प्रवक्ताले जनाएका छन्

07/01/2025

चीन केन्द्रबिन्दु भएर ७ म्याग्निच्युडको भूकम्प गएको पुष्टि

काठमाडौँ । चीन केन्द्रबिन्दु भएर ७ म्याग्निच्युडको भूकम्प गएको पुष्टि भएको छ । राष्ट्रिय भूकम्प मापन केन्द्रले मंगलबार बिहान चीन केन्द्रबिन्दु भएर उक्त शक्तिशाली भूकम्प गएको पुष्टि गरेको हो।

बिहान ६ बजेर ५० मिनेट जाँदा सिगात्सेबाट ३५ किलोमिटर टाढा पर्ने दिनगाए क्षेत्र केन्द्रबिन्दु बनाएर उक्त भूकम्प गएको हो ।
भूकम्पको धक्का काठमाडौँसम्म महसुस भएको छ । यस्तै अन्य जिल्लामा पनि महसुस भएको छ । बिहानै शक्तिशाली भूकम्पको धक्का गएपछि काठमाडौँवासी होहल्लासहित घरबाहिर निस्केका थिए ।
लामो समयपछि काठमाडौँमा भूकम्पको ठुलो धक्का महसुस भएको हो। भूकम्पबाट कहाँ के कति क्षति भयो भन्नेबारे अहिलेसम्म कुनै विवरण प्राप्त भइसकेको छैन ।

21/12/2024

क्रिकेट खेलेर कार पाउने पहिलो खेलाडी बने दीपेन्द्रसिंह ऐरी

काठमाडौं – नेपाल प्रिमियर लिग(एनपिएल) मा सर्वोत्कृष्ट हुँदै सुदूरपश्चिम रोयल्सका कप्तान दीपेन्द्रसिंह ऐरीले कार पाएका छन् । नेपाली क्रिकेट इतिहासमा खेल खेलेर कार पाउने कप्तान ऐरी पहिलो खेलाडी बनेका हुन्।

एनपीएलमा उत्कृष्ट प्रदर्शन गरेका ऐरीले ‘इलेक्ट्रिक फाइिङ प्लेयर अफ द टुर्नामेन्ट’ अवार्ड प्राप्त गर्दै करिब ६२ लाख मूल्य पर्ने ओमोडा ‘इ’ फाइभ डिएलएक्स कार प्राप्त गरेका हुन्।

नेपाल क्रिकेट सङ्घ (क्यान), ब्रान्ड डिजिटल लजिक प्रालि र शारदा ग्रुपले संयुक्त रूपमा एनपीएलमा उत्कृष्ट प्रदर्शन गर्ने खेलाडीलाई कार प्रदान गर्ने निर्णय गरेका थिए। ऐरीको कप्तानीमा रहेको सुदूरपश्चिम रोयल्स एनपीएलको पहिलो संस्करणमा उपविजेता बनेको छ। कप्तान ऐरीले एनपीएलका नौ खेलबाट २२७ रन जोड्दै नौ विकेट बनाएका हुन्।

30/09/2024

रामेछाप–सिन्धुली वैकल्पिक मार्गबाट यातायात सुचारु

रामेछाप– सुनकोशी नदीले रामेछाप र सिन्धुली जोड्ने खुर्कोटको पक्की पुल बगाएपछि वैकल्पिक मार्गको रुपमा मन्थली–पकरवास–भीरपानी सडकखण्ड मर्मत गरी आइतबार साँझबाट यातायात सुचारु भएको छ ।

मन्थलीबाट गाइखुरा पुल हुँदै पकरवास–भिरपानी सडकखण्ड मर्मत गरेसँगै सित्खा हुँदै र सिन्धुलीको मुलकोटसम्मको आवागमन सुचारु भएको खाँडादेवी गाउँपालिकाका अध्यक्ष ज्ञानकुमार श्रेष्ठले जानकारी दिए ।

खुर्कोटको पुल बाढीले बगाएपछि मन्थली–पकरवास–भीरपानी सडकखण्ड सुचारु गर्न जिल्लास्थित सरोकारवालाले पहल थालेका थिए । मन्थलीदेखि सिन्धुलीको वैकल्पिक मार्ग आवागमन सुचारु भएपछि तराइका जिल्लासँग यातायातको माध्यमबाट सम्पर्क पुनःस्थापित भएको छ ।

आइतबार प्रमुख जिल्ला अधिकारी राजुप्रसाद पौडेलको अध्यक्षतामा बसेको जिल्ला विपद् व्यवस्थापन समितिको बैठकले खुर्कोटको पुल बगाएसँगै जिल्लामा यातायात सुचारु गराउन वैकल्पिक सडक मन्थली–पकरवास–भिरापनी–सित्खा सडक तत्काल मर्मत गरी सञ्चालन गर्ने निर्णय गरेको थियो ।

सडक सुचारु गर्न नेपाल प्रहरी, सशस्त्र प्रहरी, नेपाली सेना स्थानीय र गाँउपालिकाको टोली आइतबार साँझ अबेरसम्म खटिएका थिए ।

यसैबीच यातायात सेवा अवरुद्ध भएपछि तारा एयरले आइतबारदेखि दैनिक मन्थली–काठमाडौं उडान सुरु गरेको छ ।

बाढीपहिराको कारण सदरमुकाम मन्थली लगायतका अधिकांश ठाउँमा विद्युत्, टेलिफोन, इन्टरनेट र खानेपानी सेवा अझै अवरुद्ध छन् ।

28/09/2024

काभ्रेको बल्थलीमा पहिरोले गाउँ नै बगायो

काभ्रेको पनौती नगरपालिका–११ बल्थलीमा पहिरोले गाउँ नै बगाएको छ। निरन्तर वर्षाका कारण शुक्रबार राति गाउँमाथीबाट आएको पहिराले गाउँ नै बगाएको हो।

मध्यराति आएको पहिरोबाट जोगिन पीडितहरु भागाभाग गरे पनि ४ जना पहिरोमा पुरिएर बेपत्ता भएको पनौती नगरपालिकाका प्रमुख रामशरण भण्डारीले जनाकारी दिए। उनका अनुसार उक्त गाउँमा ११ घर पहिरोमा परेका छन्।

पहिरोमा परेर बेपत्ता हुनेमा स्थानीय अर्जुन भण्डारीका घरमा पाहुना लाग्न आएका व्यक्तिहरु रहेको नगर प्रमुख भण्डारीले जानकारी दिए। घटनास्थलसम्म पुग्ने स्थिती नरहेको बताउँदै उनले भने, ‘पहिरो झरेको झर्यै छ। ४ जना पहिरोमा हराउकालाई उद्धार गर्न जान सक्ने अवस्था छैन। अन्य भने सुरक्षित स्थानमा राखिएको छ। पहिरोमा परेर के कति क्षति भयो भन्ने विवरण संकलन गर्न पनि भ्याइएको छैन।’

नगरप्रमुख भण्डारीका अनुसार स्थानीयलाई थुम्की रिसोर्टमा राखिएको छ। रातको समय र निरन्तर पहिरो गइरहेकाले क्षतिको थप विवरण आउन बाँकी रहेको बताइएको छ।

27/09/2024

दुवाकोटमा पनि खुल्यो सुपथ मूल्यको पसल, कति सस्तोमा के-के सामान पाइन्छ ?

भक्तपुर- भक्तपुरको चाँगुनारायण नगरपालिका र खाद्य व्यवस्था तथा व्यापार कम्पनीको सहकार्यमा चाडपर्व लक्षित सुपथ प...

14/09/2024

चाडपर्व नजिकिएसँगै भक्तपुरमा माटोका भाँडा बनाउन व्यस्त प्रजापति समुदाय (तस्वीरहरू)

भक्तपुर – नेपालीहरूको महान् पर्व दशैं नजिकिएसँगै भक्तपुरमा माटोका भाडाहरू बनाउन व्यस्त छन् प्रजापति समुदाय ।

दशैंको घटस्थापनाको दिन आवश्यक जलधारा, धुपौरो र जमरा राख्ने भाँडो बनाउने, सुकाउने र रङ भर्ने काममा व्यस्त देखिन्छन्।

दशैंमा विशेष गरेर माटोको धुपौरो र जमरा राख्ने भाँडो, जलधाराको माग आउने गरेको छ, अहिले भ्याइनभ्याइ छ’, वर्षौँदेखि माटोका भाँडा बनाउँदै आएका स्थानीय सूर्य प्रजापतिले बताए।
वर्षभरिमा राम्रो आम्दानी गर्ने दशैं तिहारको समय भएकाले यो मौकालाई गुम्न नदिन स–परिवार बिहानैदेखि रात नपरेसम्म काममै व्यस्त हुने गरेको सुनाए। यहाँ उत्पादन भएका सामान भक्तपुर, काठमाडौंँ, ललितपुर, काभ्रे, बनेपा, पनौती, सिन्धुपाल्चोक, धादिङ, नुवाकोट, पोखरा, नारायणगढ, वीरगञ्जबाट समेत माग भएकाले पठाउने गरेको उनको भनाइ छ।
कोही माटोका भाँडा बनाइरहेका, कोही सुकाइरहेका, कोही आधुनिक भट्टीमा भाँडा पोखिरहेका त कोही झिक्दै बाकसमा प्याक गर्दै आएको देखिन्छ।

10/09/2024

क्यान्सरका बिरामीलाई होम केयर सेवा कसरी दिने

क्यान्सर दीर्घकालीन रोग हो । शरीरमा लाग्ने अन्य रोगभन्दा क्यान्सर प्राणघातक रोग मानिन्छ । क्यान्सरको समयमा उपचार नभएमा बिरामीको ज्यान नै जान सक्छ । यो रोगले बिरामी शारीरिक दुर्बलता, मानसिक विक्षिप्तता र तनावमा बाँच्न विवश हुन्छ ।

क्यान्सर पीडितका भावनाहरु सूक्ष्म रुपमा संवेदनशील हुँदै जान्छन् । यो अवस्थामा उपचार मात्र होइन क्यान्सर लागेकालाई निरन्तर परिवारको सहयोग र भावनात्मक साथको पनि खाँचो पर्छ ।

उनीहरु यसै पनि शारीरिक रूपमा दुर्बल र कमजोर हुन्छन् । यतिसम्म कि रोगको अन्तिम चरणमा ओछ्यानमा कोल्टे पल्टिन पनि सक्दैनन् । बिस्तारै शरीर गल्दै जान्छ । एक त भोक लाग्दैन अर्को लागे पनि खाना खान र पचाउन सक्दैनन् । बिस्तारै तौल घट्छ । अन्तिम अवस्थासम्म पुग्दा शरीरमा हाड र त्यसलाई ढाकेको सुकेको छाला बाहेक केही रहँदैन ।

यतिमै सीमित छैन, क्यान्सर रोगको व्यथा । क्यान्सर रोगको निदानदेखि बिरामीको मृत्युवरण नभएसम्म सयौं पटक दर्दनाक प्रक्रियाबाट गुज्रिनुपर्छ ।

एक पटक रगत झिक्दा पनि रगत झिकेको भागमा दुख्छ । तर क्यान्सर भएकालाई एक पटक मात्र होइन, कैयौं पटक रगत झिकिन्छ । आईभी क्यानुला लगाउन मात्र सातदेखि आठ पटक घोचिन्छ । रोग पत्ता लगाउन कैयौं पटक छाला छिर्नुपर्छ । ट्युमर क्यान्सर चिरेर फाल्न जटिल शल्यक्रिया धेरै भइसकेका हुन्छन् ।

क्यान्सर यस्तो रोग हो, जो बिरामीले सुरुकै दिनबाट अबका दिनहरु दर्दनाक र बाँच्नका लागि संघर्षपूर्ण हुन्छ भन्ने थाहा पाउँछन् । मृत्युसँग लड्न चाहेर वा नचाहेर पनि उनीहरु तयार हुनैपर्छ ।

10/09/2024

चिनीमा ५० प्रतिशत भन्सार छुट दिने मन्त्रिपरिषद्को निर्णय

सरकारले चिनी आयातमा ५० प्रतिशत भन्सार छुट दिने निर्णय गरेको छ।

बालुवाटारमा सोमबार बसेको मन्त्रिपरिषद् बैठकले साल्ट ट्रेडिङ कर्पोरेसन र खाद्य व्यवस्था तथा व्यापार कम्पनीले चिनी आयात गर्दा भन्सार महसुलमा आधा छुट दिने निर्णय गरेको एक मन्त्रीले जानकारी दिए।

यी दुवै सरकारी स्वामित्वका कम्पनी हुन्।

09/09/2024

नेपाली सेनाको कमाण्ड आजदेखि सिग्देलले सम्हाल्दै

२४ भदौ, काठमाडौं । नेपाली सेनाको कमाण्ड आजदेखि औपचारिक रुपमा अशोकराज सिग्देलले सम्हाल्दै छन् । उनलाई आज बिहान १० बजे राष्ट्रपति एवम् नेपाली सेनाका परमाधिपति रामचन्द्र पौडेलले दर्ज्यानी चिह्न प्रदान गर्ने छन् । त्यसपछि जंगी अड्डामा आएर उनले कार्यभार सम्हाल्नेछन् ।

सिग्देल नेपाली सेनाको ४५ औं प्रधानसेनापति हुन् ।

निवर्तमान प्रधानसेनापति प्रभुराम शर्माको अवकाशपछि सिग्देलले सेनाको कमाण्ड सम्हाल्ने अवसर पाएका हुन् । राष्ट्रपति पौडेलले १२ भदौमा सिग्देललाई २४ भदौदेखि लागु हुने गरी प्रधानसेनापति नियुक्त गरेका थिए ।

नेपाली सेनामा चार दशक बिताएका शर्मा २४ साउनदेखि बिदामा बसेका थिए । जंगी अड्डाले आजै बेलुका उनलाई बधाई तथा शुभकामना दिने कार्यक्रम राखेको छ ।

को हुन् सिग्देल ?

३७ वर्षअघि सैनिक सेवामा प्रवेश गरेका सिग्देलको स्थायी घर भैरहवा हो ।
विद्यार्थी उनले जंगी अड्डाको युद्धकार्य विभाग र व्यवस्था, नीति तथा योजना महानिर्देशनालयको नेतृत्व गरिसकेका छन् ।

प्रधानसेनापतिको सैनिक सचिवसमेत रहिसकेका सिग्देलले कोभिड १९ संकट व्यवस्थापन केन्द्रको नेतृत्व तहमा बसेरसमेत काम गरेका थिए ।

संयुक्त राष्ट्र संघको शान्ति मिसनका क्रममा उनले युगोस्लाभिया, ताजिकिस्तान र लाइबेरियामा काम गरेका छन् ।

जन्ममिति विवादमा छानबिन भएपछि उपरथी ताराध्वज पाण्डेले राजीनामा दिएपछि सिग्देल प्रधानसेनापतिको रोलक्रममा आएका थिए । सिग्देलको जन्ममितिमा पनि विवाद आएपछि जंगीअड्डाले आन्तरिक छानबिन गरेर कैफियत नरहेको बताएको थियो ।

08/09/2024

काठमाडौँ । ऋषिपञ्चमी पर्वका अवसरमा आज नेपाली नारीहरूले अरुन्धतीसहित सप्त ऋषिको पूजा आराधना गरी मनाइरहेका छन् ।

प्रत्येक वर्ष भाद्र शुक्ल पञ्चमीका दिनमा मनाइने यो पर्वमा महिलाले आज बिहानै उठेर नित्यकर्म गरी नजिकको नदी, खोला, ताल, तलैया र पोखरीमा गई तीन सय ६५ वटा दत्तिउनले दाँत माझ्ने, गाईको गोबर, माटो एवं खरानी लगाई स्नान गर्दछन् ।

यसरी स्नान गरेपछि अरुन्धतीसहित अत्रि, गौतम, भारद्वाज, जमदग्नि, वशिष्ठ, कश्यप र विश्वामित्रको पूजा गर्ने गरिन्छ । जसलाई ऋषिपञ्चमीको पूजा लगाउने भनिन्छ । यस अवसरमा ऋषिपञ्चमी : काठमाडौँको गुह्येश्वरीमा व्रतालुको भिड (तस्बिरहरू)