03/09/2026
नेपालप्रति सिक्किमका मुख्यमन्त्री तामाङको माया, रविलाई भने– ‘नेपालमा बाढी जाँदा यता हामी रुन्छौँ’
नेपालमा आएको बाढीबाट ठूलो जनधनको क्षति भएपछि सिक्किमका मुख्यमन्त्री प्रेमसिंह तामाङ (गोले)ले नेपालप्रति ऐक्यबद्धता जनाएका छन्। उनले राष्ट्रिय स्वतन्त्र पार्टीका सभापति रवि लामिछानेलाई फोन गरेर विपत्तिको समयमा नेपाल र नेपालीप्रति सिक्किमका जनताको साथ रहेको बताएका हुन्।
रवि लामिछानेसँगको कुराकानीमा तामाङले नेपाल र सिक्किम फरक देश भए पनि भाषा, संस्कृति, भेषभूषा, चाडपर्व र सामाजिक सम्बन्धले आफूहरूलाई नजिक बनाएको बताए। नेपालमा विपत्ति आउँदा सिक्किमका नागरिक पनि भावनात्मक रूपमा दुःखी हुने उल्लेख गर्दै उनले भावुक हुँदै भने, ‘नेपालमा बाढी जाँदा यता हामी रुन्छौँ।’ साथै, नेपालका लागि सहयोग गर्न चाहने कलाकार तथा अन्य व्यक्तिका मानवीय कार्यक्रमलाई सहज बनाउन आफूहरू तयार रहेको उनले बताए।
मुख्यमन्त्री तामाङको आत्मीयता र सहयोगी भावनाप्रति रवि लामिछानेले धन्यवाद दिएका छन्। कठिन समयमा सम्झिएर साथ दिनु नै ठूलो कुरा भएको बताउँदै लामिछानेले नेपाल र सिक्किमबीचको आत्मीय सम्बन्ध, मित्रता र भाइचारा आगामी दिनमा अझ बलियो बनोस् भन्ने शुभकामना व्यक्त गरेका छन्।
