07/03/2026
आदरणीय दिदी बहिनी तथा दाजुभाईहरूमा जय नेपालको हार्दिक अभिबादन ब्यक्त गर्दछु !
यहि फागुन २१ गतेको आम चुनाव सुसम्पन्न गरेर देश अब सरकार निर्माणको नया चरणमा प्रवेश गर्दैछ । निर्वाचनमा म नेपाली कांग्रेसको “रुख” चुनाव चिन्ह लिएर भोट माग्न तपाईहरुको घर दैलोमा आएँको थिए।
लोकतान्त्रिक निर्वाचन जित हार भन्दा माथि एउटा संस्कार र संस्कृतिको विकास प्रक्रिया हो र मेरो पार्टी नेपाली कांग्रेसले यसलाई यहि रुपमा बुझ्दै आएको छ ।
नेपालको एकता, अखण्डता र सार्वभौमिकताको रक्षा र संवर्धन लोकतान्त्रिक पद्धतिवाट आम नागरिकको भरोसा र विश्वास जितेको सरकारको माध्यमबाट मात्र हुन सक्दछ।शान्ति ,सुशासन ,सम्बैधानिक सुधार र रोजगारीका अबसरको सिर्जनाको नेपाली जनताको चाहना निर्बाचनमा प्रतिबिम्बित भएकोछ।देशमा बिद्यमान लोकतान्त्रिक निर्बाचन प्रकृयाबाट युवाहरु भर्खरै सम्पन्न निर्वाचनमा विजयी हुनुभएको छ । भावी संसदमा हामी वहाहरूलाई नीति निर्माणको प्रभाबकारी भुमिकामा पुगेको देख्नेछौं ।
कञ्चनपुर क्षेत्र नं–२ बाट निर्बाचित हुनु भएका दिपक बोहराजी लाई म बधाई दिन चाहन्छु ।उहाँले आफ्नो कार्यकालमा यस क्षेत्रका जनताको सेवा, बिकास र सम्बृध्दिका लागि गर्ने योगदानमा मेरो सद्भाव र समर्थन रहने छ ।
त्यस्तै सम्पन्न निर्वाचनमा आफ्नो मत प्रयोग गरेर या मलाई अभिमत ब्यक्त गरेर विश्वास र भरोसा गर्ने कञ्चनपुर क्षेत्र नं–२ का सवै मतदातालाई धन्यवाद दिन चाहन्छु, आभारी छु । निर्वाचन शान्तिपूर्वक सम्पन्न गर्न सफल भएकोमा निर्बाचन आयोग ,प्रशासन, सुरक्षा निकाय लगायत सबै लाई म धन्यवाद दिन चाहन्छु ।
अन्तमा,
मलाई लामो समयदेखि कञ्चनपुर क्षेत्र नं–२ वाट निर्वाचित गराएर पठाउने मेरा मतदाताहरु सँग यो जित हारले कुनै फरक पर्ने छैन । नेपाली कांग्रेसका नेता ,कार्यकर्ता पंक्ति ,सुभेच्छुक साथीहरूमा निर्बाचनमा अहोरात्र खटिएर गर्नु भएको मेहनतका लागि कृतज्ञता प्रकट गर्दछु ।मेरो यस क्षेत्रसँग जुन अटुट सम्वन्ध र प्रेम छ त्यसको निरन्तरतामा रत्तिभर पनि आँच आउँन दिने छैन । म यो विश्वास दिलाउन चाहन्छु ।धन्यबाद!
- एनपी साउद
