14/04/2026
🎉 नयाँ वर्ष २०८३ 🎉
प्रत्येक बर्ष, प्रत्येक समयले धेरै कुरा सिकाएका छन । प्रत्येक बर्ष हामीलाई झन बढी परिपक्व बनाएको छ र बिगतको २०८२ ले पनि धेरै कुरा कुरा सिकाएर बिदा भएको छ । यिनै सिकाईहरूसँगै सिक्दै, बुझ्दै, अगाडि बढिरहेका छौ हामी ।
मानिसहरू बितेको बर्ष, गएको साल भन्छन । २०८२ धेरैको लागि बितेको बर्ष भईसकेको छ । मेरो लागि भने त्यो मैले बिताएको बर्ष हो । मैले हुर्के/खेलेको साल हो ।
हरेक दिन/पलका प्रत्येक भोगाईहरूसँग सिक्दै अगाडि बढिरहेका हुन्छौ हामी । केही राम्रो, केही नराम्रो, केही असल, केही खराब, अनि केही खुसी र केही दुख .... केही गल्ती र केही उपलब्धी ... यी सबै मैले पनि सम्हालेरै आएको छु ।
यो नयाँ बर्षमा मभित्रको उर्जा अझै बढोस । म आफैप्रति/आफ्नो कामप्रति सदाझै इमान्दार बनिरहन सकुँ ! आफूले जानेको कामलाई अझै बढी गहिराईमा पुगेर महसुस गर्न सकुँ । यो यात्रामा हरपल साथ दिइरहने साथीहरू सँधै सँगै रहून । सत्य बोलिदिने, गल्ती देखाईदिने ती सबै आफ्ना मानिसहरू सँधै नजिक रहून । आखिर, सरल र सहज जीवनको बाटो पनि त त्यही नै हो ।
म चाहन्छु, म त्यस्तो असल मानिस बन्न सकु र जसले अरूलाई पनि असल बाटो पहिल्याउने सहयात्री बनिदिन सकोस । मैले गरेको कामको प्रतिफल मलाई मात्र नभई अरूलाई पनि मिलोस ।
मसँगै हिड्ने हरेक पात्र, हरेक साथी, हरेक कथा र हरेक जीवन सबैप्रति नमन । बिशेषगरी मलाई मनदेखी नै माया गर्नुहुने दर्शकहरूप्रति टनाटन माया । यहाँहरूको साथ, माया र सुझावको सँधै अपेक्षा रहनेछ । यदि कही कतै बाटो बिराएको देख्नुभयो भने निसंकोच भनिदिनुहोला । म सुधारको लागि हरसम्भव प्रयास गर्नेछु ।
नयाँबर्ष २०८३ ले तपाईं र तपाईंको घर, परिवार, साथी र समाजमा सुन्दर मार्गदर्शन गरोस । सुख, स्वस्थ्य र प्रेमिल जीवनको तपाईंहरू सबैमा मेरो कामना । नयाँ बर्ष २०८३ तपाईं, हामी सबैका लागि शुभ रहोस । 🌼
