03/06/2026
भारतीय प्रधानमन्त्री नरेन्द्र मोदीले राष्ट्रिय स्वतन्त्र पार्टीका सभापति रवि लामिछानेसँगको भेटपछि नेपाल–भारत सम्बन्धलाई थप सुदृढ र उचाइमा पुर्याउने प्रतिबद्धता व्यक्त गरेका छन्।
प्रधानमन्त्री मोदीले सामाजिक सञ्जालमार्फत रवि लामिछानेसँगको भेटप्रति खुशी व्यक्त गर्दै साझा समृद्धि र उज्ज्वल भविष्यका लागि मिलेर काम गर्ने आफ्नो चाहना सार्वजनिक गरेका हुन्।
मोदीले नेपाललाई भारतको ‘छिमेकी पहिलो’ नीतिअन्तर्गत प्राथमिकतामा रहेको महत्वपूर्ण साझेदार राष्ट्रका रूपमा उल्लेख गरेका छन्। उनले नेपालसँगको विशेष, घनिष्ठ र बहुआयामिक सम्बन्धलाई अझ मजबुत बनाउँदै नयाँ उचाइमा पुर्याउन भारत प्रतिबद्ध रहेको बताएका छन्।
“राष्ट्रिय स्वतन्त्र पार्टीका सभापति रवि लामिछानेसँग भेटेर खुशी लाग्यो। साझा समृद्धि र समुन्नत भविष्यका लागि उहाँसँग नजिकबाट सहकार्य गर्ने चाहनालाई म स्वागत गर्दछु,” मोदीले लेखेका छन्।
उनले नेपाल भारतको ‘छिमेकी पहिलो’ नीतिको प्राथमिक साझेदार रहेको उल्लेख गर्दै आगामी दिनमा नयाँ सरकारसँग सहकार्य गरेर दुई देशबीचको ऐतिहासिक, सांस्कृतिक, आर्थिक तथा जनस्तरको सम्बन्धलाई थप सुदृढ बनाउने अपेक्षा व्यक्त गरेका छन्।
मोदीको उक्त अभिव्यक्तिलाई नेपाल–भारत सम्बन्धलाई अझ प्रगाढ र उचाइमा लैजाने संकेतका रूपमा हेरिएको छ। साथै, यसले दुई देशबीचको सहकार्य र साझेदारीलाई आगामी दिनमा थप विस्तार गर्ने सन्देश दिएको विश्लेषण गरिएको छ।
