20/07/2025
बेल्जियमका मिखेल नाम गरेका एक व्यक्तिले फ्रेन्च मोडल सोफी भुजेलोद (Sophie Vouzelaud) सँग अनलाइनमा प्रेम सम्बन्ध रहेको विश्वास गर्दै फ्रान्ससम्म ७६० किलोमिटर यात्रा गरे । उनी ‘भविष्यकी श्रीमती’ भेट्न गएको ठानेका थिए, तर उनको घरमा पुग्दा सोफी होइन, उनका वास्तविक श्रीमान् फाबिएन बुटामिन (Fabien Boutamine) ले ढोका खोले । यो अचम्मको क्षण बुटामिनले भिडियोमा कैद गरी सामाजिक सञ्जालमा सार्वजनिक गरे । भिडियोमा मिखेल आफू सोफीको भावी श्रीमान् भएको दाबी गर्दै देखिन्छन्, भने बुटामिनले “म अहिलेको श्रीमान् हुँ” भन्दै स्थिति स्पष्ट गर्छन् ।
सन् २००७ की मिस फ्रान्स प्रतिस्पर्धाकी उपविजेता सोफीले आफूले सामाजिक सञ्जालमा कैयौं नक्कली अकाउन्ट बनेको बताउँदै, भिडियो शेयर गर्दै अरूलाई पनि सतर्क रहन आग्रह गरेकी छन् । ठगिएको महसुस गरेका मिखेलले आफूले ठगीमा परेको स्वीकार गर्दै, सोफी ठानिएकी व्यक्तिलाई करिब ३५ हजार डलर (झन्डै ५० लाख नेपाली रुपैयाँ) पठाएको खुलासा गरेका छन् ।
